Žonka Arcioma, jaki emihravaŭ u Ispaniju ź siamjoj i zastaŭsia tam adzin, adkazała, čamu ŭ Baranavičach lepš, čym u Barsiełonie
Błohierka Hanna Žadan paśla troch z pałovaj hadoŭ žyćcia ŭ ispanskaj Barsiełonie pryjšła da dumki, što ŭ biełaruskich Baranavičach joj lepš, zaŭvažyła «Lusterka».
«Naša Niva» raniej raskazvała historyju Arcioma, jaki pierajazdžaŭ u Barsiełonu ź siamjoj, ale praz try hady žonka vyrašyła ź dziećmi viarnucca ŭ Biełaruś — ciapier mužčyna šukaje varyjanty baćkoŭstva na dystancyi.
Ciapier jaho žonka raskazała, čamu «ŭ Baranavičach lepš».
Błohierka skłała śpis z 15 punktaŭ, jakija jaje nie zadavolili ŭ Barsiełonie. Jana adznačyła, što ŭ horadzie z-za kišeńnikaŭ «vielmi niebiaśpiečna» i, jak śledstva, «ty zaŭsiody ŭ napružańni». «Naohuł usia «zabaronka» ŭ lohkim dostupie».
«Horad svabody va ŭsich sensach. Seksšop pobač ź dziciačym sadam — lohka, ŁHBT-prapahanda — dla mianie praźmiernaja. Nivodnaje śviata ci kancert nie prachodzić bieź ich. U niejki momant ja zrazumieła, što zvyčajnyja ludzi jak byccam u mienšaści», — napisała Hanna Žadan.
U druhoj častcy minusaŭ Barsiełony nutrycyjołah pieraličyła «płastykavuju i niasmačnuju harodninu i sadavinu» ŭ kramach, adsutnaść servisu ŭ restaranach, a taksama toje, što bolšaść ustanoŭ raźličana na turystaŭ — tam «niasmačna, nie karysna». Pa słovach błohierki, «pryhožyja i smačnyja» miescy ŭ horadzie jość, ale «ich treba prosta viedać».
«Śfiera pryhažości značna daražejšaja i horšaja jak pa jakaści pasłuh, tak i pa servisie. Isnuje vyklučna za košt našych dziaŭčatak. Inakš usie chadzili b biez manikiuru, piedykiuru, pryhožych vałasoŭ dy inšaha», — napisała Hanna.
Nie zadavoliła biełarusku i adukacyja na katałonskaj movie ŭ stalicy Katałonii.
Što tyčycca plažaŭ, to ŭ Barsiełonie jany «ŭsie publičnyja» i «mnohija biez šezłonhaŭ i parasonaŭ, a tam, dzie jany jość, košt prykładna nieadekvatny — kala 50 jeŭra».
«Miedycyna z adnaho boku vydatnaja, ale z druhoha… U dziciaci tempieratura 39,5 druhi tydzień — nijakich analizaŭ i adzin adkaz: ibuprafien. Apieracyju, kali ty nie pamiraješ, možna čakać miesiacami. Zrobiać jakasna, tak. Ale pačakać daviadziecca prystojna (kali niama pryvatnaj strachoŭki)», — padzialiłasia Hanna, padkreśliŭšy, što ŭ Baranavičach usio ž lepš, čym u Barsiełonie.
Aŭtarka paabiacała ŭ budučyni raskazać i pra plusy stalicy Katałonii, tamu što «niahledziačy na ŭsie minusy» lubić i «hety horad, i hetuju krainu ŭsim sercam».
«Žyvicie ŭ svaich Barankach, i nie čapajcie Barsiełony»
Post biełaruski vyklikaŭ burnaje abmierkavańnie. Adny kamientatary adznačali, što Barsiełona — heta horad, chutčej, dla turystaŭ, a nie dla žyćcia. Inšyja padzialilisia svaim dośviedam žyćcia ŭ stalicy Katałonii.
«Lublu Barsiełonu. Dy ŭvohule Ispaniju ŭ cełym! Usio smačna i pryhoža. Žyvu tut 25 hadoŭ i jašče ni razu nie paškadavała», — napisała irinasalou.
Častka padpisčykaŭ vykazała svaju niazhodu ź niekatorymi minusami z doŭhaha śpisu:
«Jak možna 3,5 hady pražyć u Ispanii i nie navučycca vybirać i kuplać pamidory? Ich stolki vidaŭ: i sałatnych, i chlebnych — kuča ispanskich kram, pryvoziać prosta ź ciaplic. U Minsku ja takija smačnyja znachodziła tolki ŭ siezon u adzinaj kramie na Kamaroŭcy, i kaštavali jany 25 rubloŭ/kh».
«Z servisam i adukacyjaj zhodna! U astatnim — nie».
«Bolšaść minusaŭ — hustaŭščyna. U Baranavičach niama ŭvohule mora, naprykład. Pamidory najsmačniejšyja kuplaju ŭ Francyi, pobač. Z ahurkami realna biada. Katałonskaja taksama ŭskładniaje žyćcio. Tut ja zhodna na ŭsie 100%! Kafe mała cikaviać. Piersiki tolki ispanskija kuplaju. Jany samyja-samyja», — raspaviadaje tina.timof.
«Ja voś taksama lublu paraŭnoŭvać — ale ja taksama hladžu i plusy. Kali hladzieć pra adukacyju, skažam, u RB — jana biaspłatnaja, ale tolki na ruskaj ci biełaruskaj, tak? Na anhlijskaj taksama nie vučać i tym bolš biaspłatna. Servis — tut pahadžusia na ŭsie 100! My navučylisia servisu ŭ ich na zachadzie, a jany pra jaho, musić, zabylisia. Pra lačeńnie ŭ RB dla mianie taksama bolš plusaŭ, čym minusaŭ z dośviedu», — padzialiłasia svaim mierkavańniem alena_dubskaya.
«Baranavičy? Vy paraŭnali z Barsiełonaj? Ja była i tam, i tam».
«Viadoma, Barsiełona, jana maje takija sabie rajony. Voś u Barankach jakaja pryhažość! Prosta suicydalnaja! Brava, na*ier Barsiełonu!» — napisała strelkavolya.
Ciapier čytajuć
Adkul u Biełaruś jedzie bolš za ŭsio hastarbajtaraŭ? Top-20 krain — i Pakistana tut pakul niama2
Kamientary