Šeści pratestu suprać Trampa ŭznačalili žančyny, a suśvietnyja lidary zamierli ŭ čakańni

Sotni tysiač ludziej pratestavali ŭ Vašynhtonie, Łos-Anželesie, Ńju-Jorku, Čykaha. Manifiestacyi adbylisia taksama ŭ inšych haradach ZŠA i śvietu, paviedamlajuć ŚMI.

Ź inicyjatyvaj maršaŭ pratestu vystupili žanočyja aktyvistki, ale pratest padtrymali i mužčyny.

Pavodle acenak ŚMI, marš pratestu ŭ Vašynhtonie sabraŭ bolš udzielnikaŭ, čym inaŭhuracyja.

Rejtynh papularnaści Trampa zastajecca na ŭzroŭni kala 40% — heta najnižejšy siarod prezidentaŭ ZŠA na momant ustupleńnia na pasadu ad 1970-ch. Dla paraŭnańnia: rejtynh Abamy ŭ časie inaŭhuracyi składaŭ kala 70%.

Pratestoŭcy zaścierahali Trampa ad parušeńnia pravoŭ čałavieka i krytykavali jaho za «jazyk biez kaściej». Tysiačy samarobnych płakataŭ nahadvali pra jahonyja hrubyja vykazvańni pra žančyn, asudžali jahonaje niežadańnie raskryć svaju dekłaracyju ab dachodach.

Siarod udzielnikaŭ maršaŭ byli i biełarusy, što žyvuć u Amierycy.

Rytoryka Trampa vyklikała zaniepakojenaść jak libieralnych, tak i kansiervatyŭnych kołaŭ u ZŠA i Jeŭropie, a taksama kiraŭnictva Kitaja.

Tramp dekłaravaŭ namier kiravać z pazicyi «Amieryka pieradusim». Pakolki havorka idzie pra vialikuju dziaržavu, heta tryvožna nahadała mnohim hitlerski łozunh «Dojčland uber ales».

Siarod inšaha, Tramp maje namier abmiežavać dostup tavaraŭ z Kitaja, Mieksiki i Jeŭropy na amierykanski rynak, što moža vyklikać łancuhovuju reakcyju — handlovyja vojny, abvał valut i niepradkazalnyja nastupstvy. 

Tramp taksama ź nie da kanca zrazumiełych pryčyn abrynuŭsia z krytykaj na Jeŭrapiejski Sajuz i kanclerku Niamieččyny Anhiełu Mierkiel. U toj ža čas jon davoli pryjazna vykazvaŭsia pra Uładzimira Pucina i namiakaŭ na hatoŭnaść pryznać za Rasijaj prava na svaju zonu ŭpłyvu. 

Papa Francišak zaklikaŭ nie śpiašacca z vysnovami z nahody abrańnia Donalda Trampa, a pačakać, što jon budzie rabić. U toj ža čas Papa pieraściaroh jeŭrapiejcaŭ ad papulizmu ŭ palitycy, nahadaŭšy pra pamyłki, jakija byli zroblenyja ŭ 1930-ch hadach, kali ludzi šukali «vyratavalnika», jaki vyrašyć ekanamičnyja i palityčnyja prablemy. «Hitler nie skraŭ ŭładu, jaje addaŭ jamu ułasny narod, jaki jon potym źniščyŭ», — skazaŭ Francišak.

Kanclerka Niamieččyny Anhieła Mierkiel, jakaja słavicca svajoj strymanaściu, u subotu paabiacała šukać z Trampam kampramisaŭ.

«U svajoj inaŭhuracyjnaj pramovie jon jasna pakazaŭ svaje pierakanańni», — skazała Mierkiel na nastupny dzień paśla taho jak Tramp paabiacaŭ kiravać zhodna z pryncypam «Amieryka pieradusim».

Mierkiel skazała: «Ja dźvie rečy skažu nakont hetaha [pramovy Trampa]: pa-pieršaje, ja ćviorda pierakananaja, što dla ŭsich nas najlepš pracavać razam na asnovie praviłaŭ, supolnych kaštoŭnaściej i sumiesnych dziejańniaŭ u mižnarodnaj ekanamičnaj sistemie, mižnarodnaj handlovaj sistemie i ŭnosić uniosak u vajskovyja sajuzy». Jana dadała: «I pa-druhoje, transatłantyčnyja adnosiny ŭ nastupnyja hady buduć nie mienš važnyja, čym u minułyja. I ja nad hetym budu pracavać. Navat kali pohlady roźniacca, kampramisy i rašeńni lahčej znachodzić, kali adbyvajecca pavažlivy abmien idejami».

• 0
• 0
• 0
• 0
• 0
• 0
• 0
• 0