Ź Leŭčanka, Hierasimieniaj, Snycinaj, Mieščarakovymi: 10 atletaŭ zajavili ab stvareńni Svabodnaha abjadnańnia spartsmienaŭ Biełarusi

Viadomyja biełaruskija spartsmieny zajavili ab stvareńni svabodnaha abjadnańnia spartsmienaŭ Biełarusi. Siarod ich — zasłužanyja atlety i zornyja čempijony. Da hetaha ich vymusili padziei apošniaha miesiaca ŭ našaj krainie. Pra heta paviedamlaje kp.by.

Śpis inicyjataraŭ:

Ściapan Papoŭ, čempijon śvietu i Jeŭropy, pieršych Jeŭrapiejskich hulniaŭ, zasłužany majstar sportu Biełarusi, łaŭreat publičnaha konkursu « Tryumf. Hierojam sportu», uładalnik mižnarodnaj uznaharody Fair Play;

Alena Leŭčanka, majstar sportu mižnarodnaha kłasa, bronzavy pryzior čempijanatu Jeŭropy, čempijon Zachodniaj kanfierencyi žanočaha NBA (WNBA), lepšaja centravaja čempijanatu śvietu 2010 hoda, finalistka WNBA, udzielnica dźviuch alimpijad;

Alaksandra Hierasimienia, trochrazovy pryzior Alimpijskich hulniaŭ, čempijonka śvietu i Jeŭropy;

Mikita Mieščarakoŭ, člen nacyjanalnaj kamandy pa baskietbole 3×3, pryzior Jeŭrapiejskich hulniaŭ, vaśmirazovy čempijon Biełarusi pa baskietbole;

Jahor Mieščarakoŭ, majstar sportu, čempijon Jeŭropy (U-22) 1994, čempijon Biełarusi i Ukrainy, vice-čempijon Rasii, hulec nacyjanalnaj zbornaj 1995-2012, lepšy hulec Biełarusi 1998, 2001, 2002, 2008, 2009 hadoŭ;

Artur Udrys, člen nacyjanalnaj zbornaj pa valejbole, bronzavy pryzior kłubnaha čempijanatu śvietu, Rasijskaj Supierlihi, Kubka Paŭdniovaj Karei, Kubka i čempijanatu Katara, trochrazovy čempijon Biełarusi;

Nadzieja Astapčuk, čempijonka śvietu i Jeŭropy pa lohkaj atletycy (Šturchańnie jadra);

Kaciaryna Snycina, kapitan nacyjanalnaj kamandy Biełarusi pa baskietbole, bronzavy pryzior čempijanatu Jeŭropy, udzielnik dźviuch Alimpijskich hulniaŭ;

Alaksandr Apiejkin, zasnavalnik handbolnaha kłuba «Viciaź», kaardynatar Biełaruskaha fondu spartyŭnaj salidarnaści, inśpiektar pa markietynhu Jeŭrapiejskaj handbolnaj Fiederacyi;

Kanstancin Jakaŭleŭ, hałoŭny trenier handbolnaha kłuba «Viciaź», majstar sportu, šmatrazovy čempijon i ŭładalnik kubka Biełarusi, siarebrany pryzior kubka Polščy.

«Za svajo žyćcio ja nikoli nie hałasavała na vybarach. Zaŭsiody ličyła, što moj hołas ničoha nie vyrašyć, ale hety žnivień źmianiŭ majo mierkavańnie ab samoj sabie. Vy ŭsie bačyli fatahrafiju, jakaja źjaviłasia praz paru dzion paśla hałasavańnia: dziadula, ścisnuŭšy kułaki, staić nasuprać bajca AMAPa. Ubačyŭšy jaje, ja zrazumieła: ja bajusia nie taho, što moj hołas ničoha nie źmienić, jak sama siabie supakojvała, a taho, što kali chacieć čahości bolšaha dla krainy, dla siabie jak hramadzianina, to stanie tolki horš. Što kali pajści suprać sistemy, to hetaja sistema mianie złomić.

Ale my ŭsie ŭ hetym žyćci robim vybar, i ja vybrała bolš nie maŭčać pra toje, što adbyvajecca. Nie čakać, pakul inšyja zmahajucca za lepšaje žyćcio, a jak hety dziadula, ścisnuŭšy kułaki, z rašučaściu na tvary, choć i strašna, ale stajać za svajo prava chacieć pieramien, za prava na lepšaje žyćcio», — skazała Kaciaryna Snycina.

Spartsmieny patrabujuć pravieści paŭtornyja vybary prezidenta Biełarusi, vyzvalić usich hramadzian, zatrymanych padčas demanstracyj i niedatyčnych da supraćpraŭnaj dziejnaści, vyzvalić i reabilitavać usich palityčnych źniavolenych, pravieści pravierki zakonnaści dziejańniaŭ supracoŭnikaŭ pravaachoŭnych orhanaŭ, pačynajučy z momantu zboru podpisaŭ dla vyłučeńnia ŭ kandydaty ŭ prezidenty Biełarusi, vyjavić i pakarać vinavatych u źbivańniach i ździekach nad hramadzianami, zatrymanymi padčas mirnych demanstracyj.

• 0
• 0
• 0
• 0
• 0
• 0
• 0
• 0