Biełaruski ličbavy hołas bolš nie budzie rezać słych niapravilnymi naciskami. Niejrasietku narešcie navučyli adroźnivać «mUku» ad «mukI»

Jak paviedamlajuć stvaralniki adkrytaha prajekta BelVoice ŭ svaim telehram-kanale,

hałoŭnaj pieraškodaj dla jakasnaha pieraŭtvareńnia tekstu ŭ maŭleńnie (Text-to-Speech) zastavalisia amohrafy. Heta słovy, jakija majuć adnolkavaje napisańnie, ale rozny nacisk: naprykład, «mUka» i «mukA», «vUčyć» i «vučYć», «hAdy» i «hadY».

Tradycyjnyja ałharytmy vykarystoŭvali najbolš častotny varyjant sa słoŭnika zusim biez uliku kantekstu. Taki padychod zabiaśpiečvaŭ dakładnaść kala 92 %. Na pieršy pohlad ličba zdajecca vysokaj, adnak dla sintezu maŭleńnia heta krytyčnaja chiba: vaśmipracentnaja chibnaść aznačaje, što

praktyčna ŭ kožnym abzacy sistema rabiła fanietyčnuju pamyłku, jakaja nieadkładna vydavała štučnaść hołasu i rezała słych karystalniku.

Dla vyrašeńnia siemantyčnaj zadačy daśledčyki intehravali ŭ praces vialikija moŭnyja madeli (LLM). Aptymalnym rašeńniem stała architektura ličbavaha analizu z raźmierkavańniem rolaŭ. Spačatku mahutnaja niejrasietka (naprykład, Gemini Pro 3.1) apracoŭvaje źviestki z Hramatyčnaj bazy i Tłumačalnaha słoŭnika biełaruskaj movy. Na asnovie hetaha masiva stvarajecca aptymizavany prompt z vyraznymi praviłami i łahičnymi markierami dla mienšaj infierens-madeli, jakaja ŭžo niepasredna pracuje z tekstam karystalnika.

Usie techničnyja instrukcyi pa pabudovie hetaha ałharytmu raspracoŭščyki adkryta raźmiaścili na płatformie GitHub.

Vybar finalnaj madeli dla prajekta pravodziŭsia na troch śpiecyjalizavanych datasetach: bazie CommonVoice, sintetyčnym zbałansavanym nabory 10/10 i pieršych piatnaccaci raździełach knihi Arkadzia Čarnyševiča «Zaścienak Malinaŭka» z całkam ručnoj raźmietkaj naciskaŭ. Padrabiaznyja vyniki daśledavańniaŭ apublikavanyja na płatformie Hugging Face.

Najlepšyja suadnosiny chutkaści i jakaści prademanstravała madel Gemma 4‑31B biez uklučeńnia funkcyi razvažańnia, jakaja praźmierna zapavolvaje pracu. Na vybarcy z 1090 składanych amohrafaŭ u naturalnym litaraturnym tekście sistema dapuściła ŭsiaho try pamyłki, dasiahnuŭšy dakładnaści ŭ 99,72 %.

Funkcyja razvažańnia (Reasoning) — režym pracy štučnaha intelektu, pry jakim jon nie vydaje adkaz mamientalna, a spačatku pravodzić unutrany pakrokavy łahičny analiz. Heta krychu pavyšaje dakładnaść, ale katastrafična zapavolvaje chutkaść pracy (da chviliny na adzin zapyt), tamu dla chutkaj ahučki tekstaŭ hety režym adklučajuć.

Dla paraŭnańnia, kankurentnaja madel Qwen3. 8‑27B na tym ža abjomie danych pamyliłasia 25 razoŭ, a Mistral-small-4 zrabiła 182 pamyłki z vynikovaj dakładnaściu kala 83 pracentaŭ.

• 7
• 0
• 0
• 0
• 0
• 0
• 0
• 0