Siabry Sieviarynca: Jon sprabavaŭ uskryć vieny ŭ karcary ŭ znak pratestu suprać katavańniaŭ. Maci: Jon prosta razdrapaŭ ruku

Palityka Paŭła Sieviarynca ŭ čarhovy raz sudzili. Pasiedžańnie adbyvałasia pa skajpie, bo palityk znachodzicca na sutkach u karcary Izalatara časovaha ŭtrymańnia

«Pavieł zajaviŭ, što znachodzicca ŭ karcary IČU ŭ biesčałaviečnych umovach. Skazaŭ, što ŭ znak pratestu suprać katavańniaŭ jaho i inšych palityčnych, jakija znachodziacca tam ža, daviałosia ŭskryć vieny», — paviedamiŭ u siabie ŭ fejsbuku siabar palitviaźnia Alaksiej Šein.

Jon tłumačyć, što ŭ sudzie prahučała fraza «parezać ruku». Šein interpretavaŭ situacyju tak, što Sieviaryniec zrabiŭ niešta, kab vystupiła kroŭ. 

Mama Paŭła, Taćciana Sieviaryniec piarečyć: «Paša padrapaŭ sabie ruku. I navat nie z taho boku, dzie zapiaście. Jon chryścijanin i nie moža ŭskryvać vieny».

43-hadovy Pavieł Sieviaryniec — kiraŭnik Biełaruskaj chryścijanskaj demakratyi, niezarehistravanaj apazicyjnaj palityčnaj partyi.

Akramia taho, jon viadomy jak piśmieńnik i publicyst. Jaho zatrymali 7 červienia paśla pikieta na Kamaroŭcy ŭ padtrymku Śviatłany i Siarhieja Cichanoŭskich. Na nastupny dzień jon byŭ asudžany na 15 sutak.

Paźniej jahonaja žonka Volha Sieviaryniec paviedamiła, što palityku naličyli dadatkovyja sutki — tak, kab jon nie vyjšaŭ z-za krataŭ da samych prezidenckich vybaraŭ.

«Siońnia pazvaniŭ čałaviek, jaki siadzieŭ z Paŭłam, i skazaŭ, što Paŭłu dali jašče 2 pratakoły pa 15 sutak — ahułam atrymlivajecca 75 sutak [u jaho byli nie «adbytyja» ź zimy sutki, paśla akcyj suprać pahłybleńnia intehracyi z Rasijaj — NN]».

Volha piša, što ŭ muža zabrali ŭsie rečy, u tym liku zubnuju ščotku, ciopłuju vopratku, srodki hihijeny, a taksama ŭžo dva razy adpraŭlali ŭ karcar, dzie vielmi chałodna. «Paša prosicca, kab pieradali pieradaču choć niejkuju, ale my nie možam hetaha zrabić, bo pieradačy nie prymajuć», — paskardziłasia jana.

Sieviaryniec nie raz apynaŭsia za kratami pa palityčna matyvavanych spravach, u tym liku ŭ 1998 hodzie «za zryŭ kancerta, pryśviečanaha biełaruska-rasijskaj intehracyi», u 2004 hodzie, kali jon byŭ asudžany da «chimii» za toje, što vyvieŭ minčukoŭ na pratest suprać źniaćcia abmiežavańnia na kolkaść prezidenckich terminaŭ, i ŭ 2010-m — jak kiraŭnik štaba adnaho z kandydataŭ u prezidenty.

Čytajcie taksama: Babaryka pra admovu ŭ rehistracyi: Ujavicie, što na padaču skarhi pryjdzie 300 tysiač čałaviek

U 2010 hodzie Biełaruś trapiła ŭ knihu rekordaŭ Hinesa jak kraina, dzie rekordnuju kolkaść kandydataŭ u prezidenty zatrymali ŭ noč paśla vybaraŭ.

Padčas kampanii 2006 hoda zatrymańni nasili masavy charaktar, ale jany adbyvalisia niepasredna pierad dniom hałasavańnia, a nie za dva-try miesiacy da jaho.

Hetym razam brutalnyja represii adbyvajucca ŭžo za niekalki miesiacaŭ da vybaraŭ. Pavodle źviestak, sabranych pravaabroncami z centra «Viasna», ad 6 maja bolš za 100 palityčnych aktyvistaŭ, klučavych asobaŭ u štabach pretendentaŭ na pasadu prezidenta i siabroŭ ich inicyjatyŭnych hrup byli aryštavanyja pa kryminalnych spravach abo asudžanyja pa administratyŭnych. 

Čytajcie taksama: «Heta nahadvaje vybary ŭ afrykanskich dyktaturach, a nie ŭ Jeŭropie»

U Paŭła Sieviarynca doma zastajecca 2-hadovy syn.

• 0
• 0
• 0
• 0
• 0
• 0
• 0
• 0