Netflix pahadziŭsia tracić 25% dachodaŭ ad jaho francuzskich padpisčykaŭ na vyrab miascovaj pradukcyi
Netflix adkryŭ svoj pieršy ofis u Francyi. Dziela hetaha jamu daviałosia ŭziać na siabie abaviazak tracić nie mienš za 25 % abarotu na finansavańnie miascovaj kinapradukcyi.
Najbolšaja ŭ śviecie płatforma videakantentu pa padpiscy za 2020 hod zdymie 20 filmaŭ i prahram na francuzskaj movie. U 2021-m hetaja kolkaść maje padvoicca. Heta vialiki rost. Dla paraŭnańnia: za ŭsie minułyja hady Netflix źniaŭ usiaho 24 francuzskija videaprahramy, piša Le Monde.
«Nie ŭsio i nie zaŭsiody było prosta miž Francyjaj i Netflix-am, ale ŭrešcie my zrazumieli, što nie možam žyć adno biez adnaho», — z uśmieškaj skazaŭ na adkryćci ofisa ministr kultury Francyi Frank Ryster.
U francuzskim ofisie Netflix-a budzie pracavać 40 čałaviek. U vyrab francuzskaj videapradukcyi ŭ 2020 hodzie Netflix układzie 100 miljonaŭ jeŭra. U 2021 hodzie hetaja suma maje padskočyć. Reč u tym, što ŭ Francyi ŭ Netflix 6,7 miljonaŭ padpisčykaŭ, jakija štomiesiac płaciać u siarednim pa 10 jeŭra. Takim čynam, abarot u 2019 hodzie skłaŭ kala 670 miljonaŭ jeŭra. U 2020-m Netflix čakaje abarotu ŭ pamiery kala 800 młn jeŭra. Adpaviedna, u 2021-m kampanija ŭkładzie ŭ Francyi čverć hetaj sumy.
Takuju ŭmovu naviazaŭ kampaniju francuzski ŭrad. Hetkim čynam Francyja dasiahaje i padtrymki nacyjanalnaj videapradukcyi, i inviestycyj u nacyjanalnuju ekanomiku.
Dabicca taho, kab amierykanskija ličbavyja hihanty — ad Fejsbuka i Huhła da Amazona i Netfliksa — dzialilisia prybytkami ad adziejnaści na terytoryi Francyi z francuzskaj dziaržavaj, — heta stratehičnaja meta ŭrada. Francuzy tut pieršaprachodcy, ale ich taktyku mohuć kapijavać inšyja dziaržavy. Paryž dabivajecca adnačasova harantyj dla nacyjanalnaj movy i kultury, kab jany nie byli dyskryminavanyja ŭ prastory suśvietnych ličbavych karparacyj.
Biełaruskija ŚMI nie raz vykazvali zaniepakojenaść tym, što Huhł i Jutub nie padtrymlivajuć rekłamy na biełaruskaj movie i što «razumnaja stužka» Huhł Dyskaver (Google Discover) nie prymaje navin na biełaruskaj movie. Tryvohu ŚMI vyklikaje i adsmoktvańnie rekłamnych srodkaŭ ź biełaruskaha rynku Jandeksam, Instahramam, Fejsbukam i Huhłam. Ułady Biełarusi pakul nie sprabavali rehulavać dadzienuju śfieru.
Kamientary