«Uklučycie śviatło». Kubincy pratestujuć suprać uładaŭ na fonie poŭnaha błekaŭtu

Raniej ministr enierhietyki Kuby Visente de ła O Levi zajaviŭ, što na vostravie całkam skončylisia mazut i dyzielnaje paliva, z-za čaho enierhasistema akazałasia ŭ «krytyčnym stanie».

U niekatorych rajonach Havany elektryčnaści niama pa 20—22 hadziny ŭ sutki.

Na hetym fonie ZŠA ŭ sieradu znoŭ prapanavali Kubie humanitarnuju dapamohu ŭ pamiery 100 miljonaŭ dalaraŭ — u abmien na «istotnyja reformy kamunistyčnaj sistemy vostrava».

Situacyja rezka pahoršyłasia paśla studzienia, kali prezident ZŠA Donald Tramp, jaki nieadnarazova zajaŭlaŭ pra namier dabicca źmieny kamunistyčnaha ŭrada Kuby, uzmacniŭ embarha i pryhraziŭ pošlinami krainam, jakija pastaŭlajuć vostravu paliva.

Prezident Kuby Mihiel Dyjas-Kanel 13 maja napisaŭ u sacsietkach, što pryčynaj enierhietyčnaha kryzisu źjaŭlajucca dziejańni ZŠA, pryznaŭšy pry hetym, što situacyja na vostravie «asabliva napružanaja».

«U hetaha dramatyčnaha paharšeńnia jość adna pryčyna — hienacydnaja enierhietyčnaja błakada, jakoj Złučanyja Štaty padviarhajuć našu krainu, pahražajučy iracyjanalnymi taryfami luboj dziaržavie, jakaja pastaŭlaje nam paliva», — zajaviŭ jon.

Zvyčajna Kuba zaležała ad pastavak nafty ź Vieniesueły i Mieksiki dla svaich naftapierapracoŭčych zavodaŭ. Adnak abiedźvie krainy ŭ značnaj stupieni spynili pastaŭki paśla taho, jak prezident ZŠA Donald Tramp pryhraziŭ pošlinami dziaržavam, jakija adpraŭlajuć paliva na vostraŭ.

Dva dni tamu Tramp abjaviŭ, što Kuba «cierpić krach» i sama paprasiła ab pieramovach, adnak nijakich kankretnych detalaŭ nie pryvioŭ.

Hienieralny sakratar AAN Antoniu Huteryš zaklikaŭ baki da «źmiastoŭnaha dyjałohu», padkreśliŭšy, što vajennaha rašeńnia kryzisu nie isnuje.

Raniej u hetym miesiacy Tramp zajaŭlaŭ, što pry siłavym kanflikcie Złučanyja Štaty «praktyčna nieadkładna» voźmuć Kubu pad svoj kantrol.

Pratesty ŭspychnuli adnačasova ŭ niekalkich rajonach Havany.

«U nas žyvie šmat pažyłych ludziej, mnohija prykavanyja da łožka. Pradukty psujucca», — skazaŭ ahienctvu Reuters žychar stalicy Radolfa Ałonsa, jaki pracuje ŭ dziaržaŭnym siektary.

Pavodle jaho słoŭ, jon vyrašyŭ vyjści na akcyju paśla taho, jak jahony rajon Płaja zastavaŭsia biez elektryčnaści bolš za 40 hadzin.

«My pačali hrukać kastrulami prosta dziela taho, kab nam dali choć by try hadziny śviatła. Nam bolš ničoha nie treba. Heta nie palityčny pratest», — skazaŭ jon.

Žurnalisty Reuters paviedamlajuć, što ŭ niekalkich vypadkach bačyli, jak elektryčnaść viartałasia mienavita ŭ tyja rajony, dzie prachodzili akcyi. Paśla hetaha natoŭpy mužčyn, žančyn i dziaciej apładziravali i chutka razychodzilisia.

Na miescach dziažuryli ŭzmocnienyja narady palicyi, adnak siłaviki ŭ asnoŭnym nazirali zboku i nie ŭmiešvalisia.

Raniej u toj ža samy dzień ministr enierhietyki i hornazdabyŭnaj pramysłovaści Kuby zrabiŭ zajavu.

«U nas zusim niama ni mazutu, ni dyziela. Reziervaŭ nie zastałosia. Adzinaje, što ŭ nas jość, — heta haz z našych radoviščaŭ, dzie zdabyča vyrasła», — skazaŭ Visente de ła O Levi ŭ efiry dziaržaŭnaha telebačańnia.

Pavodle jaho słoŭ, adklučeńni elektryčnaści, jakija praciahvajucca pa 20‑22 hadziny ŭ sutki, jašče macniej abastryli napružanaść u horadzie, i tak zmučanym niedachopam ježy, paliva i lekaŭ.

Balnicy na Kubie ŭžo nie mohuć pracavać u narmalnym režymie, škoły i dziaržaŭnyja ŭstanovy vymušanyja zakryvacca. Kryzis udaryŭ i pa turyźmie — adnoj z klučavych halin kubinskaj ekanomiki.

Na minułym tydni dziaržsakratar ZŠA Marka Rubia zajaviŭ, što ŭłady Kuby admovilisia ad amierykanskaj humanitarnaj dapamohi na sumu 100 miljonaŭ dalaraŭ. Havana heta abvinavačańnie advierhła.

U sieradu Dziarždepartamient ZŠA znoŭ paćvierdziŭ hatoŭnaść akazać dapamohu, udakładniŭšy, što raźmierkavać jaje płanujecca pry kaardynacyi z Katalickaj carkvoj i «nadziejnymi» humanitarnymi arhanizacyjami.

«Rašeńnie zastajecca za kubinskim režymam: pryniać našu prapanovu dapamohi abo admovicca ad žyćciova važnaj padtrymki i ŭ kančatkovym vyniku nieści adkaznaść pierad kubinskim narodam za pieraškodu krytyčna nieabchodnaj dapamozie», — havorycca ŭ zajavie.

Cisk Vašynhtona na Kubu ŭzmacniŭsia ŭ pačatku maja, kali ZŠA ŭviali novy pakiet sankcyj suprać vysokapastaŭlenych kubinskich čynoŭnikaŭ, abvinavaciŭšy ich u parušeńniach pravoŭ čałavieka.

Ministr zamiežnych spraŭ Kuby Bruna Radryhies nazvaŭ hetyja sankcyi niezakonnymi.

• 2
• 0
• 0
• 1
• 1
• 0
• 0
• 0