Repierka Hanna Zianievič (a.k.a Skali) — pra zakuliśsie batłaŭ, maciuki i rolu dziaŭčat u repie
Nie takija papularnyja, jak Versus Battle u Rasii, ale svaje placoŭki z batłami isnujuć i u nas. Siońnia najbolš aktyŭna batł-sustrečy ładziać na prastorach minskaha filijała ruskaha prajekta «Slovo» i Minsk Independent Battle, karani jakoha pačynajucca ŭ Biełarusi.
I kali na scenie MIB dziaŭčat pakul nie było, bo, pa słovach arhanizataraŭ, ad ich nie prychodziła zajavak. To na batłach «Słova» pra siabie zajavili ŭžo try ŭdzielnicy.
My sustrelisia z adnoj z najbolš viadomych ź ich — Hannaj Zianievič, jakaja sa studentki śpiecyjalnaści «Łahistyka» na «scenie» pieratvarajecca ŭ Skali, i raspytali pra ŭnutranuju atmaśfieru batłaŭ, maciuki, rolu dziaŭčat u repie i biełaruskuju movu na scenie.
Uvahu na Hannu my źviarnuli pierš-napierš tamu, što ŭ adnym ź nievialikich intervju jana kaliści pryznałasia, što piša vieršy na biełaruskaj movie. Mienavita z hetaha chobi, možna skazać, i pačaŭsia dalejšy šlach za kulisy rep-batłaŭ.
«Tak skłałasia, što ŭ maim žyćci było vielmi šmat biełaruskaha: ja ŭdzielničała i pieramahała ŭ rajonnych alimpijadach pa movie, naprykład. Čytała dosyć ajčynnaj litaratury i niepasredna vieršaŭ: Jaŭhienija Janiščyc, Nił Hilevič, Marjan Duksa, Vasil Zujonak — heta adny z samych lubimych aŭtaraŭ. Dumaju, tut skazaŭsia upłyŭ nastaŭnikaŭ, jany ŭ mianie byli cudoŭnyja», — raskazvaje Skali.
Razam z usim hetym bahažom u adnu nadzvyčaj čaroŭnuju vosień dziaŭčyna zapisała sama. U rodnych Ružanach, a paśla i ŭ Navahradku, dzie Hanna vučyłasia ŭ handlova-ekanamičnym kaledžy, jaje vielmi chutka pačali ŭsprymać jak paetku. A jak tolki ŭ Minsku ŭ 2016 hodzie abviaścili pra start pieršych batłaŭ filijała «Słova», siabry i znajomyja dziaŭčyny adrazu ž pačali padbivać jaje na toje, kab pryniać tam udzieł.
«Vieršy i rep — heta, kaniečnie, nie adno i toje ž, ale ja vyrašyła pasprabavać padać zajaŭku. Tym bolš, daŭno słuchała rep, hladzieła ŭsie ruskija batły. U pryncypie, amal kožny bolš-mienš upłyvovy repier pačynaŭ z paetyčnaha bekhraŭnda — siarod maich znajomych dyk dakładna tak».
Ad Hanny nie chavali, što spačatku jaje ŭziali na «Słova» u jakaści elemienta šou: usio ž daloka nie ŭsie ŭsprymajuć dziaŭčynak u hetaj śfiery surjozna. Adnak jana niečakana prajšła ŭ pieršy siezon.
Jaje sceničnaj Skali pryjšłosia adstojvać svaju hodnaść z charakternymi dla kultury batłaŭ maciukami i žorstkaściu. Ź inšaha boku, jak jašče reahavać, kali tabie čytajuć «Narmalnaja baba nie stanie siudy leźci, kali ciabie nie chočuć — zaprašajem u batlery!», ci što «Žanočy futboł, chakiej i žančyny-emsi — heta klinika».
Batł Skali i Robinwolf. AŚCIAROŽNA, NIECENZURNAJA LEKSIKA!
Batły z udziełam Skali hladziać i jaje svajaki, i nastaŭnicy, i znajomyja. Pakul ni ad kaho z darosłych jana nie čuła zaŭvah nakont aktyŭnaha vykarystoŭvańnia maciukoŭ u tvorčaści. Moładź ža, asabliva ziemlaki, u zachapleńni ad taho, što jana moža prajavić siabie na takoj placoŭcy.
