Alaksandr Łukašenka źmianiŭ čatyroch ź piaci namieśnikaŭ premjer-ministra. Svaich partfielaŭ pazbavilisia Vasil Maciušeŭski, Uładzimir Siamaška, Anatol Kalinin i Vasil Žarko. Adzinym, chto zmoh pieražyć hety kadravy pieratrus, byŭ Michaił Rusy, jaki adkazvaje za sielskuju haspadarku.
Alaksandr Turčyn
Pieršym vice-premjeram staŭ Alaksandr Hienrychavič Turčyn. Jamu 43 hady, a rodam z Navahrudka. Jon byŭ kiraŭnikom aparata Savieta ministraŭ. Taksama ad lutaha 2018 paralelna zajmaŭ pasadu ŭpaŭnavažanaha pa Homielskaj vobłaści.
Turčyn skončyŭ narhas. A pracoŭny šlach pačynaŭ jak zahadčyk kramy «Avanhard». U Navahradku žyvie baćka Turčyna Hienrych Stanisłavavič, nam udałosia da jaho dazvanicca, ale ničoha pra syna raskazvać jon nie zachacieŭ: «Jon daŭno sa mnoj nie žyvie. Heta zakrytaja siamiejnaja infarmacyja».
Paśla Turčyn papracavaŭ u Karelickim rajvykankamie i Minskim abłvykankamie. Admietna, što aproč pracy ŭ aparacie Savieta ministraŭ, Turčyn uznačalvaŭ Radu pa raźvićci pradprymalnictva. Jarasłaŭ Ramančuk, jaki taksama ŭvachodzić u hetuju radu, tak napisaŭ pra Turčyna: «Jon na ŭźlocie svajoj karjery, jamu patrebnyja pieramohi, realnyja i adčuvalnyja».
Turčyna nazyvajuć aŭtaram libieralnaha dekreta №7 «Ab raźvićci pradprymalnictva».
U jaho dobryja adnosiny z bahatymi ludźmi krainy, takimi jak haspadar «Karony» Pavieł Tapuzidzis.
«Turčyn — biurakrat, aściarožny, zakonapasłuchmiany čynoŭnik. Biezumoŭna, jon patryjot Biełarusi, na Rasiju zahladacca nie budzie. U Navahrudku jaho lubiać, ja sam čuŭ, jak kažuć: «Naš Turčyn». Jon idealna viedaje, jak pracuje sistema. Razam z tym, nikoli nie idzie na abvastreńnie. Jahonaja pazicyja ŭ radzie: vysłuchoŭvać abodva baki. Jon bolš technakrat, čym libierał. Ja liču, što na pasadzie pieršaha vice-premjera treba prajaŭlać bolš tvorčaści i być bolš nastojlivym, a hetaha Turčynu brakuje», — skazaŭ ekanamist Jarasłaŭ Ramančuk.
Ihar Lašenka
Damaŭlacca z Rasijaj pra pastaŭki enierhanośbitaŭ bolš nie budzie Uładzimir Siamaška, jaki rabiŭ heta apošnija piatnaccać hadoŭ. Ciapier vybivać źnižki na haz i naftu budzie Ihar Lašenka. Apošnija čatyry hady jon uznačalvaŭ kancern «Biełnaftachim».
Jamu 44 hady, naradziŭsia ŭ Hruzii, ale žyŭ i vučyŭsia ŭ Homieli. Skončyŭ ekanamičny fakultet Homielskaha dziaržaŭnaha ŭniviersiteta. Adrazu pa skančeńni trapiŭ na pracu na Homielski chimičny zavod. Pracavaŭ inžynieram, načalnikam płanava-ekanamičnaha adździeła. Ad 2006 uznačaliŭ zavod. U 2013 hodzie byŭ pieraviedzieny ŭ Minsk u jakaści namieśnika staršyni kancerna «Biełnaftachim», a ŭžo praz hod uznačaliŭ jaho.
