Ministerstva kultury Rasii hatova ŭkładvać u zdymki sumiesnych ź Biełaruśsiu filmaŭ dva rubli na adzin biełaruski rubiel. Pra heta zajaviŭ ministr kultury RF Uładzimir Miadzinski na supolnym pasiadžeńni kalehij ministerstvaŭ kultury Rasii i Biełarusi ŭ Sankt-Pieciarburhu. U taki sposab Rasija atrymała b kantrol nad tematykaj filmaŭ, što zdymajuć biełarusy.
«U luby prajekt, jaki my sumiesna ŭchvalim, dva rubli buduć iści ad Minkultury RF na adzin rubiel ad Biełarusi, — cytuje Miadzinskaha ahienctva TASS. — Davajcie razhledzim hetyja prajekty, nie važna, chto heta robić — zbornaja kamanda ci sama Biełaruś, ci «Lenfilm» ź Biełaruśsiu. Potym my razam budziem atrymlivać dachody ad prakatu. Idej šmat, heta nie abaviazkova pavinny być histaryčnyja temy, cikava i pra sučasnaje žyćcio źniać, my razam žyviom, razam pracujem».
Pra supracoŭnictva ź Biełaruśsiu ministr jašče adznačyŭ, što nie varta «bicca ab ścienku» i sprabavać znajści hrošy ŭ biudžecie Sajuznaj dziaržavy na vytvorčaść sumiesnych karcin, treba vykarystoŭvać «miechanizm ručnoha kiravańnia», kali ŭ stvareńni stužki ŭdzielničajuć niekalki krain, a taksama dapamahaje biźnies i abjaŭlajecca narodny zbor srodkaŭ.
Što da kankretnych płanaŭ, to Biełaruś i Rasija chočuć razam źniać telesieryjał «Spadar Nie» pra byłoha ministra zamiežnych spraŭ SSSR Andreja Hramyku.
Miarkujecca, što jon budzie składacca z 12-ci 50-chvilinnych sieryj. Dla zdymak mohuć być vykarystany placoŭki «Biełaruśfilma» i «Lenfilma». Taksama zapłanavany zdymki ŭ Vašynhtonie i Łondanie.
Finansavańnie prajekta prapanujecca vieści za košt srodkaŭ Sajuznaj dziaržavy.
Andrej Hramyka zajmaŭ pasadu ministra 28 hadoŭ, z 1957 da 1985 hadoŭ. «Spadarom Nie» jaho prazvali za ŭpartaść u adstojvańni savieckaj pazicyi.
Hramyka naradziŭsia na Homielščynie, vučyŭsia pa-biełarusku ŭ minskim Ekanamičnym instytucie, da kanca žyćcia pa-rusku i pa-anhlijsku havaryŭ z mocnym biełaruskim akcentam, ale staŭ pisacca ruskim, kali pačaŭ rabić karjeru ŭ Maskvie.
Jon pryznačaŭsia deputatam Viarchoŭnaha Savieta SSSR pieravažna ad Biełarusi. Addany savieckaj impieryi, jon ujaŭlaje saboj zručnuju dla Maskvy postać «viernaha biełarusa».
Kamientary