Načalnik Hienštaba vykazaŭsia pra «Zachad-2017»: zhadaŭ «Pravy siektar», papraknuŭ NATA, paabiacaŭ vyvad rasijskich vojskaŭ
Ministerstva abarony praviało 29 žniŭnia bryfinh dla ŚMI i zamiežnaha dypłamatyčnaha korpusa, na jakim namieśnik ministra abarony — načalnik Hienieralnaha štaba Aleh Biełakonieŭ vystupiŭ z tłumačeńniem pra sumiesnyja z Rasijaj vučeńni «Zachad-2017».
Biełakonieŭ budzie kiravać biełaruskaj hrupoŭkaj vojskaŭ. Farmat sustrečy nie praduhledžvaŭ pytańniaŭ z zały, vystupaŭ tolki hienierał-major.
Napačatku Biełakonieŭ źviarnuŭ uvahu na niaprostuju vajenna-palityčnuju situacyju ŭ rehijonie.
«Kala našych zachodnich miežaŭ stvoranyja pieradavyja centry NATA, kolkaść sił pavialičana z 25 da 40 tysiač. Čatyry taktyčnyja hrupy pryviedzienyja ŭ hatoŭnaść, u Polščy raźmieščanaja tankavaja bryhada ZŠA. Kala 8 tysiač sałdat, 72 tanki, 250 bajavych mašyn, 16 haŭbic, 17 viertalotaŭ. Idzie zasvajeńnie novaha teatra vajennych dziejańniaŭ, kolkaść vučeńniaŭ pavialičyłasia ŭ dva razy, a kolkaść vojskaŭ pavialičyłasia ŭ čatyry razy», — skazaŭ jon.
Admietnaj była zaklučnaja fraza apisańnia NATAŭskich sił i mienieŭraŭ: «Biełaruś nie bačyć u hetym pahrozy nacyjanalnaj biaśpiecy i stavicca adekvatna», — skazaŭ Biełakonieŭ.
«Ale nam niajasny ažyjataž u suviazi z vučeńniami Zachad-2017. Naprykład, «Anakonda» była bujniejšym vučeńniem z časoŭ zakančeńnia chałodnaj vajny. I ŭsie pakazčyki «Anakondy» pa kolkaści vojskaŭ i techniki pieravyšajuć vučeńni ŭ Biełarusi ŭ dva razy. Vučeńni nie nasili siabroŭski charaktar: była zadziejničana raźviedka, viałasia adpracoŭka zadač nastupalnaj tematyki. Ale takoha ažyjatažu nichto nie ŭzdymaŭ», — skazaŭ jon.
«Ale Biełaruś nie vykazvała paprokaŭ u ahresiŭnaści, my stavimsia da hetaha, jak da elemientu padrychtoŭki vojskaŭ. Čamu adzin bok bačyć u hetym niehatyŭ, a inšy — nie? Nieadekvatna reahavać na vučeńni nie zusim pravilna. U paŭnočnaj častcy Rovienskaj vobłaści «Pravy siektar» płanuje raźmiaścić atrady z metaj niedapuščeńnia ŭvarvańnia ŭzbrojenych sił RF u čas «Zachadu-2017». Heta zdajecca śmiešnym, my reahujem spakojna. Kali našyja vojski znachodziacca na vučeńniach u Rasii, to nichto ž nie prahnazuje mifičnuju akupacyju rasijskich terytoryj, jak heta padajecca asobnymi analitykami ŭ dačynieńni Biełarusi», — zakranuŭ temu asnoŭcych aściaroh hramadskaści Biełakonieŭ.
«Ja čytaŭ analitykaŭ hetak zvanych, nibyta my źbirajemsia raźviazać vajnu z usimi susiedziami, a Rasija dla hetaha stvaraje nastupalnuju hrupoŭku na našaj terytoryi. Nahodaj dla hetaha staŭ adkryta apublikavany dziaržzakaz pa abjomie vajennych pieravozak u 4162 vahony.
Čatyry tysiačy vahonaŭ heta paŭtary motastrałkovyja dyvizii. Ja b hlanuŭ na taho dziejača, jaki vyrašyŭ b ździejśnić akupacyju takimi siłami.
Jon by ŭvajšoŭ u knihu rekordaŭ Hiniesa jak sumasbrod i avanturyst», — skazaŭ hienierał-major.
Jaki budzie płan vučeńniaŭ?
U asnovu siužeta prakładziena «ŭzrastańnie aktyŭnaści mižnarodnych sieparatysckich arhanizacyj, što majuć źniešniuju padtrymku».
Čytajcie taksama:
«Viejšnoryja», «Viesbaryja» i «Łubienija» napadajuć na Biełaruś i Rasiju — scenar vučeńniaŭ «Zachad-2017»
Admietna taksama, što bolšaść palihonaŭ, abranych dla vučeńniaŭ, znachodziacca daloka ad miežaŭ krain ES.
Taksama Biełakonieŭ paabiacaŭ, što paśla vučeńniaŭ usia rasijskaja technika i žyvaja siła da 30 vieraśnia pakinie terytoryju Biełarusi.
Ciapier čytajuć
Były viadučy BT, jaki zvolniŭsia ŭ 2020-m i vyjechaŭ u Słavakiju, raskazaŭ, jak žyvie ciapier2
Kamientary