Sychod sudździaŭ u adstaŭku pa ŭłasnym žadańni — nietypovaja źjava. Prosta tak zvolnicca nielha, treba čakać prezidenckaha ukaza ab masavych pryznačeńniach i adstaŭkach. U śviežym ukazie (№487 ad 24 śniežnia 2020) naličyłasia piać čałaviek, jakija vyrašyli syści. U niekatorych ź ich piacihadovy kantrakt pačaŭsia dva miesiacy tamu — ale sudździ zvolnilisia.
Chto hetyja ludzi? Udakładnim, što matyvacyja sudździaŭ nie traplaje ŭ publičny dostup. Dla kahości pryčynaj moža być hramadskaja pazicyja, dla inšych stan zdaroŭja ci inšaja arhumientacyja.
Alaksiej Byčko, Minski haradski sud
Staŭ sudździoj Centralnaha rajona Minska jašče ŭ 2004 hodzie. U kancy 2000-ch davaŭ pa 15 sutak i maładafrontaŭcam, i pradprymalnikam, i palityku Viktaru Ivaškieviču.
U 2011 hodzie sudździa trapiŭ pad sankcyi Jeŭrasajuza. U 2012 pajšoŭ na pavyšeńnie ŭ Minski haradski sud.
Kantrakt Byčko dziejničaŭ da 2022 hoda, ale jon vyrašyŭ syści daterminova.
Alaksiej Kiślak, sud Leninskaha rajona Minska
Hety sudździa adpracavaŭ z novaha piacihadovaha kantrakta trochi bolš za hod — i paprasiŭsia ŭ adstaŭku. Da vybaraŭ praź jaho prajšli jak minimum 15 pracesaŭ. Kiślak sudziŭ u tym liku Mikołu Statkieviča, Eduarda Palčysa, piśmieńnika Uładzimira Arłova.
Kiślak nikoha nie adpraviŭ na sutki, ale davaŭ bujnyja štrafy. U bazie sajta Zubr.cc niama nivodnaj palityčnaj spravy, jakuju jamu b daručyli pravieści paśla vybaraŭ.
Ivan Kaścian, sud Centralnaha rajona Minska
Heta ŭnuk eks-deputata Siarhieja Kaściana, zaciataha prychilnaha słavianskaha adzinstva.
Ivan Kaścian pracavaŭ sudździoj z 2017 hoda. Sudziŭ mnohich viadomych dziejačaŭ apazicyi — Jurasia Hubareviča, Mikałaja Kazłova, Źmitra Daškieviča, Ninu Bahinskuju, Maksima Viniarskaha… Davaŭ 15 sutak Paŭłu Sieviaryncu.
Pa artykule 23.34 ahułam vydaŭ štrafaŭ na 60 tysiač rubloŭ, prysudziŭ 139 sutak
Taćciana Trapaška, sud Žodzina
Novy piacihadovy kantrakt u jaje pačaŭsia… tolki dva miesiacy tamu.
U bazie Zubr.cc paznačana try palityčnyja pracesy, jakimi zajmałasia Trapaška. Usie try razy jana davała demanstrantam pa 10 bazavych vieličyniaŭ i adpuskała ź SIZA.
Vital Janiuk, sud Navapołacka
Aktyŭnaść u Navapołacku była nie takaja vialikaja, u bazie niama źviestak pra palityčnyja pracesy Janiuka. Novy kantrakt pačaŭsia ŭ jaho ŭ lutym 2020 hoda.
Aproč taho, Uładzimir Kosmač paprasiŭsia ŭ adstaŭku z pasady staršyni Hancavickaha suda, ale zastaŭsia prosta sudździoj.
Ciapier čytajuć
Advakat Dźmitryj Lepretar raskazaŭ pra biełyja plamy ŭ spravie ab terakcie ŭ mietro11
Kamientary