Padčas sudovaha pasiadžeńnia Vyšejšaha antykarupcyjnaha suda pa abrańni miery strymańnia byłomu kiraŭniku Ofisa prezidenta Andreju Jermaku 13 maja stała viadoma imia asoby «Vieranika Fenšuj Ofis». Ź joj tahačasny kiraŭnik OP, vierahodna, raiŭsia nakont pryznačeńniaŭ na vyšejšyja dziaržaŭnyja pasady. Pavodle słoŭ prakurora Śpiecyjalizavanaj antykarupcyjnaj prakuratury, heta — Vieranika Anikijevič. Sud zabaraniŭ Jermaku razmaŭlać ź joju.
«Schiemy» vyśvietlili, što heta 51‑hadovaja žycharka Kijeva Vieranika Anikijevič, jakaja nazyvaje siabie kansultantkaj pa astrałohii. U sacsietkach jana aktyŭna vykazvałasia ŭ padtrymku Andreja Jermaka, a ŭ kantaktach karystalnikaŭ zapisanaja jak «Vieronika Konsult. A.B.» i «Veronika Anikievich/hadałka Jermak».
Vieranika Anikijevič, jana ž Vieranika Danilenka (takoje proźvišča maje adna ź jaje svajačak), nazyvaje siabie aŭtarkaj telehram-kanała «Łunnyje časy». Jana adznačaje, što kansultuje pa astrałohii: «dapamahaju ludziam znajści jasnaść u temie ich žyćciovych pracesaŭ». Zhodna ź jaje reziume, jana skončyła Chiersonski dziaržaŭny techničny ŭniviersitet pa śpiecyjalnaści «finansavy analiz, kantrol i mieniedžmient».
Žurnalisty znajšli jaje akaŭnt u fejsbuku i praanalizavali kamientary ŭ telehram-čatach. Paviedamleńnie Jermaku pra padazreńnie jana prakamientavała jak «śpiecapieracyju Trampa-Pucina pa kapitulacyi Ukrainy» i nazvała NABU i SAP «padonkami», jakija «pradalisia ruskim». Pry hetym jana zajaŭlała, što na ich fonie «Ziela» (prezident Zialenski) vyhladaje «ź nimbam i kryłami za śpinaj».
«Schiemy» taksama ŭstanavili nastupnyja fakty: u 2015 hodzie Anikijevič jeździła ŭ Krym, a jaje baćka Fiodar Anikijevič — hramadzianin RF.
U 2015 hodzie jon uznačalvaŭ rajonnaje adździaleńnie «Apazicyjnaha błoka» ŭ Hieničesku i zajaŭlaŭ, što mužčyny ŭciakajuć ad vajenkamataŭ, a jaho adnapartyjcy «z pavahaj staviacca da Rasii».
Miarkujučy pa fota za maj 2025 hoda, dzie jon paziruje z hieorhijeŭskimi stužkami i ściahami RF, jon praciahvaje žyć u akupavanym Hieničesku.
«Schiemy» źviarnulisia pa kamientar da Vieraniki Anikijevič, ale paśla pradstaŭleńnia žurnalistki taja pakłała słuchaŭku.
12 traŭnia prakuror SAP Valancina Hrabianiuk zajaviła ŭ sudzie, što były kiraŭnik Ofisa prezidenta, vierahodna, byŭ datyčny da peŭnych pryznačeńniaŭ na vysokija dziaržaŭnyja pasady. Pavodle jaje słoŭ, jon abmierkavaŭ heta z čałaviekam, jaki ŭ kantaktach padpisany jak «Ofis Vieraniki Fenšuj». U pryvatnaści, jon dasłaŭ hetaj asobie danyja ab datach naradžeńnia kandydataŭ i paprasiŭ kansultacyi.
Jermaka ŭziali na 2 miesiacy pad aryšt, ale jon moža vyjści pad zakład sumaj bolš za try miljony dalaraŭ. Jarmak prachodzić pa spravie ab lehalizacyi 460 miljonaŭ hryŭniaŭ na elitnym budaŭnictvie ŭ Kozinie pad Kijevam (2021—2025 hady). Śledstva ličyć, što hrošy byli «admytyja» praz uźviadzieńnie katedžnaha haradka na 8 hiektarach. Sam Jarmak ličyć abvinavačańni nieabhruntavanymi.
Ciapier čytajuć
Kupla kvatery praz kaapieratyŭ zamiest ipateki: jak pracuje sistema, padobnaja da piramidy, i što kažuć udzielniki i ekśpiert3
Kamientary