U apošni dzień leta Łukašenka pryznačyŭ novaha ministra finansaŭ — 41-hadovaha Maksima Jermałoviča.
Heta nie novy čałaviek — dahetul Jermałovič pracavaŭ u tym samym viedamstvie namieśnikam Uładzimira Amaryna. Što jašče viadoma pra hetaha čynoŭnika?
«Naša Niva» sabrała niekalki faktaŭ.
Nie retrahrad
Maksim Jermałovič — heta stały hość niedziaržaŭnych ekanamičnych forumaŭ. Jon adkryty da kantaktaŭ, umieje słuchać inšych i adstojvać svaju pazicyju.
«Ź Jermałovičam my nie raz byvali ŭ kamandziroŭkach, jon zrabiŭ dobraje ŭražańnie — vielmi razumny, sapraŭdny prafiesijanał. Jaho adnaznačna nie nazvać retrahradam, ja vielmi rada jahonamu pryznačeńniu.
Siarod asnoŭnych jaho zasłuh ja b adznačyła raźmiaščeńnie kaštoŭnych papier — jeŭrabondaŭ», —
kaža Natalla Nikandrava, jakaja pierasiakałasia ź Jermałovičam padčas pracy ŭ Nacyjanalnym ahienctvie pa inviestycyjach i pryvatyzacyi.
Pracaholik
Letaś na Kastryčnickim ekanamičnym forumie jon uraziŭ ludziej tym, što paśla zakančeńnia mierapryjemstva — napačatku 22-j hadziny, — pajechaŭ nie dadomu, a na rabotu z pryčyny, što «jašče nie ŭsio daroblena».
Rynačnik, adaptavany da biełaruskich realij
Takimi słovami budučy ministr adkazvaŭ na pytańnie «Našaj Nivy» ab reformach u kułuarach adnaho z forumaŭ:
«Pakul u ekanomicy vialikaja dola niekankurentnych va ŭmovach rynku ludziej, ni pra jakija imklivyja rynkavyja pieraŭtvareńni havorki iści nie moža. Ale sami jany niepaźbiežnyja, pytańnie tolki ŭ chutkaści. Tak, u 90-yja možna było łamać, ale jak łamać siońnia? Reformy ŭpirajucca ŭ nizkuju kvalifikacyju kadraŭ, jakija ŭ vypadku «łomki» apynucca na vulicy, pojduć na dno i paciahnuć nas za saboj», — kazaŭ Jermałovič.
Paznavalny na Zachadzie
Jermałovič stała ŭvachodziŭ badaj što va ŭsie pieramoŭnyja hrupy pa mižnarodnych linijach. U pryvatnaści, jon byŭ adnym ź pieramoŭščykaŭ z MVF. I chacia hrošaj Biełaruś pakul što nie atrymała, darožnaja karta vykonvajecca spraŭna.
«Zasłuha i Jermałoviča, i inšych ludziej, i kamandy Nacbanka-Minfina-Minekanomiki ŭ tym, što ŭ Biełarusi dasiahnuta makraekanamičnaja stabilnaść, jakoj u nas nikoli dahetul nie było. I ja rady pryznačeńniu Jermałoviča: heta prafiesijanał, jaki viedaje, što za prablemy stajać pierad nami, viedaje taksama, jak ich vyrašać i z kim. Jašče navat byŭšy načalnikam adździeła jon zrabiŭ sabie reputacyju prafiesijanała. Mižnarodnyja finansavyja arhanizacyi, darečy, zaŭždy adznačali ŭzrovień našych čynoŭnikaŭ u paraŭnańni navat z krainami-susiedkami, kštałtu Ukrainy i Rasii. I pryznačeńnie Jermałoviča heta, u tym liku, i taki sihnał zachodnikam, što my praciahvajem pracavać u vyznačanym kirunku», — kaža ekanamist Alaksandr Čubryk.
Jon taksama adznačyŭ, što z 2011 hoda Biełarusi ŭdałosia amal na 10% skaracić dolu vydatkaŭ biudžetu adnosna VUP, što źjaŭlajecca niedasiahalnaj metaj, naprykład, dla hrekaŭ.
Žyvie nie ŭ Drazdach
Žyvie novy ministr u Sucharavie.
Zajzdrosny žanich
Maksim Jermałovič nie žanaty.
Jon pryznaje, što maje zališniuju vahu — ź joj sprabuje zmahacca praz zaniatki sportam, u pryvatnaści, vialikim tenisam.
Viadzie instahram
U ministra jość instahram, kudy jon redka, ale ŭsio ž zahružaje fota sa svaich pajezdak ci kamandzirovak.
Tut jon, naprykład, z robatam:
A tut natchniŭsia pomnikam Sapiehu na małoj radzimie, u Lepieli:
***
Maksim Jermałovič naradziŭsia 26 červienia 1977 hoda ŭ Lepieli. Skončyŭ Połacki dziaržaŭny univiersitet i Akademiju kiravańnia. U 1999 hodzie pracavaŭ dziaržaŭnym padatkovym inśpiektaram inśpiekcyi №2 Dziaržaŭnaha padatkovaha kamiteta pa Frunzienskim rajonie Minska. Ad lipienia 1999 hodu pa 2002 hod zajmaŭ roznyja pasady ŭ Dziaržaŭnym padatkovym kamitecie Biełarusi (ciapier Ministerstva pa padatkach i zborach). U 2002 hodzie pierajšoŭ pracavać u Ministerstva finansaŭ Biełarusi. Zajmaŭ pasady kansultanta ŭpraŭleńnia analizu i płanavańnia dachodaŭ biudžetu, namieśnika načalnika ŭpraŭleńnia — načalnika adździeła płanavańnia i ŭliku dachodaŭ biudžetu hałoŭnaha ŭpraŭleńnia padatkovaj palityki i dachodaŭ biudžetu, načalnika hałoŭnaha ŭpraŭleńnia biudžetnaj palityki. U 2011-2014 hadach — namieśnik ministra finansaŭ Biełarusi. Z 2014 hoda i da ciapierašniaha času pracavaŭ pieršym namieśnikam ministra finansaŭ.
Kamientary