U kancy kastryčnika 2017 hoda słavuty biełaruski chareohraf ažyćciavić u Nacyjanalnym opiernym teatry novuju redakcyju baleta «Spartak», u pačatku listapada vystupić režysioram kancerta «Zorki suśvietnaha i biełaruskaha baleta». Paśla sychodu Jelizarjeva z teatra heta budzie jaho pieršaje supracoŭnictva z kalektyvam, jaki jon uznačalvaŭ doŭhija hady.
30 kastryčnika 2017 hoda narodny artyst Biełarusi i SSSR Valancin Jelizarjeŭ adznačyć svoj 70-hadovy jubilej. Adznačyć hetuju datu vyrašyli na vysokim uzroŭni. Siońnia, 15 sakavika, u Ministerstvie kultury prajšło pieršaje pasiadžeńnie arhkamiteta, pryśviečanaje jubileju. Vioŭ pasiadžeńnie ministr kultury Barys Śviatłoŭ. Było vyrašana, što Jelizarjeŭ ažyćciavić u Opiernym novuju redakcyju svajho baleta «Spartak».
Jak raspavioŭ Valancin Jelizarjeŭ, pry hetym kancepcyja śpiektakla zastaniecca raniejšaj, bo «pastanoŭka adbyłasia». Pry hetym chareohraf płanuje ŭvod u balet novych vykanaŭcaŭ, a taksama niekatoryja źmieny ŭ chareahrafii. Nahadajem, što premjera «Spartaka» adbyłasia ŭ 1980 hodzie. Z taho času jon bieź pierapynkaŭ idzie ŭ repiertuary, staŭ vizitnaj kartkaj teatra i pabyvaŭ na hastrolach bolš čym u 20 krainach śvietu. Akramia taho, 2 listapada na scenie Opiernaha adbudziecca kancert «Zorki suśvietnaha i biełaruskaha baleta». Aŭtaram scenaryja i režysioram vystupić sam Jelizarjeŭ.
Na pytańnie, ci płanuje teatr zaprašać chareohrafa dla inšych pastanovak, Jelizarjeŭ adkazaŭ, što takoje pytańnie nie ŭzdymałasia. Na pasiadžeńni arhkamiteta abmiarkoŭvaŭsia tolki jaho jubilej.
Cikava, što jašče ŭ lipieni minułaha hoda ŭ adras Alaksandra Łukašenki byŭ nakiravany list ad vialikaha savieckaha i rasijskaha chareohrafa Juryja Hryharoviča. Adrasat paprasiŭ kiraŭnika dziaržavy viarnuć Jelizarjeva ŭ Opierny teatr. Adkazu atrymana nie było, ale ŭ listapadzie 2016-ha list Hryharoviča apublikavała «Narodnaja Vola». Pa infarmacyi TUT.BY, viartańnie Jelizarjeva mahło być źviazana mienavita z reakcyjaj na tuju publikacyju. Zrešty, jak paćvierdziŭ Valancin Mikałajevič, siabry arhkamitetu nie rabili sakretu z taho, što vykonvajuć daručeńnie prezidenta.
Nahadajem, što ŭ 1973 hodzie 26-hadovy Jelizarjeŭ staŭ hałoŭnym baletmajstram Biełaruskaha akademičnaha teatra opiery i baleta, paźniej staŭ dyrektaram — mastackim kiraŭnikom baletnaj trupy. Jelizarjeŭ zrabiŭ biełaruski balet viadomym va ŭsim śviecie. U 1996-m Valancin Mikałajevič byŭ udastojeny zvańnia «Lepšy chareohraf hoda» i premii Benois de la Danse, zasnavanaj Mižnarodnaj asacyjacyjaj tanca, za chareahrafiju baleta «Straści (Rahnieda)».
Jelizarjeŭ syšoŭ z kalektyvu ŭ 2009 hodzie. Tady zaviaršałasia rekanstrukcyja Teatra opiery i baleta. Płanavałasia, što Jelizarjeŭ zojmie pasadu dyrektara Nacyjanalnaha teatra opiery i baleta. Ale jamu była prapanavanaja tolki staŭka «hałoŭnaha baletmajstra». Jak raspaviadaŭ chareohraf, jon paličyŭ, što heta «kryŭdnaje zaprašeńnie ŭ majo junactva», bo Jelizarjeŭ pačynaŭ pracu ŭ teatry z hetaj pasady.
Tłumačačy svaju pazicyju, Jelizarjeŭ adznačyŭ, što admoviŭsia ad pasady hałoŭnaha baletmajstra śviadoma: «Tvorčaść, vytvorčaść i hrošy isnujuć nieparyŭna — heta ja zrazumieŭ daŭno. Ty pavinien viedać, što płanavać na budučyniu, jakija resursy ŭ ciabie jość. Kali heta ŭsio znachodzicca ŭ roznych rukach, tady ničoha tałkovaha zrabić nielha». Z taho času Opierny teatr bolš nie supracoŭničaŭ z chareohrafam.
Akramia pastanoŭki «Spartaka» i kancertu zorak suśvietnaha baleta da jubileju Jelizarjeva zapłanavanyja i inšyja mierapryjemstvy. 30 sakavika ŭ 17.00 u Mastackaj halerei «Univiersitet kultury» (Kastryčnickaja płošča, 1 — na terytoryi Pałaca Respubliki) adkryjecca vystava «Valancin Jelizarjeŭ. Repartaž z hetaha času». Pracy fatohrafa Mikity Fiadosika pakažuć chareohrafa padčas pracy z artystami i studentami, a taksama ŭ inšych žyćciovych situacyjach. Uvachod na vystavu, jakaja budzie pracavać da 13 krasavika, svabodny.
Taksama płanujecca vydańnie novaj knihi daśledčycy Julii Čurko, pryśviečanaj tvorčaści Jelizarjeva. Na biełaruskim i rasijskim telebačańni vyjduć novyja filmy, jakija raskažuć pra jaho tvorčaść.
-
U Homielskim dramatyčnym teatry — kadravyja čystki. Znoŭ praz «palityku»
-
«Budzie śmiešna i baluča»: «Kupałaŭcy» prezientujuć zaŭtra novy śpiektakl. U hałoŭnych rolach — Manajeŭ, Biełachvościk, Harcujeva
-
«Rašeńnie pryjšło zvonku». Što adbyvajecca ŭ viciebskim teatry, dzie ŭ śpiektakli prahučała «Žyvie Fłandryja!» i pačałasia čarada zvalnieńniaŭ?
Ciapier čytajuć
U Maskvie mužčyny masava sprabujuć znajomicca, macajučy dziaŭčat za jahadzicy. Tak zahadaŭ rabić seks-koŭč ź Biełarusi8
Kamientary