Karanavirus vyklikaje insulty ŭ maładych ludziej — The Washington Post

Amerykanskaje vydańnie piša, što lekary bjuć tryvohu z pryčyny prykmietnaj kolkaści insultaŭ siarod zaražanych karanavirusam maładych ludziej, chvaroba jakich praciakała ŭ lohkaj formie.

Uzrost takich pacyjentaŭ ad 30 da 40 hadoŭ, mnohija ź ich navat nia viedali, što zaražanyja karanavirusam, a ciapier niekatoryja ź ich paralizavanyja, a inšyja zahinuli ad insultaŭ. I heta pry tym, što siaredni ŭzrost pacyjentaŭ ź insultami ŭ ZŠA — 74 hady, cytuje WP radyjo «Svaboda».

Vypadak, jakoha neŭrachirurh nikoli nia bačyŭ

Hazeta apisvaje vypadak, jaki zdaryŭsia ŭ adnoj z klinik Manhetanu. Intervencyjny neŭrachirurh Tomas Okśli byŭ terminova vyklikany na pracu, bo ŭ toj dzień u klinicy nie chapała lekaraŭ dla lačeńnia terminovych pacyjentaŭ ź insultami.

Tomasu Okśli trapiŭsia małady čałaviek va ŭzroście trochu paśla tryccaci hadoŭ. Jon nie prymaŭ nijakich lekaŭ i nia mieŭ chraničnych chvarobaŭ. Jon datrymlivaŭ umovy karantynu, byŭ uvieś čas doma i adčuvaŭ siabie vielmi dobra. Ale ŭ adzin momant jamu stała ciažka havaryć i ruchać pravaj častkaj svajho cieła. Tamahrafija pakazała vialikuju zakuparku sasuda ŭ levaj častcy hałavy. Analiz taksama pakazaŭ infikavańnie COVID-19.

A dalej Tomas Okśli raskazvaje pra vidovišča, jakoha jon, jak lekar, nikoli ŭ svaim žyćci nia bačyŭ i jakoje vyklikała ŭ jaho žach.

Zvyčajna na manitorach, kaža doktar Okśli, mozh vyhladaje jak zhustak čornych zahahulin, jaki nahadvaje spahieci ŭ słoiku. Tromb na ich fonie vyhladaje jak pustoje miesca. I voś kali chirurh uvioŭ doŭhuju ihłu, kab vydalić tromb, jon z žacham ubačyŭ jak vakoł jaho pačali farmavacca novyja tromby. «Heta było šalenstva», — kaža lekar.

Našmat bolšaja pahroza, čym ličyłasia dahetul

Paviedamleńniaŭ ab insultach u maładych ludziej źjaŭlajecca ŭsio bolš, i jakraz jany pačynajuć istotna mianiać ujaŭleńnie čałaviectva pra novuju chvarobu, jakaja paraziła śviet, piša The Washington Post. Pakul takich paviedamleńniaŭ u paraŭnańni z usioj statystyki chvarobaŭ niašmat, ale jany istotna ŭpłyvajuć na razumieńnie karanavirusu novaha typu.

Jašče niadaŭna hety patahien ličyŭsia virusam, jaki paražaje lohkija čałavieka. Ale ciapier zrazumieła, što jon akazaŭsia našmat bolš pahroźlivym praciŭnikam ludziej i paražaje praktyčna ŭsie asnoŭnyja systemy ŭ arhaniźmie čałavieka.

Ciapier try bujnyja medyčnyja centry ZŠA rychtujuć publikacyju ab svaich nazirańniach za vypadkami insultaŭ u maładych pacyjentaŭ z COVID-19 i zroblenych imi vysnovach.

Tajamničaje ŭskładnieńnie

Adzin z takich centraŭ — špital Tomasa Džefersana ŭ Filadelfii. Neŭrachirurh hetaj ustanovy Paskal Džabur nazyvaje mazhavyja tromby tajamničym uskładnieńniem zhortvańnia kryvi ŭ «kavidnych» pacyjentaŭ. Lekar kaža, što ŭ maładych ludziej utvarajecca adrazu niekalki trombaŭ u mozhu, što vielmi niezvyčajna.

«Pakul my budziem paśpiachova lačyć adzin pierakryty trombam sasud, u pacyjenta moža zdarycca surjozny insult u inšaj častcy mozhu», — kaža Paskal Džabur.

Nadzieja na antytramboznuju terapiju

The Washington Post taksama pryvodzić śviedčańnie doktara Tomasa Okśli ab pośpiechu lačeńnia mazhavych uskładnieńniaŭ u pacyjentaŭ COVID-19 pry dapamozie antytramboznaj terapii.

Doktar raskazvaje pra 33-hadovuju raniej całkam zdarovuju pacyjentku, jakaja trapiła ŭ lakarniu paśla taho, jak praz tydzień hałaŭnoha bolu i kašlu ŭ jaje aniamieła levaja častka cieła. Tamahrafija pakazała, što ŭ pacyjentki ŭ mozhu dva tromby, a ŭ lohkich — plamy «matavaha škła», typovaha symptomu COVID-19. Pacyjentka atrymała dva vidy terapii, nakiravanaj na razbureńnie trombaŭ, i na 10-ty dzień była dastatkova zdarovaj, kab jaje vypisali.

***

Na nastupnym tydni try vialikija kamandy amerykanskich lekaraŭ apublikujuć u časopisie New England Journal of Medicine svaje vysnovy ab lačeńni insultaŭ u maładych pacyjentaŭ z COVID-19.

• 0
• 0
• 0
• 0
• 0
• 0
• 0
• 0