Što viadoma pra 27‑hadovaha zahinułaha dobraachvotnika Alaksieja Łazarava
21 studzienia źjaviłasia navina, što zahinuŭ biełaruski dobraachvotnik Alaksiej Łazaraŭ. «Naša Niva» raskazvaje pra maładoha vajara.
Alaksiej byŭ inžynieram-prahramistam. Skončyŭ BDU, u kancy 2019‑ha byŭ pryzvany na słužbu ŭ biełaruskuju armiju. U 2019‑m Łazaraŭ bałatavaŭsia ŭ deputaty pa Kalinoŭskaj akruzie, byŭ adnym z arhanizataraŭ kampanii «Vučoba važniejšaja» suprać zakona, jaki skaračaŭ adterminoŭki ad armii dla studentaŭ.
Chłopiec aktyŭna ŭdzielničaŭ u pratestach 2020-ha, dapamahaŭ naziralnikam na vybarčych učastkach, praz pahrozu aryštu źjechaŭ z krainy. Spačatku byŭ u Hruzii, a paśla pierabraŭsia va Ukrainu.
Alaksiej pryjšoŭ na front u pačatku poŭnamaštabnaj vajny, kali Pałka Kalinoŭskaha jašče nie isnavała. Jon trapiŭ u biełaruskuju rotu terabarony «Azova», ź jakoj paźniej vyras Połk Kalinoŭskaha. Chutka paśla jaho da roty dałučyłasia Vieranika Janovič, na toj čas dziaŭčyna Alaksieja. U sakaviku 2022 hoda jany pabralisia šlubam.
U 2022‑m Alaksiej pracavaŭ ź pieranosnymi zienitna-rakietnymi kompleksami, paźniej jaho pryznačyli kamandziram raźliku. Kali ŭ tym hodzie razhareŭsia skandał vakoł tahačasnaha štaba Pałka, Alaksiej byŭ siarod vajaroŭ, jakija vyrašyli syści. Jon pisaŭ, što jamu nie padabajecca, što Połk staŭ zajmacca palitykaj ad imia vajaroŭ, a jon jak vajar nie moh upłyvać na vyrašeńni štaba.
Ale ŭ 2025‑m hodzie Łazaraŭ viarnuŭsia na front. Jon dałučyŭsia da ŭkrainskaha 225‑ha asobnaha šturmavoha pałka, dzie zajmaŭsia dronami.
Chłopiec (Alaksiej uziaŭ pazyŭny «Vuž») udzielničaŭ u abaronie Kijeva, u vyzvaleńni Chiersonskaj i Mikałajeŭskaj abłaściach, bitvach na Łuhanskim i Danieckim kirunkach.
Alaksiej zahinuŭ 19 studzienia, jamu było 27 hadoŭ. Pachavajuć chłopca ŭ Lvovie.
«Naša Niva» — bastyjon biełaruščyny
PADTRYMAĆ
Kamientary