Kiraŭnik MZS Hiermanii raspavioŭ, navošta sustrakaŭsia z Łaŭrovym i jakija temy abmiarkoŭvali
«Ź siabrami nie treba vieści pieramovy, z praciŭnikami — treba».
Ministr zamiežnych spraŭ Hiermanii Johan Vadeful niečakana sustreŭsia ŭ Ńju-Jorku z kiraŭnikom rasijskaha MZS Siarhiejem Łaŭrovym. Razmova praciahvałasia kala 20 chvilin. Heta była pieršaja dvuchbakovaja sustreča kiraŭnikoŭ MZS Hiermanii i Rasii paśla pačatku poŭnamaštabnaha rasijskaha ŭvarvańnia va Ukrainu.
Baki pa-roznamu apisvajuć, jak udałosia arhanizavać razmovu.
Vadeful raskazaŭ u intervju Tagesthemen, što pasrednikami vystupili pradstaŭniki trecich krain: «Da mianie źviarnulisia šmatlikija kalehi ź inšych krain i paviedamili, što Rasija hatovaja da razmovy». Rasijski bok śćviardžaje, što Bierlin zapytaŭ jaje ŭ apošni momant.
Vadeful patłumačyŭ, što nie choča pakidać usie kantakty z Maskvoj vyklučna amierykancam. Pry hetym jon adchiliŭ mierkavańnie, što sustreča aznačaje źmienu niamieckaj palityki:
«Ź siabrami nie treba vieści pieramovy, z praciŭnikami — treba. Heta adzin z asnoŭnych pryncypaŭ zamiežnaj palityki».
Pra što havaryli
Pavodle kiraŭnika niamieckaj dypłamatyi, padčas sustrečy abmierkavali try hałoŭnyja temy: ekspart ukrainskaha i rasijskaha zbožža, ataku bieśpiłotnika ŭ aeraporcie Lejpcyh/Hale i vajnu va Ukrainie.
Vadeful źviarnuŭ uvahu na nieabchodnaść zabiaśpiečyć pastaŭki zbožža krainam Hłabalnaha Poŭdnia. Pavodle jaho, Jehipiet atrymlivaje z Ukrainy kala traciny nieabchodnaha jamu zbožža, a zryŭ ekspartu stvaraje pahrozu hoładu.
Druhoj temaj staŭ bieśpiłotnik z vybuchoŭkaj, znojdzieny ŭ žniŭni kala ŭkrainskaha transpartnaha samalota ŭ aeraporcie Lejpcyh/Hale. Niamieckija ŭłady ličać Rasiju adkaznaj za sprobu dyviersii, Maskva svaju datyčnaść admaŭlaje.
«Miaža była pierakročanaja. My čakajem, što heta nie paŭtorycca, i ŭ luby momant hatovyja adreahavać», — zajaviŭ Vadeful.
Jon taksama zapeŭniŭ Łaŭrova, što padtrymka Ukrainy z boku Hiermanii zastajecca «całkam niaźmiennaj», a ekanamičny cisk na Rasiju budzie praciahvacca.
U intervju ZDF niamiecki ministr asobna padkreśliŭ, što nie abmiarkoŭvaŭ z Łaŭrovym budučyniu Ukrainy biez udziełu Kijeva:
«Ja nie viadu pieramoŭ pra Ukrainu — heta robiać sami ŭkraincy. Ja zaklikaju Rasiju razmaŭlać z Ukrainaj».
Vadeful zajaviŭ, što prapanavaŭ Łaŭrovu pajści na deeskałacyju, ale «pakul nie byŭ pačuty». Pavodle jaho, Rasija ciapier nie demanstruje hatoŭnaści zaniać kanstruktyŭnuju pieramoŭnuju pazicyju.
Łaŭroŭ taksama zajaviŭ, što sustreča nie pryniesła prahresu. U razmovie z ahienctvam DPA jon skazaŭ:
«Kali pahladzieć na štodzionnyja publičnyja zajavy Bierlina, ja nie pačuŭ ničoha inšaha».
Pavodle Łaŭrova, Vadeful moh prosta patelefanavać jamu i prapanavać pračytać raniejšyja zajavy niamieckaha ŭrada.
Vadeful, niahledziačy na adsutnaść vyniku, nazvaŭ razmovu nieabchodnaj:
«Heta zadača ministerstvaŭ zamiežnych spraŭ i dypłamatyi — razmaŭlać navat tady, kali pamiž bakami jość fundamientalnyja supiarečnaści».
Mahčymaść nastupnych kantaktaŭ, pavodle niamieckaha ministra, ciapier zaležyć najpierš ad Maskvy: Bierlin hatovy praciahvać dyjałoh, kali Rasija pačnie kanstruktyŭna abmiarkoŭvać spynieńnie vajny suprać Ukrainy.
23‑hadovaha aficera bryhady śpiecnaza asudzili na 19 hadoŭ za «zdradu dziaržavie»17
23‑hadovaha aficera bryhady śpiecnaza asudzili na 19 hadoŭ za «zdradu dziaržavie»
Dziaržbiaśpieka Litvy: «Naš dom» Karač štučna stvaraje ŭmovy, kab biełarusy, što nie adpaviadajuć kryteryjam mižnarodnaj abarony, atrymlivali VNŽ u Litvie4242
Dziaržbiaśpieka Litvy: «Naš dom» Karač štučna stvaraje ŭmovy, kab biełarusy, što nie adpaviadajuć kryteryjam mižnarodnaj abarony, atrymlivali VNŽ u Litvie42
«Ludzi kamientavali, što salmanieła ŭvajšła ŭ čat». Biełarus pajechaŭ pracavać u Kremnijevuju dalinu — i staŭ kulinarnym błohieram na 28 miljardaŭ prahladaŭ88
Kamientary