11 listapada — lekcyja kulturołaha Alaksieja Kryvałapa «Kuplajcie biełaruskaje», albo Što rabić, kali zaŭtra nie nastupić?»

Spažyvieckaje hramadstva pabudavana pa takim pryncypie, kab padtrymlivać u čałavieku prahu da spažyvańnia.

Moda na vopratku trymajecca nie bolej za siezon, našmat čaściej źmianiajucca madeli kamputaraŭ, telefonaŭ, palapšajecca prahramnaje zabieśpiačeńnie i h.d… Hetaja śfiera funkcyjanuje takim čynam, kab padšturchoŭvać čałavieka spažyvać našmat bolej, čym patrabuje jaho natura i navat zdarovy sens.

Pastupova ŭ čałavieku farmujecca lohkaje staŭleńnie da ŭsiaho — usio možna nabyć, i ad usiaho možna lehka pazbavicca. Miaža pamiž kaštoŭnasnym i druhasnym stanovicca vielmi chistkaj.

Akramia taho, čałaviek upadaje ŭ samapadman, dumajučy, što praz taki ci inšy vybar rečaŭ jon vykazvaje siabie, svaju indyvidualnaść, što heta jon zadaje toj ci inšy «dyzajn» samoha siabie.

Padajecca, što siońniašniaja miedyjaśfiera ŭ Biełarusi (i nie tolki) isnuje vielmi padobnym čynam — jana nasyčaje čałavieka infarmacyjaj, čaściej za ŭsio zališniaj i nie vartaj. U žadańni pryciahnuć novuju aŭdytoryju vydumvajucca skandalnyja historyi, status «siensacyjnaści», «unikalnaści» ci «fienamienalnaści» nadajecca padziejam druhasnym, a vartyja abmierkavańnia pytańni zastajucca «pa-za trendam».

Burnaje raźvićcio Internetu i sacsietak źniščaje aŭtarytety, u peŭnym siensie prymušaje ŚMI funkcyjanavać u prastory «infarmacyjnaha šumu» i samim stanavicca jaho stvaralnikami.

Pahonia za «łajkami», kolkaściu naviedvalnikaŭ, «kamientaŭ» pieravyšaje kłopat pra źmiest, aktualnaść i vartaść publikacyi.

Kali my pasprabujem ujavić sabie biełaruskuju miedyjaprastoru praź niekalki hadoŭ i zrazumieć, što nas čakaje, — ci znojdziem my padstavy dla aptymizmu? Što nasamreč upłyvaje na raźvićcio biełaruskaha miedyjarynku? Ci mahčyma isnavańnie ŚMI, nie aryjentavanych na «infarmacyjnaje spažyvańnie»?

11 listapada 2016 h. Latučy ŭniviersitet i Mižnarodny kansorcyum «JeŭraBiełaruś» u miežach cykła «Ujaŭlajučy Biełaruś: idei i vobrazy dla supolnaj budučyni» zaprašajuć na adkrytuju lekcyju kulturołaha Alaksieja Kryvałapa «Kuplajcie biełaruskaje», albo Što rabić, kali zaŭtra nie nastupić?». Lekcyja budzie prachodzić u kreatyŭnaj prastory «CECH» (vuł. Kastryčnickaja, 16), pačatak a 18.30. Uvachod volny!

Razam ź lektaram my pasprabujem praanalizavać stan sučasnaj žurnalistyki, uzajemaadnosiny ŚMI i hramadstva, upłyŭ «infarmacyjnaha spažyvańnia» na nas i našu identyčnaść i tyja čyńniki, jakija zdolnyja mianiać situacyju i kanstrujavać inšuju budučyniu miedyjaprastory.

Videazapisy papiarednich lekcyj i anonsy nastupnych padziej šukajcie na sajcie Latučaha ŭniviersiteta.

• 0
• 0
• 0
• 0
• 0
• 0
• 0
• 0