Paet Dźmitryj Strocaŭ asudžany sudom Centralnaha rajona Minska na 13 sutak administracyjnaha aryštu za ŭdzieł u «niesankcyjanavanym mierapryjemstvie». Sudziła paeta sudździa Viktoryja Šabunia, piša Radyjo Svaboda.
«Sudzili pa 23.34, — raskazała jaho žonka Hanna Strocava, jakaja była na sudzie. — Nibyta jość videa ź niejkaj kamiery, na jakim 4 kastryčnika pobač ź Dźmitryjem idzie kałona ludziej sa ściahami. A jon pakazvaje «viktoryju». Heta ciapier dastatkova, kab pasadzić čałavieka na 13 sutak».
Dźmitryj, pa słovach Hanny, na sudzie raspavioŭ, što zatrymali jaho kala ich doma. «Zatelefanavać svajakam nie dali, — kaža Hanna. — Ale niedzie kala 19-j hadziny jamu skazali, što mnie paviedamili. Choć heta niapraŭda, my a 23-j viečara ŭčora padavali zajavu pra źniknieńnie čałavieka».
Pa słovach Hanny, muž vyhladaje narmalna, nakolki heta było vidać praz ekran u skajpie. Ni na što nie skardziŭsia. Ciapier jana sprabuje paśpieć pieradać nieabchodnyja jamu leki.
«U jaho nie vielmi dobraja kardyjałahičnaja situacyja, — kaža jana. — Jon uvieś čas prymaje padtrymlivajučyja leki. I jon alerhik, u jaho branchijalna-lohačnaha płanu alerhija, leki jamu nieabchodnyja».
Dźmitryj Strocaŭ udzielničaŭ u akcyjach pratestu suprać falsifikacyi vybaraŭ i adkryta pisaŭ pra heta. Pra situacyju ŭ krainie jon kazaŭ i ŭ svajoj tvorčaści — niekatoryja jahonyja vieršy ŭžo pierakładzienyja na inšyja movy.
Ciapier čytajuć
Kolkaść achviar vybuchu ŭ maskoŭskim elitnym restaranie na jubilei hienierała, jaki kamandavaŭ nastupam na Kijeŭ ź Biełarusi ŭ 2022-m, vyrasła da piaci čałaviek44
Kamientary