«Seks u vialikim horadzie» pa-biełarusku: Voka šukaje achvotnych ahučyć kultavy sieryjał 2000-ch

Kultavy sieryjał HBO «Seks u vialikim horadzie» budzie pierakładzieny na biełaruskuju movu. Videaservis Voka abjaŭlaje kastynh (pa 21 lutaha!) na ahučku jaho hałoŭnych piersanažaŭ. Samaje cikavaje, što pretendavać na ŭdzieł u prajekcie mohuć nie tolki prafiesijanały, ale i ŭsie biełaruskija prychilniki sieryjała.

Pavialičyć

Kab usie my jak maha chutčej ubačyli i pačuli, jak čatyry dobryja siabroŭki dzielacca adna z adnoj žanočymi sakretami na biełaruskaj movie, pakutujuć ad raźbitaha serca i niemahčymaści trapić u modny restaran, abmiarkoŭvajuć tufli i mužčyn, płačuć i śmiajucca, treba adšukać čatyroch dziaŭčat i dvuch maładych ludziej.

Varta zaŭvažyć, što biełaruskim prychilnikam pryhod čatyroch pryhažuń-siabrovak paščaściła bolš za ŭsich inšych fanataŭ «Seksa ŭ vialikim horadzie» i jaho kinasikviełaŭ: los abiacanaha praciahu apynuŭsia pad vialikim pytańniem paśla taho, jak Kim Ketrał admoviłasia ŭdzielničać u zdymkach treciaha filma. A tym časam u Biełarusi historyja Kery, Mirandy, Sincii i Šarłoty atrymaje druhoje žyćcio, i heta ŭžo dakładna! Pieršy siezon sieryjała «Seks u vialikim horadzie» u biełaruskamoŭnaj ahučcy chutka źjavicca ŭ miedyjatecy Voka.

Praviły ŭdziełu ŭ kastynhu:

1. Vyrašycie, kaho z hałoŭnych hierojaŭ sieryjała (adnaho, niekalkich ci ŭsich adrazu — abmiežavańniaŭ niama!) vy chacieli b ahučyć: Kery, Mirandu, Samantu, Šarłotu, Stenfarda ci Mistera Biha.
2. Pierajdzicie pa spasyłcy, dzie źmieščanyja frahmienty tekstu kožnaha z hierojaŭ.
3. Začytajcie abrany ŭryvak na videa.

4. Da 21 lutaha ŭklučna źmiaścicie videa ŭ storyz svajho Instagram-akaŭnta, adznačyŭšy aficyjny akaŭnt Voka (@vokatv).

5. Nie zabudźcie adkryć dostup da akaŭnta i publikacyi na čas papiaredniaha adboru ŭdzielnikaŭ.
6. Čakajcie zaprašeńnia na kastynh!

Dalej da pracy dałučycca žury ŭ składzie pradstaŭnikoŭ Voka, a taksama hukarežysioraŭ studyi dublažu i zakadravaj ahučki 13studio. Siabry žury vyrašać, chto z ŭdzielnikaŭ pieršaha etapu prachodzić dalej — na žyvoje prasłuchoŭvańnie ŭ studyi hukazapisu. Jany buduć aceńvać kankursantaŭ pa takich kryterach jak vałodańnie rytorykaj, adpaviednaść vobrazu hieroja, artystyzm i čyścinia hołasu. Važnaj umovaj budzie i najaŭnaść u pretendentaŭ mahčymaści addać 1-2 dni pracy ŭ studyi nad ahučkaj svajho piersanažu.

Pieramožcy druhoha etapu i padorać svaje hałasy hierojam piłotnaj sieryi «Seksu ŭ vialikim horadzie» pa-biełarusku. Premjerny pakaz pieršaha siezona ŭ biełaruskaj ahučcy adbudziecca ŭ sakaviku biahučaha hoda.

Pavialičyć

• 0
• 0
• 0
• 0
• 0
• 0
• 0
• 0