Łukašenka zahadaŭ prapisać u padručnikach stanaŭleńnie Biełarusi ad časoŭ Połacka: «Heta zdarovy nacyjanalizm»
Historyju stanaŭleńnia biełaruskaj dziaržavy treba dakładna adlustravać u novych padručnikach. Takoje daručeńnie daŭ Alaksandr Łukašenka padčas naviedvańnia Respublikanskaha navukova-praktyčnaha centra transpłantacyi orhanaŭ i tkanak.
Znajomiačysia z raspracoŭkami, vystaŭlenymi ŭ 2016 hodzie na suiskańnie Dziaržaŭnaj premii ŭ halinie navuki i techniki, Łukašenka zacikaviŭsia cykłam navukovych prac «Vytoki biełaruskaj dziaržaŭnaści: Połackaja i Viciebskaja ziemli ŭ IX — XVIII stahodździach». U ich pa-novamu raskryvajecca praces farmavańnia terytoryj uschodniesłavianskich rańniedziaržaŭnych utvareńniaŭ i ich centraŭ.
Jak raspaviała zahadčyca centra archieałohii i staražytnaj historyi Biełarusi Instytuta historyi Nacyjanalnaj akademii navuk Volha Laŭko, praviedzienyja daśledavańni pakazali, što biełaruskaja dziaržaŭnaść pačała farmavacca ŭ siaredzinie IX stahodździa — sa stvareńniem Połackaj ziamli. Stanaŭleńnie Połacka ŭ jakaści centra dadzienaha dziaržaŭnaha ŭtvareńnia ažyćciaŭlałasia na miascovaj plemiannoj asnovie, u toj čas jak u Noŭharadzie i Kijevie dla hetaha zaprašali varahaŭ. Navat u dalejšym Połackija ziemli, uvachodziačy ŭ skład Vialikaha kniastva Litoŭskaha i Rečy Paspalitaj, raźvivalisia aŭtanomna.
Alaksandr Łukašenka skazaŭ, što siońnia idzie praca nad novymi padručnikami i hetyja momanty stanaŭleńnia biełaruskaj dziaržavy ŭ ich abaviazkova treba adlustravać. «Treba prapisać i ŭkaranić u rozumy našych ludziej praŭdu, — padkreśliŭ jon. — Tut kali i jość niejki nacyjanalizm, to heta nacyjanalizm zdarovy».
Kiraŭnik dziaržavy taksama pravioŭ paralel z sučasnaściu. «My sapraŭdy siabie stvaryli, i z nami ličylisia tady. Usio heta suhučna i aktualna ciapier, — źviarnuŭ uvahu Alaksandr Łukašenka. — Siońnia niekatoryja pad vyhladam «darmajedstva», jašče niečaha sprabujuć hety čovien razhajdać i dakazać nam, što heta nie našy ziemli, a čyjeści. Tamu dla nas heta vielmi aktualna. «Darmajedy» pavinny viedać, što ich prosta sprabujuć siońnia vykarystoŭvać u samych karyślivych metach, kab razburyć toje, što jość, źniščyć na korani toje, što my adradzili, kab nie dać nam zamacavacca. I jany buduć vykarystoŭvać usio».
Ciapier čytajuć
Biełaruska adnačasova mieła dva hramadzianstvy — ale daviedałasia pra heta tolki ŭ 21 hod. Jak tak vyjšła?7
Biełaruska adnačasova mieła dva hramadzianstvy — ale daviedałasia pra heta tolki ŭ 21 hod. Jak tak vyjšła?
«Mama, davaj napišam zajavu ŭ milicyju, jon mianie ŭžo dastaŭ». Maci školnika z Bresta, jaki skončyŭ žyćcio samahubstvam, raskazała pra ckavańnie syna1919
Kamientary