U dvaccaci štatach ZŠA tysiačy ludziej atrucilisia mieksikanskaj sałataj. Dvoje naśmierć
Centry pa kantroli i prafiłaktycy zachvorvańniaŭ ZŠA i Administracyja pa kantroli za praduktami i lekami rasśledujuć uspyšku ŭ krainie cykłasparozu. Pavodle apošnich danych, z hetaj uspyškaj źviazanyja ŭžo 11 458 vypadkaŭ zachvorvańnia. Nie mienš za 495 čałaviek byli špitalizavanyja. Zafiksavanyja dva śmiarotnyja vypadki, abodva ŭ štacie Mičyhan, piša The Washington Post.
Mnohija chvoryja raskazvali, što charčavalisia ŭ restaranach Taco Bell. Prykładna 90% apytanych pacyjentaŭ užyvali sałatu ajśbierh.
Rasśledavańnie pryviało śpiecyjalistaŭ da adnaho z pastaŭščykoŭ — mieksikanskaj kampanii Taylor Farms de Mexico, jakaja pastaŭlała sałatu z centralnaj častki Mieksiki. Kampanija jašče 17 lipienia adklikała adpaviednuju pradukcyju z amierykanskaha rynku, a Taco Bell spyniła jaje vykarystańnie.
Adklikańnie taksama zakranuła niekatoryja ŭpakoŭki sałaty i narezanaha ajśbierha marki Marketside, jakija pradavalisia ŭ sietcy Walmart, a taksama pradukcyju, što pastaŭlałasia ŭ restarany i inšyja ŭstanovy hramadskaha charčavańnia ŭ roznych štatach.
Pry hetym pieršapačatkovy łabaratorny test, jaki pakazaŭ najaŭnaść parazita, paśla paŭtornaj pravierki pryznali pamyłkovym. Suviaź sałaty z uspyškaj vyznačyli na padstavie epidemijałahičnych danych i adsočvańnia łancužka pastavak. Daśledavańnie ŭzoraŭ praciahvajecca.
Pamiž užyvańniem zaražanaha praduktu, źjaŭleńniem simptomaŭ, zvarotam da ŭrača i praviadzieńniem analizaŭ moža prajści da šaści tydniaŭ. Akramia taho, realnaja kolkaść vypadkaŭ, vierahodna, bolšaja, bo častka ludziej pieranosić chvarobu bieź miedycynskaj dapamohi i adpaviednaha testavańnia.
U cełym pa ZŠA zafiksavali 17 180 vypadkaŭ cykłasparozu, nabytaha ŭnutry krainy. U hetuju ličbu ŭvachodziać nie tolki vypadki, źviazanyja z sałataj. Heta amal u 15 razoŭ bolš, čym za anałahičny pieryjad minułaha hoda, kali było zarehistravana 1180 vypadkaŭ.
Pry hetym krynicy zaražeńnia ŭ niekalkich inšych uspyškach cykłasparozu pakul nie vyjaŭlenyja.
Cykłasparoz vyklikaje mikraskapičny parazit Cyclospora cayetanensis, jaki traplaje ŭ arhanizm praz zabrudžanuju ježu abo vadu. Zvyčajna prykładna praz tydzień źjaŭlajucca vadki panos, boli i ŭzdućcie žyvata, młosnaść, strata apietytu, źnižeńnie vahi i stomlenaść. Bieź lačeńnia simptomy mohuć zachoŭvacca niekalki tydniaŭ, źnikać, a potym viartacca. Najbolš ciažka infiekcyja moža praciakać u dziaciej, pažyłych ludziej i ludziej z asłablenym imunitetam.
U metach prafiłaktyki śpiecyjalisty rajać staranna pramyvać harodninu pad pratočnaj vadoj, vydalać paškodžanyja častki i źniešniaje liście, zachoŭvać narezanyja pradukty ŭ chaładzilniku i nie dapuskać ich kantaktu z syrym miasam. Adnak zvyčajnaje myćcio nie harantuje poŭnaha vydaleńnia parazita.
Ciapier čytajuć
Telegram vydaliŭ svoj aficyjny biełaruski kanał — vierahodna, kab nie padstaŭlać ludziej. Ale mnohija paśpieli padstavicca2
Kamientary