Interniet-miedyi: svabodnyja jak Kuba!
Ułada pakul nie źbirajecca rehistravać sieciŭnyja vydańni. Ale djabał toicca ŭ detalach. Piša ŭ svaim błohu Alaksandar Kłaskoŭski.
Pradstaŭnik Ministerstva infarmacyi Hienadź Kurbieka sarvaŭ vopleski na kruhłym stale «Samarehulavańnie ŭ Bajniecie», što adbyŭsia 27 studzienia ŭ Minskim mižnarodnym adukacyjnym centry.
Jon uračysta paviedamiŭ sieciŭnaj publicy: voś, vy patrabavali, kab nie było rehistracyi interniet-ŚMI, dyk my jaje i nie źbirajemsia ładzić.
Upadać u ejfaryju, adnak, nie varta. Djabał toicca ŭ detalach.
Pa-pieršaje, uźnikaje pravavaja kalizija. Bo zakon ab ŚMI, što nabyvaje moc 8 lutaha, adkrytym tekstam pradpisvaje Saŭminu pryniać niejki dakumient ab paradku rehistracyi interniet-vydańniaŭ.
Pakul što, hulajučy ŭ adlihu z Brusielem, ajčynnyja ŭłady vyrašyli prytrymlivacca paradyhmy «zakon što dyšal». A jak budzie zaŭtra? Dzie harantyi, što sieciva nie zakiłzajuć?
Praŭda, pamočnik prezidenta sp. Jančeŭski, jakoha aŭtar hetych radkoŭ dapiakaŭ u listapadzie na kruhłym stale «Interniet-ŚMI: vykliki XXI stahodździa» , patetyčna zajaviŭ, što «interniet u Biełarusi byŭ, jość i budzie svabodnym». Ale chaciełasia b i niejkich instytucyjnych harantyj :)
Pa-druhoje, novy zakon ab ŚMI ŭstaloŭvaje adziny ŭzor žurnalisckaha paśviedčańnia i drakonaŭski paradak akredytacyi žurnalistaŭ.
Na praktycy heta aznačaje, što pradstaŭnikam veb-vydańniaŭ čynoŭniki buduć kazać: hulaj, Vasia! Biez papierki ty kuzurka, zamiest dostupu da infarmacyi — dula z makam.
Nie vyklučany i inšyja pastki. Naprykład, veb-vydańni mohuć być adsiečanyja ad mahčymaści publikavać rekłamu. Skažuć: niezakonnaja pradprymalnickaja dziejnaść — ci jašče jakuju chaleru prydumajuć.
Karaciej, sieciŭnyja ŚMI stanuć svabodnymi jak Kuba — byŭ taki papularny iraničny vyraz za savieckim časam. Vydaŭcy apynucca ŭ takim stanoviščy, što sami stanuć prasić, kab ich zarehistravali. A dakumienta ž niama! Karaciej, za što zmahalisia, na toje i narvalisia, złaradna skažuć čynoŭniki.
U kułuarach MMAC ja trochi padyskutavaŭ z čynoŭnikami Mininfarma. Jany davodzili: pastanova ab rehistracyi była b tolki karysnaja interniet-vydańniam. Kažu: a mo iści ŭ advarotnym kirunku? Nie sieciŭnyja vydańni zahaniać u rehistracyju, a ŭvohule admovicca ad jaje. U balšyni demakratyčnych krain navat drukavanuju presu nie rehistrujuć. I akredytujuć veb-žurnalistaŭ biez anijakich farmalnaściej.
Čynoŭniki nibyta i nie piarečyli, ale pa ich vačach ja zrazumieŭ, što viarzu idealistyčnuju achinieju :)
Tak što tryumfavać sieciŭnaj publicy rana. Ale pakul što — dziakuj adlizie. Čym dolej Bajniet nie «ŭparadkavany», tym ciažej zahnać džyna ŭ plašku.
ZY. Da pytańnia ab udziele niezaležnaj supolnaści ŭ mierapryjemstvach napakaz Jeŭropie i roznych kvazistrukturach «pry…». Listapadaŭski kruhły stoł na temu svabody internietu taksama byŭ pakazuchaj dla Brusiela. Ale ž, jak bačym, niejki plon daŭ. Uładu siońnia abstaviny prymušajuć u peŭnaj stupieni «adkazvać za bazar» na temy libieralizacyi. Tak što dzie možna ŭstavić svaje try hrašy — treba iści dy ŭstaŭlać :)
Kamientary