Za dzień da kancerta admianili vystup hurta J:Mors u Maładziečnie

Siońniašni kancert hurta «J:Mors» u amfiteatry ŭ Maładziečnie admianili za dzień da vystupleńnia. Pałac kultury aficyjna zajaviŭ, što ŭsio z-za karanavirusa i taho fakta, što ludzi ŭ apošnija dni z-za prahnozu nadvorja zdavali kvitki. Ale lidar hurta Uładzimir Puhač hetyja pryčyny nazyvaje tryźnieńniem i ličyć, što rekamiendacyja nie pravodzić kancert «J: Mors» pastupiła ŭ Maładziečanski rajvykankam «źvierchu», piša TUT.BY. 

Pavialičyć

Damovu na kancert hurta «J: Mors» arhanizatar mierapryjemstva i Dziaržaŭnaja ŭstanova Pałac kultury Maładziečna zaklučyli jašče 15 studzienia. Z-za karanavirusa jon pieraniośsia: spačatku na leta, potym i na vosień. Pavinien byŭ prajści siońnia, 10 vieraśnia, ale za sutki da mierapryjemstva arhanizataru (pryvatnamu kancertnamu ahienctvu «4A-ivent») pryjšoŭ list, u jakim havaryłasia, što ŭ suviazi z epidemijałahičnym stanoviščam, rekamiendacyjaj Ministerstva achovy zdaroŭja i drennym nadvorjem, z-za jakoha haradžanie zdajuć kvitki, pravodzić kancert niemetazhodna.

— Da ciapierašniaha času epidemijałahičnaja situacyja nie stabilizavałasia, što ŭpłyvaje na realizacyju kvitkoŭ, i, adpaviedna, na rentabielnaść prajekta. Akramia taho, u apošni čas hramadzianie ažyćciaŭlajuć viartańnie biletaŭ u suviazi z prahnoznymi niespryjalnymi ŭmovami nadvorja. Uličvajučy heta, pravodzić mierapryjemstva ličym niemetazhodnym, — skazana ŭ aficyjnym adkazie Pałaca kultury za podpisam jaho dyrektara Śviatłany Saroki.

Mienavita hety aficyjny list hurt apublikavaŭ u svaim Instagram i napisaŭ, što jašče ŭčora ŭviečary jany repietavali i rychtavalisia sustrecca z žycharami Maładziečna na kancercie ŭ amfiteatry, ale administracyja «litaralna za sutki da kancerta ŭśviadomiła składanaść epidemijałahičnaj situacyi ŭ horadzie».

Uładzimir kaža, što im mahli prapanavać nie admianiać kancert, a znoŭ pieranieści, jak heta ŭžo niekalki razoŭ rabili.

— My b prosta paprasili prabačeńnia pierad hledačami i žyli b niejak dalej. Ale kali ludzi, jakija nabyli kvitki, daviedvajucca ŭ dzień kancerta, što jon admianiajecca, heta niepryhoža. Situacyja mnie padkazvaje, što sam DK byŭ hatovy pravodzić kancert, ale chutčej za ŭsio im parekamiendavali niejkija vyšejšy arhanizacyi jaho nie pravodzić. Pazicyja hrupy takaja: niepraviadzieńnie kancerta na samaj spravie nie maje nijakaha dačynieńnia da ŭkazanych u aficyjnym liście pryčyn.

Tym nie mienš hurt skarystaŭsia situacyjaj i tymi arhumientami, jakija Pałac kultury pradjaviŭ im u jakaści padstavy dla admieny kancerta.

— My nastajali na tym, kab nie admianiać kancert, a jašče raz pieranieści. I Pałac kultury pahadziŭsia, pryznačyli novuju datu — 11 śniežnia. Na moj pohlad, razvažali jany jak u viadomaj prypavieści: da hetaha momantu albo išak zdochnie, albo padyšach.

Surazmoŭca nie ahučvaje svaje zdahadki, čamu siońniašni kancert mahli admianić. Adznačym, što hurt publična padtrymlivaŭ pratestoŭcaŭ i navat davaŭ niekalki biaspłatnych kancertaŭ. Naprykład, jany jeździli ŭ Salihorsk da šachcioraŭ u pieryjad zabastoŭki, kab padbadzioryć ich.

• 0
• 0
• 0
• 0
• 0
• 0
• 0
• 0