«Biełaruś prychodzić z choładu, kali sprabuje addalicca ad Rasii» — pad takim zahałoŭkam apublikavała artykuł pra našu krainu amierykanskaja hazieta The Wall Street Journal.
Heta aluzija da nazvy znakamitaha detektyva Džona Le Kare «Špijon, jaki pryjšoŭ z choładu». Anhlijski vyraz «pryjści z choładu» aznačaje apynucca ŭ novym dla siabie, raniej niedastupnym, niemahčymym stanoviščy.
«Prezidenta Alaksandra Łukašenku niekali nazyvali apošnim dyktataram Jeŭropy. Jon 25-y hod kiruje krainaj žaleznym kułakom, ale pierastaŭ być abjektam astrakizmu [na Zachadzie]», — piša The Wall Street Journal.
Hazieta adznačaje, što ad 2014 hoda, kali zdaryŭsia Krym i Danbas, Alaksandr Łukašenka sprabuje asłabić zaležnaść ad Rasii, i hetyja sproby byli zaŭvažanyja jak za miežami, tak i ŭnutry krainy.
Žurnalist źviartaje ŭvahu, što «Biełaruś niadaŭna prymusiła źjechać rasijskaha pasła, abvinavaciŭšy jaho, što jon stavicca da krainy jak da pravincyi Rasii. Praź niekalki dzion paśla hetaha byli aryštavanyja namieśnik kiraŭnika Rady biaśpieki i dyrektar «Biełtelekama» — abodva pa abvinavačvańni ŭ atrymańni hrošaj ad rasijskich subjektaŭ», — piša vydańnie.
«Niezaležnaść i suvierenitet — śviatyja dla Biełarusi i niemahčyma, kab niechta ŭ Biełarusi zachacieŭ zdać ich», — cytuje vydańnie ministra zamiežnych spraŭ Uładzimira Makieja.
Makiej dadaje, što z momantu razvału SSSR u 1991 hodzie, cełyja pakaleńni «naradzilisia ŭ niezaležnaj dziaržavie i jany chočuć žyć u niezaležnaj dziaržavie».
Kamientujučy palapšeńnie adnosin Biełarusi z ZŠA ŭ apošnija hady, Makiej adznačyŭ, što źmianiłasia hieapalityčnaja situacyja, u rehijonie źjavilisia novyja kanflikty, i «ZŠA ŭbačyli, što Biełaruś — nie prydatak niejkaj inšaj krainy».
Vydańnie adznačaje, što pry hetym ministr zaklikaŭ nie pierabolšvać roznahałośsi Minska i Maskvy.
U toj ža čas «Uoł-stryt džornał» cytuje niezaležnuju deputatku Pałaty pradstaŭnikoŭ Hannu Kanapackuju: «Davajcie budziem sumlennyja: Biełaruś na siońnia nie jość niezaležnaj, prynamsi, ekanamična. Ničoha niemahčyma zrabić biez dyviersifikacyi i pieraaryjentacyi handlu, a hetaha nie dasiahnuć biez reformaŭ, a reformaŭ niama».
«My vielmi mocna zaležym ad Rasii, — kaža Kaciaryna Barnukova, dyrektarka biełaruskaha daśledčyckaha centra BEROC. — Pytańnie nie ŭ tym, ci pavinna adbycca dyviersifikacyja, a ŭ tym, ci heta mahčyma».
Ciapier čytajuć
Kačanava prapanavała ŭvieści adkaznaść za «niapraŭdu ŭ tyktoku»11
Kačanava prapanavała ŭvieści adkaznaść za «niapraŭdu ŭ tyktoku»
Śpiecsłužby atrymali dostup da pierapiski ŭ Signal, choć sama prahrama ŭžo była vydalenaja. Toje samaje mahło być i z TH. Jak tak i jak zaścierahčysia?22
Kamientary