Jon žanaty, haduje traich dziaciej.
Uładzimir Kucharaŭ
Budaŭničuju śfieru budzie ŭznačalvać Uładzimir Kucharaŭ. Da hetaha jon byŭ namieśnikam staršyni Kamiteta dziaržaŭnaha kantrola.
Kucharavu 46 hadoŭ, jon rodam ź vialikaj vioski Cimanava, što ŭ Klimavickim rajonie. Heta samy ŭschod Biełarusi. Skončyŭ Mahiloŭski pieduniviersitet. A potym na praciahu šaści hod pracavaŭ u škołach Klimavickaha rajona.
U 1999 hodzie pierajšoŭ na pracu ŭ Dziaržkantrol. Ad 2009 da 2012 uznačalvaŭ Centralny rajon Minska. U 2012 — 2016 byŭ pieršym namieśnikam staršyni Minskaha harvykankama. U harvykankamie jon akurat kuryravaŭ pytańni budaŭnictva i žylla.
Ihar Pietryšenka
Pasada pasła Biełarusi ŭ Rasii vielmi pierśpiektyŭnaja z hledzišča dalejšaha prasoŭvańnia pa słužbovaj leśvicy. Papiarednik Pietryšenki Andrej Kabiakoŭ spačatku staŭ kiraŭnikom Administracyi prezidenta, a potym premjer-ministram. Pietryšenka ž z Maskvy ŭjazdžaje ŭ kabiniet namieśnika kiraŭnika ŭrada pa sacyjalnych pytańniach.
Pietryšenka rodam ź vioski Niehlubka Vietkaŭskaha rajona. Baćka pracavaŭ miechanikam u saŭhasie, a maci — aptekarkaj. Ihar naradziŭsia ŭ 1965 hodzie. Potym baćku pieraviali ŭ rajvykankam, dzie jon pracavaŭ u adździele sielskaj haspadarki.
Ihar Pietryšenka skončyŭ Vilenskaje vyšejšaje kamandnaje vučylišča radyjoelektroniki, Vajskovy čyrvonazorny instytut i Akademiju kiravańnia pry prezidencie.
Dziesiać hadoŭ addaŭ armii, dzie słužyŭ na aficerskich pasadach. Ad 1996 na čynavienskaj słužbie. Byŭ u aparacie ministra pa spravach SND. Da 2003 hoda pracavaŭ na roznych pasadach u Saviecie ministraŭ. Potym pierajšoŭ na dypłamatyčnuju słužbu.
Što admietna, tam Pietryšenka adkazvaŭ tolki za adnosiny z Rasijaj. Byŭ daradcam u pasolstvie Biełarusi ŭ Rasii, načalnikam upraŭleńnia Rasii i sajuznaj dziaržavy MZS, namieśnikam ministra. Ad 2012 — jon pasoł Biełarusi ŭ Rasii.
«Što ž tyčycca admaŭleńnia ruskaha śvietu, jak možna padzialić našaha čałavieka na ruskaha i biełarusa? My biełarusy, my sapraŭdy adbylisia jak nacyja. Dakładna hetak ža, jak ruski čałaviek. Što tut nie tak, što dzialić?» — kazaŭ u adnym intervju Pietryšenka.
Ciapier čytajuć
Niaklajeŭ apublikavaŭ złabadzionny vierš. U im zhadvajecca i Kaleśnikava z Babarykam, i Cichanoŭskaja, i Prakopjeŭ z Paźniakom13
Niaklajeŭ apublikavaŭ złabadzionny vierš. U im zhadvajecca i Kaleśnikava z Babarykam, i Cichanoŭskaja, i Prakopjeŭ z Paźniakom
U pačatku 2000‑ch troje nastaŭnikaŭ historyi źbiehli va Ukrainu ad «hienacydu biełaruskaha naroda», jaki čyniŭ režym Łukašenki. Jak skłaŭsia ich los?1919
Kamientary