«Da batłaŭ ja rychtujusia ciaham miesiaca: nam nazyvajuć imia apanienta, a ja pačynaju vyvučać jaho sacsietki, tvorčaść, kali jana jość, niejkija žyćciovyja situacyi. Vykarystoŭvaju ŭsiu mahčymuju infarmacyju pra supiernika. Padrychtoŭka ryfmaŭ da batłaŭ — heta kłasnaja mahčymaść nabić ruku ŭ składańni vieršaŭ», — raskazvaje pra praces Hanna.
Avenue vs Skali. AŚCIAROŽNA, NIECENZURNAJA LEKSIKA!
Chutka jaje čakaje čarhovy batł, ale ŭ novym, niezvyčajnym farmacie: u kancy listapada Skali sydziecca z Kaciaj Chałvoj — dziaŭčatam treba budzie nie abražać adna adnu, a ŭpieršyniu rabić kamplimienty.
Kacia Chałva, Jula Kapšaj i Hanna — heta pakul što try asnoŭnyja dziaŭčynki na prastory biełaruskich rep-batłaŭ.
Čamu ich tak niašmat? Hanna bačyć tut nastupnuju asnoŭnuju pryčynu:
«Kali pahladzieć na ZŠA ci Vialikabrytaniju navat, to tam užo daŭno niama hiendarnaha padziełu. Pahladzicie chacia b klipy Litł Simz, jakuju daŭno ŭspryniali i rep-supolnaść, i viadomyja łejbły. Adnak za miažoj tema chip-chopa raźvivajecca vielmi daŭno. Na postsavieckaj heta pačałosia tolki ŭ kancy 80-ch. I tolki zusim niadaŭna rep pryznali nie prosta muzykaj padjezdaŭ, a niečym, što moža być intelektualnym praduktam. Praŭda, daloka nie ŭsie tak ličać:
na moj pohlad, bolšaść našych dziaŭčat usprymaje rep jak niešta niepryhožaje, druhasnaje, niejki šłak, dzie im dakładna nie miesca. Chacia ŭžo jość vyklučeńni.
Ajza, Emieleŭskaja, Mozee Montana i Maša Hima ŭ Rasii jaskrava demanstrujuć, što rep moža być roznym, a hałoŭnaje — jon moža być mocnym jak vykazvańnie, jak pratest», — tłumačyć Skalli.
Što tyčycca batłaŭ pa-biełarusku, to pra heta z samaha pačatku maryli arhanizatary Minsk Independent Battle Kanstancin Bajandzin i Uład Kazyra.
Adnak pakul nie skłałasia. «Batły pa-biełarusku — heta vialikaja adkaznaść s kulturnaj kropki hledžańnia. Na naš pohlad, leksika tam pavinna być «čystaj», biez moŭnych pamyłak. Na dadzieny momant, na žal, niama ŭdzielnikaŭ, jakija b mahli adbatlić na naležnym uzroŭni», — raspavioŭ «NN» Kanstancin.
Pradstaŭnik «Słova» Ihar Procharaŭ ščyra pryznajecca, što batłaŭ pa-biełarusku pakul nie płanujecca: «50% našych hledačoŭ na jutubie — heta žychary inšych krain, im ciažka było b usprymać kantent na niarodnaj movie».
Što tyčycca Skali, to jana kaža, što vielmi składana pieraklučycca ź miłahučnaha ŭsprymańnia biełaruskaj movy, jak heta atrymlivajecca ź jaje vieršami, da žorstkaści i ahresiŭnaści, jakich patrabujuć batły. Adnak jana nie vyklučaje, što ŭ jaje adnojčy atrymajecca napisać rep pa-biełarusku.
Pra hłabalnuju budučyniu Skali razvažaje nie vielmi pazityŭna:
«Ja nie baču pierśpiektyŭ. U industryi mała hrošaŭ: kali navat ajčynny šou-biznes słaba što ź siabie ŭjaŭlaje, što kazać pra rep. Spadziajusia, kali-niebudź u nas zrazumiejuć, što na hetym sapraŭdy možna zarablać. Znojducca ludzi, jakija vyvieduć heta ŭ biznes — i sprava pojdzie. Nichto jašče niekalki hadoŭ tamu nie dumaŭ, što Aksimiron pajedzie batlicca ŭ ZŠA, a pra heta buduć raskazvać nie tolki rasijskija, ale i biełaruskija ŚMI.
Praŭda, źjazdžać z krainy za chutkimi pierśpiektyvami ja nie chaču. Kali i raźvivać kulturu, to na miescy, našymi siłami. Kali źjeduć usie, to chto zastaniecca?».
Kamientary