Bolš patryjaršaha pradstaŭnika ŭ Biełaruskim ekzarchacie nie budzie?

Nie ŭsie naziralniki źviarnuli ŭ svoj čas uvahu na toje, što maskoŭski patryjarch Kirył, majučy ŭ Biełarusi svajho ekzarcha (namieśnika ŭ tym sensie, u jakim hetaje słova ŭžyvajecca ŭ ruskaj movie), u 2015 hodzie nakiravaŭ u našu krainu svajho admysłovaha pradstaŭnika, jakoha niekatoryja nazvali, na błatny manier, «smotriaŝim».

Pasadu pradstaŭnika patryjarcha Kiryła ŭ Biełaruskim ekzarchacie zaniaŭ davoli małady (naradziŭsia ŭ 1975 hodzie) ihumien Vasijan (Źmiejeŭ), kandydat bahasłoŭja, były prarektar pa vychavaŭčaj pracy Maskoŭskich duchoŭnych akademii i sieminaryi. Tyja, chto źviarnuŭ uvahu na pryjezd ihumiena Vasijana ŭ Minsk, źviazvali jaho pryznačeńnie na takuju ŭnikalnuju pasadu z zajavaj ekzarcha Paŭła ab patrebie bolšaj samastojnaści dla Pravasłaŭnaj Carkvy ŭ Biełarusi. Maŭlaŭ, manacha prysłali sačyć, kab Pavieł i tutejšyja archirei nie vykinuli jakoje kalenca.

I voś, 7 sakavika Sinod RPC vyrašyŭ vyzvalić ihumiena Vasijana ad pasady dy nakiravać jaho nastajacielem padvorja («pasłom») RPC u h. Safiju (Bałharyja). Hetuju pasadu były pradstaŭnik patryjarcha Kiryła ŭ Minsku budzie zajmać zamiest archimandryta Pilipa (Vasilcava), jakoha z Safii pieraviali na takuju ž pasadu ŭ Biejrut (Livan).

Naziralniki hadajuć, ci nie źviazany pieravod archimandryta Pilipa z vynikami niadaŭniaha vizitu patryjarcha Kiryła ŭ Bałharskuju Pravasłaŭnuju Carkvu. (Pra skandał, jaki ŭčyniŭ u Safii svaimi vykazvańniami Kirył, ciapier šmat pišuć i havorać, asabliva ŭ Rasii i Bałharyi. A vice-premjer Bałharyi publična nazvaŭ Kiryła druharadnym ahientam KHB Michajłavym i pryhadaŭ jamu afiery z uvozam u Rasiju cyharet i vina na miljardy rubloŭ.)

Nam, hramadzianam Biełarusi, skandalnyja pavodziny Kiryła na terytoryi aŭtakiefalnaj Bałharskaj Carkvy padkazvajuć, ŠTO jon moža dazvolić sabie ŭ kantaktavańni z padnačalenymi jamu ijerarchami ź Biełarusi. Niedarma ž pišuć, što ŭ RPC ustaloŭvajecca ciapier režym papizmu. Ale bolš cikava było b viedać, što budzie ź instytutam pradstaŭnika maskoŭskaha patryjarcha ŭ Biełaruskim ekzarchacie. Sprava ŭ tym, niama infarmacyi pra toje, kaho pryznačyli na miesca ihumiena Vasijana. Z hetaha robim vysnovu: ci to pasada pradstaŭnika vakantnaja, ci to jaje moŭčki skasavali. Kali praŭda druhoje, to možna zrabić adaznačnuju vysnovu: Kiryłu, viarcham RPC udałosia ŭtajmavać niaśmieły paryŭ ekzarcha Paŭła i tutejšaha jepiskapatu da bolšaj samastojnaści. Kali možna tak skazać, Maskvie ŭdałosia nakinuć abroć. Praŭda, my viedajem, što kožnaja abroć pieracirajecca i stanovicca niahodnaj. Adno što na heta patrabujecca peŭny čas.

• 0
• 0
• 0
• 0
• 0
• 0
• 0
• 0