Miesidž Maskvy: maŭčycie ŭ anučku, vy ž bieź piaci chvilin bankruty!
Pakul Łukašenka z Pucinym abmieńvalisia banalnaściami na temu «sajuznaha budaŭnictva», hałoŭnym ńjuśmiejkieram u kułuarach staŭ rasijski vice-premjer Alaksiej Kudryn. Jon vydaŭ presie niekalki sakretaŭ, razhałošvańnie jakich zusim niedarečy biełaruskamu načalstvu. Piša ŭ svaim błohu na NN Alaksandr Kłaskoŭski.
Vizit rasijskaha premjera sa śvitaj 28 traŭnia ŭ Minsk staŭ dla haspadaroŭ ciažkim vyprabavańniem. Pakul Łukašenka z Pucinym abmieńvalisia banalnaściami na temu «sajuznaha budaŭnictva», hałoŭnym ńjuśmiejkieram u kułuarach staŭ rasijski vice-premjer Alaksiej Kudryn.
Usio pačynałasia pryhoža. Biełaruski aficyjny lider u lepšych tradycyjach intehracyjnaj rytoryki vykazaŭ pierad telekamierami spadzieŭ, što jahonaja razmova z Pucinym akažacca «karysnaj dy praduktyŭnaj» i, kaniečnie ž, prasunie pabudovu «sajuznaj dziaržavy».
Ale tym časam u kułuarach siabar i paplečnik Pucina Alaksiej Kudryn zładziŭ dla biełaruskaha načalstva chałodny duš. Vice-premjer i ministr finansaŭ Rasii vydaŭ presie niekalki sakretaŭ. Vyśvietliłasia, što Minsk prosić u Maskvy kredyt na 9 miljardaŭ dołaraŭ pad AES. Akramia taho, biełaruskaje kiraŭnictva admoviłasia brać apošniuju tranšu raniejšaha kredytu (paŭmiljarda dołaraŭ) rasijskimi rublami. Bač ty, maŭlaŭ, jašče i nosam kruciać, chacia sami kazali, što da zarezu patrebny rasijskija rubli va ŭzajemaraźlikach!
I ŭžo zusim jak nož vostry była zajava Kudryna, što da kanca hoda Biełaruś moža stać niepłaciežazdolnaj.
«My možam sutyknucca ź niepłaciežazdolnaściu biełaruskaha ŭrada i uvohule ekanomiki ŭ źviazku ź niedastatkovaściu zołatavalutnych reziervaŭ, mahčyma, navat pry kancy hoda sioleta, a moža praz hod», — skazaŭ Kudryn.
Ź jaho słoŭ vynikaje, što ni 500 miljonaŭ apošniaj tranšy, ni tym bolej 9 miljardaŭ Maskva davać nie śpiašajecca. Pazicyju Minska Kudryn biez ekivokaŭ nazvaŭ utrymanskaj. Jon raźbiŭ u puch «biełaruskuju madel» za anachranizm i adsutnaść sapraŭdnych reformaŭ.
Dadamo: tema zamiežnaj zapazyčanaści dla biełaruskaha kiraŭnictva nadta adčuvalnaja. Ad elektaratu usialak utojvajuć, kolki ŭžo nachapali kredytaŭ, kab zatknuć finansavyja dzirki. Łukašenka ni słovam nie zhadaŭ pra heta ŭ niadaŭnim pasłańni narodu i parłamientu. Kali Maskva pačnie metanakiravana krucić kružełku «Vašy finansy śpiavajuć ramansy», to ŭtojvać šyła ŭ miachu stanie značna ciažej.
Zajavy Kudryna vyhladajuć jak adkaz na artpadrychtoŭku, što vioŭ pierad vizitam Pucina biełaruski bok, vinavaciačy Maskvu ŭ błakavańni supolnaha antykryzisnaha płana dy nievykanańni inšych sajuźnickich abiacańniaŭ ekanamičnaha kštałtu (pamiatajecie: «Dyk našto nam heta intehracyja?»). Padtekst maskoŭskaha adkazu prosty: maŭčycie ŭ anučku, vy ž bieź piaci chvilin bankruty!
Jak zaŭždy ŭ stasunkach miž Maskvoj i Minskam, tut źmiašany ŭ adnym fłakonie ekanomika i palityka. Rasija choča adchvastać nie tolki za ŭtrymanskija zamaški dy kinutyja napiaredadni kamiani ŭ harod Pucina, ale jašče i za huli ź Jeŭropaj dy niepryznańnie kaŭkazskich respublik.
Zrešty, paśla takich vychavaŭčych zachadaŭ Kreml zvyčajna dabreje i niešta daje. Usio ž strašnavata stračvać apošniaha chaŭruśnika, chaj sabie i davoli ślizkaha.
Cikava, jakija kozyry vykładzie zaraz na stoł Łukašenka? Darečy, siońniašnija padziei jaskrava ilustrujuć, našto jamu spatrebiŭsia jeŭrapiejski viektar. Ujavim sabie, što było b, kali b pavodle parad niekatorych stratehaŭ-maksimalistaŭ Jeŭraźviaz adnaviŭ by ścianu błakady. Prypierci biełaruskaje načalstva da hetaj ścienki dla Kramla tady — tolki sprava techniki.
Sočym za raźvićciom siužetu. Jašče nie viečar.
ZY. Uviečary stała zrazumieła, što Pucin z Kudrynym razyhrali schiemu dobraha i złoha śledčych. Na vynikovaj pres-kanfierencyi rasijski premjer patetyčna zajaviŭ, što Rasija zaŭsiody padstavić plačo. Skazaŭ, što Biełaruś budzie płacić za haz miakkuju siaredniehadavuju canu. Paabiacaŭ pradoŭžyć kredytnuju padtrymku. Nu a Kudryna nazvaŭ libierałam i daŭ zrazumieć, što toj, mahčyma, trochi pierahnuŭ kij.
Napružanyja pieramovy zaklatych chaŭruśnikaŭ skončylisia, takim čynam, ledźvie nie na idyličnaj nocie. Jakaja nikoha nie moža ŭvieści ŭ zman.
«My jamu daviarajem». Čamu źnikłuju Mielnikavu zamianiŭ mienavita eks-vajskoviec Paciechin?1
Kamientary