Hodzie pryciskać našu siniavokuju!

U Maskvie adznačajuć “sproby cisku na Biełaruś” u miežach jaje ŭdziełu ŭ novaj prahramie ES “Uschodniaje partniorstva”. Na hetu temu vykazaŭsia 26 sakavika aficyjny pradstaŭnik MZS Rasii Andrej Nieściarenka.

Raniej niedatykalnaściu siniavokaj respubliki apiekavaŭsia ŭ Brusieli sam kiraŭnik rasijskaj dypłamatyi Siarhiej Łaŭroŭ.

Čym ža možna patłumačyć taki abvostrany kłopat?

Sapraŭdy, i viarchoŭny pradstaŭnik Chaŭjer Sałana, i češski ministr zamiežnych spraŭ Kareł Švarcenbierh, i jašče chto-kolviek z palityčnaha bamondu ES pieraścierahali biełaruskaje kiraŭnictva: pryznańnie miaciežnych hruzinskich pravincyj abciažaryć dyjałoh Minska z Brusielem.

Zrešty, jeŭrapiejskija palityki ahavorvajucca: heta nie ultymatum, a kanstatacyja realij. Biełaruś vypadzie z kantekstu, jak vykazaŭsia sp. Švarcenbierh.

Dla Jeŭropy niepryznańnie zhadanych respublik — sprava pryncypu, bo inšaje aznačaje ŭchvaleńnie letašniaj vajny Rasii suprać Hruzii. Vajny, što pastaviła Jeŭropu na vušy i, u pryvatnaści, zmusiła pamianiać paradyhmu dačynieńniaŭ ź Biełaruśsiu.

Plus elemientarnaja akaličnaść: u toje ž samaje “Uschodniaje partniorstva” zaprošana Hruzija. Kali što takoje, to Tbilisi stanie na dybki — i ŭvieś prajekt ad pačatku budzie skamiečany…

Miž tym pazicyju samoj Maskvy ŭ hetym adčuvalnym pytańni niezaležnyja biełaruskija kamientatary družna charaktaryzujuć jak vykručvańnie ruk Łukašenku. Nie adnojčy nahadvaŭ pra sajuźnickija abaviazki Minska ŭ hetym kantekście ambasadar Rasii Alaksandr Surykaŭ. Śviežym prykładam psichałahičnaj apracoŭki ŭpartaha sajuźnika, na dumku minskich kamientataraŭ, stała zładžanaja niadaŭna ŭ Sočy “vočnaja staŭka” Alaksandra Łukašenki z kiraŭnikom Abchazii Siarhiejem Bahapšam.

“Prosta ŭ Maskvy kančajecca ciarpieńnie ŭ źviazku z tym, što biełaruski kiraŭnik ciahnie ryzinu ŭ pytańni pryznańnia Paŭdniovaj Asiecii i Abchazii” — takoj bačyć podbiŭku śviežaj zajavy rasijskaha MZS minski palityčny ahladalnik Raman Jakaŭleŭski.

Miž tym, jak prahučała sa Smalenskaj płoščy, architektura supracy ES z susiedziami Rasii nie musić uvachodzić u supiarečnaść ź ich abaviazkami ŭ miežach SND i ADKB.

“Pry hetym, — zaznačyŭ sp. Nieściarenka, — ad nas nie chavajecca taja akaličnaść, što pierad patencyjnymi udzielnikami “Uschodniaha partniorstva” časam stavicca štučny vybar — abo vy ź Jeŭrasajuzam, abo vy z Rasijaj. Całkam heta možna dapasavać i da mahčymaha ŭdziełu Biełarusi ŭ hetaj prahramie. U Maskvie nie prachodziać niezaŭvažanymi sproby cisku na Minsk ŭ hetym źviazku što da vybranaha im zamiežna- i ŭnutrypalityčnaha kursu”.

“A što mienavita razumiejeie Maskva pad ciskam ŭ halinie ŭnutranaj palityki? — razvažaje ahladalnik Raman Jakaŭleŭski. — Jość viadomyja 12 ŭmoŭ ES datyčna narmalizacyi dačynieńniaŭ ź Biełaruśsiu, i ŭsie jany tak ci inačaj źviazany z demakratyzacyjaj. Dyk što, Rasija suprać demakratyzacyi krainy-sajuźnicy?”.

Dadamo, što sp. Nieściarenka, kažučy pra ŭdzieł Biełarusi va “Uschodnim partniorstvie”, staranna ŭžyvaŭ epitety kštałtu “mahčymy”, “patencyjny”. Miž tym Rada ES 20 sakavika aficyjna ŭłučyła krainu ŭ novuju prahramu. Ale ž, musić, niekamu nadta nie chočacca, kab hety šaniec na viartańnie ŭ Jeŭropu Biełaruś skarystała.

Zaŭvažcie: ab pravie suvierennaj dziaržavy na hieapalityčny i, kali chočacie, cyvilizacyjny vybar kłapatlivyja maskoŭskija dziejačy ni hu-hu. Padtekst: nie leźcie ŭ zonu našych intaresaŭ! Biełaruś usprymajecca jak niejkaja kananičnaja terytoryja Kramla.

I ŭ hetym sensie pierad Minskam sapraŭdy abvastrajecca pytańnie vybaru. Bo vykazvańni pradstaŭnikoŭ Maskvy śviedčać, što z drejfam Biełarusi ŭ bok Jeŭropy tam mirycca nie chočuć.

Biełaruskija niezaležnyja analityki, adnak, sumniajucca, što ŭ ciapierašniaha kiraŭnictva krainy stanie duchu pamianiać hieapalityčnuju aryjentacyju. Tak, palitołah Valer Karbalevič prahnazuje, što chutčej supraca Biełarusi ź ES u miežach “Uschodniaha partniorstva” budzie “łakalnaj, vybaračnaj, punktavaj, u asobnych, stroha adabranych prajektach”.

Prablema tut, zaznačym, nie tolki ŭ ekanamičnaj zaležnaści ad Rasii. Jeŭrapiejski trend pahražaje raschistać palityčnuju sistemu, žorstka skručanuju aŭtarytarnymi hajkami.

Tamu Łukašenku zastajecca adno: bałansavać. Zychodiačy z łohiki hetaha palityčnaha ekvilibru, Karbalevič prahnazuje taki siužet: spačatku biełaruski aficyjny kiraŭnik źlotaje ŭ Prahu (ci Brusiel) na ŭstanoŭčy samit novaj prahramy ES, a potym — paraduje tavaryšaŭ z Suchumi dy Cchinvali. Nu a Maskva paplaskaje ŭ ładki.

• 0
• 0
• 0
• 0
• 0
• 0
• 0
• 0