Jehipiet zapuskaje najdaŭžejšuju ŭ śviecie bieśpiłotnuju manarejku

Kair viadomy nie tolki svaimi histaryčnymi pomnikami, ale i zatorami. Kab razhruzić šmatmiljonny miehapolis, ułady Jehipta niekalki hadoŭ tamu pačali budaŭnictva novaj administracyjnaj stalicy ŭ pustyni na ŭschod ad horada. Ciapier važnaj častkaj hetaj stratehii stała novaja transpartnaja sistema bieśpiłotnaha manarejkavaha transpartu, jakaja pavinna zabiaśpiečyć chutkaje złučeńnie pamiž novymi i starymi haradskimi rajonami.

Jak piša CNN, u mai dla pasažyraŭ adkryłasia pieršaja linija sietki — «Uschodni Nił» (East Nile). Jana praciahnułasia na 56,5 kiłamietra ad Kairskaha mižnarodnaha stadyjona ŭ rajonie Nasr-Sici da Novaj administracyjnaj stalicy, jakaja pakul nie maje nazvy. Pakul što nie ŭsie stancyi pieršaj linii ŭviedzienyja ŭ ekspłuatacyju: šeść z 22 jašče zastajucca zakrytymi.

Heta tolki častka prajekta: druhaja linija, «Zachodni Nił» (West Nile), praciahłaściu 43,8 kiłamietra pavinna złučyć horad-spadarožnik «6 Kastryčnika» z Hizaj. Paśla zaviaršeńnia budaŭnictva ahulnaja daŭžynia sietki składzie bolš za 100 kiłamietraŭ. Heta dazvolić jehipieckaj sistemie abyści kitajski Čuńcyn i stać samaj doŭhaj manarejkavaj mahistrallu ŭ śviecie.

Raźličvajuć, što novy transpart budzie štodnia pieravozić kala paŭmiljona čałaviek. U pieršyja try dni paśla adkryćcia prajezd byŭ biaspłatnym, paśla čaho ŭviali apłatu pa taryfnych zonach. Košt bileta na ŭvieś maršrut East Nile składaje 80 jehipieckich funtaŭ (1,51 dalara), a dla rehularnych pasažyraŭ praduhledžany kvartalnyja prajaznyja koštam ad 34 dalaraŭ za 180 pajezdak ŭ miežach adnoj zony da 136 dalaraŭ za čatyry zony.

Čym admietnaja novaja manarejka Kaira?

Jak adznačaje vydańnie, prajekt staŭ adkazam na surjoznyja prablemy haradskoj transpartnaj sistemy. Isnujučyja try linii mietro Kaira pieravoziać kala 500 miljonaŭ pasažyraŭ štohod i ŭžo doŭhi čas pracujuć ź vialikaj nahruzkaj. U 2019 hodzie francuzskaja kampanija Alstom atrymała kantrakt koštam kala troch miljardaŭ dalaraŭ na budaŭnictva i ekspłuatacyju novaj manarejkavaj sietki. U prajekcie taksama ŭdzielničajuć jehipieckija kampanii Orascom Construction i Arab Contractors.

Dla sistemy było vyrablena 272 vahony na zavodzie Alstom u brytanskim Derbi. Usiaho sietku buduć absłuhoŭvać 68 ciahnikoŭ. Jany zdolnyja raźvivać chutkaść da 80 kiłamietraŭ za hadzinu i pieravozić da 45 tysiač pasažyraŭ na hadzinu ŭ kožnym kirunku. Ruch ažyćciaŭlajecca pa bietonnych estakadach, uźniatych nad haradskimi vulicami.

Asablivaść prajekta — poŭnaja aŭtamatyzacyja. Manarejka pracuje biez mašynistaŭ. Za rucham ciahnikoŭ sočyć sistema sihnalizacyi na asnovie radyjosuviazi, jakaja pastajanna vyznačaje dakładnaje miescaznachodžańnie kožnaha sastavu. Aŭtamatyka kiruje ŭsimi asnoŭnymi pracesami — ad razhonu i tarmažeńnia da adkryćcia dźviarej i reahavańnia na avaryjnyja situacyi.

U Alstom padkreślivajuć i ekałahičnyja pieravahi novaha transpartu. Sistema stvaraje mienš šumu, nie vykidvaje škodnych rečyvaŭ u atmaśfieru i zdolnaja viartać da 99% enierhii pry tarmažeńni, što źnižaje ahulnaje enierhaspažyvańnie. Akramia taho, architektura sietki dazvalaje pavialičvać jaje prapusknuju zdolnaść biez maštabnaj pierabudovy infrastruktury — dastatkova pavialičvać kolkaść ciahnikoŭ i častatu ruchu.

Pavialičyć

Kansorcyum, jaki buduje manarejku, uziaŭ na siabie abaviazak nie tolki ŭźvieści sistemu, ale i zajmacca jaje ekspłuatacyjaj i techničnym absłuhoŭvańniem na praciahu 30 hadoŭ.

Adnak hrandyjoznaje budaŭnictva razhortvajecca na fonie składanaj ekanamičnaj situacyi. Krytyki prajekta źviartajuć uvahu na rost zamiežnaha doŭhu Jehipta, jaki pieravysiŭ 160 miljardaŭ dalaraŭ, i vykazvajuć sumnievy ŭ tym, ci apraŭdanyja takija vydatki.

Isnuje taksama skiepsis adnosna taho, nakolki chutka novaja transpartnaja arteryja zmoža realna palehčyć žyćcio zvyčajnych rabočych, pakul Novaja administracyjnaja stalica jašče nie zasielenaja i znachodzicca ŭ stadyi aktyŭnaj razbudovy. Ułady raźličvajuć, što ŭ budučyni tam buduć žyć kala 6,5 miljona čałaviek i budzie stvorana kala dvuch miljonaŭ pracoŭnych miescaŭ.

U Alstom nazyvajuć adkryćcio manarejki važnym krokam na šlachu da realizacyi jehipieckaj stratehii raźvićcia «Vision 2030». Kampanija adznačaje, što 98% supracoŭnikaŭ prajekta byli hramadzianami Jehipta, a atrymany vopyt moža stać prykładam dla inšych haradoŭ Afryki, jakija taksama sutykajucca z prablemami pierahružanych daroh i patrebaj u ekałahičnym hramadskim transparcie. Alstom užo pracuje nad padobnymi prajektami ŭ Maroka, Kot-dJIvuary, Ałžyry i Paŭdniova-Afrykanskaj Respublicy. 

• 0
• 0
• 0
• 0
• 0
• 0
• 0
• 0