Piać hadoŭ tamu sietka «Vostraŭ čyścini i smaku» naličvała 750 abjektaŭ i była adnym ź lidaraŭ biełaruskaha rytejłu. Zasnavalnik biznesu Viktar Ramuk kantralavaŭ nie tolki roźnicu, ale i fabryku bytavoj chimii «Romaks», sietku aptek i šerah inšych profilnych aktyvaŭ. Adnak u 2022 hodzie biznes daŭ treščynu na fonie finansavych pralikaŭ, daŭhavoj nahruzki i pretenzij z boku kantrolnych struktur. Vynikam stała bankructva kampanij hrupy «Romaks». Paźniej handlovyja płoščy, jakija vyzvalilisia, pačali zajmać novyja hulcy. Vydańnie Office Life raskazvaje, što adbyvajecca ź imi ciapier.
«Vostraŭ» / «Vinapolis»
U 2024 hodzie kantrol nad častkaj kram «Vostraŭ čyścini i smaku», jakaja zastałasia, pierajšoŭ da TAA «AjłandHrup» (niekalki dzion jaje ŭładalnikam prabyŭ Alaksandr Pupał, potym ułaśnikam staŭ hramadzianin Rasii Alaksiej Makšancaŭ).
U kancy 2025 hoda novy apieratar pravioŭ rebrendynh: handlovyja abjekty praciahnuli pracu pad absiečanaj šyldaj «Vostraŭ», a paźniej na rynku źjavilisia śpiecyjalizavanyja punkty «Vinapolis».
Na toj momant abnoŭlenaja sietka naličvała 55 kram. Adnak ciapier nazirajecca tendencyja da skaračeńnia biznesu. Pavodle danych aficyjnaha sajta rytejlera, u sietcy ličacca tolki 34 abjekty.
Ale, jak zaŭvažyŭ Office Life, u dziejnych kramach možna ŭbačyć paŭpustyja palicy, a šerah handlovych punktaŭ pracuje tolki da 31 žniŭnia. Sajty i sacyjalnyja sietki brendaŭ nie abnaŭlalisia z kanca lipienia.
U mai 2026 hoda pasadu dyrektara sietki pakinuŭ Kanstancin Staravojtaŭ, pra što jon paviedamiŭ u sacsietkach.
Za 2025 hod vyručka «AjłandHrup» skłała 35,5 miljonaŭ rubloŭ, čystyja straty — amal 11,5 miljonaŭ rubloŭ.
«DNC-markiet»
Paralelna ŭ pačatku 2025 hoda były top-mieniedžar hrupy «Romaks» Anatol Pryhodzič stvaryŭ kampaniju «DNC-Markiet», jakaja pačała adkryvać kramy pad adnajmiennaj handlovaj markaj. Jaje pieršy abjekt adkryŭsia ŭ Žodzinie. Nastupnaja krama źjaviłasia ŭ stalicy na rynku «Uručča-3». Była ideja stvaryć kramy «sapraŭdy nizkich cen» (DNC — «diejstvitielno nizkije cieny»). Farmat pazicyjanavaŭsia jak hibryd kłasičnaj kramy i zručnaj składskoj prastory. Pry hetym było abvieščana pra partniorstva z fabrykaj «Romaks».
Kampanija anansavała zapusk sietki pa ŭsioj krainie. Pavodle danych Handlovaha rejestra, za arhanizacyjaj ciapier ličycca 12 abjektaŭ (dva apošnija byli zarehistravanyja ŭ kancy sakavika 2026 hoda ŭ minskim HZC «Civali» i ŭ Lidzie). Prykmietna, što častka kram adkryvałasia na byłych łakacyjach «Vostrava čyścini».
Adnak maštabavać biznes nie ŭdałosia. Zhodna ź infarmacyjaj z časopisa «Justicija Biełarusi», ź siaredziny žniŭnia «DNC-Markiet» znachodzicca ŭ pracesie likvidacyi pa rašeńni ŭłaśnikaŭ.
Pavodle apošnich danych, u kampanii zastałosia dva ŭładalniki: Anatolu Pryhodziču naležyć 88%, a 12% kantraluje minskaje TAA «LinvaRent» (uvajšło ŭ skład zasnavalnikaŭ u červieni 2026 hoda).
U pačatku hoda kampanija aktyŭna šukała inviestaraŭ dla ŭvachodu ŭ roźničny biznes. Razhladalisia roznyja varyjanty: ad pryciahnieńnia zvarotnaj pazyki da pieradačy doli va ŭstanoŭčym kapitale z pravam udziełu ŭ apieratyŭnym kiravańni.
Da pačatku pracedury likvidacyi ŭ kampanii źmianiłasia šeść kiraŭnikoŭ. Pakazalna, što apošnim dyrektaram staŭ sam zasnavalnik «Vostrava čyścini» Viktar Ramuk, jaki prapracavaŭ na hetaj pasadzie z 19 maja pa 18 žniŭnia 2026 hoda.
Niezadoŭha da zakryćcia, u siaredzinie lipienia 2026 hoda, «DNC-Markiet» pieradaŭ pravy na čatyry tavarnyja znaki (HAPPY HOUSE, «KRIEPYŠ», «EKONOḾ-KA» i MISTER LUDWIG) kampanii «Fabryka Romaks».
Što tyčycca finansavych pakazčykaŭ, to za 2025 hod «DNC-Markiet» spracavaŭ z čystymi stratami ŭ 633 tysiač rubloŭ pry vyručcy ŭ 842 tysiač.
«Vostraŭ čyścini» adkryvajuć pad novaj nazvaj
Što ciapier z kramami «Vostraŭ čyścini»?
Stała viadoma, kamu adyšła častka «Vostrava čyścini»
Brend zbankrutavanaj sietki «Vostraŭ čyścini i smaku» novyja ŭłaśniki abiacajuć zachavać
«Nie mahła navat ujavić, što takaja sietka zhaleje». Što adbyvajecca z «Vostravam čyścini», raspaviali pradaŭcy
«Vostraŭ čyścini» adkryje kramy, jakija začynilisia — uładalnik sietki znajšoŭ rasijskaha inviestara
Kamientary