Kastryčnicki źjezd «Havary praŭdu» prajšoŭ vielmi horača. Jaho padrabiaznaści dachodziać tolki ciapier.
Vodhullem taho źjezda stała toje, što arhanizacyju pakinuŭ jaje zasnavalnik, były palitviazień Siarhiej Vaźniak (jon zaadno adzin z členaŭ CK partyi «Spraviadlivy śviet»). U čym pryčyna skandału? Vaźniak nie byŭ zadavoleny pracaj Taćciany Karatkievič u jakaści sustaršyni «Havary praŭdu», tamu vyłučyŭ svaju kandydaturu.
Na pieršym etapie źjezda ŭ vieraśni Andreja Dźmitryjeva pieraabrali sustaršynioj, a voś ni Karatkievič, ni Vaźniaka nie zmahli abrać, nichto ź ich nie nabraŭ bolšaści. U kastryčniku hetaje pytańnie znoŭ stavili na paviestku źjezda, ale delehaty pryniali rašeńnie ŭvohule nie hałasavać pa sustaršyniach, a prahałasavać za «praciahnieńnie paŭnamoctvaŭ raniejšych kiraŭnikoŭ».
Vaźniak ličyć, što tym samym parušanyja asnovy demakratyi. U liście, jaki jon razasłaŭ siabram arhanizacyi, jon nie abiraje słovaŭ i nazyvaje Karatkievič «łukašystkaj».
«Naša Niva» spytała ŭ Vaźniaka pra jaho pazicyju.
«Tak, Taćciana Karatkievič łukašystka, bo jana spałochałasia pracedury hałasavańnia. Dla mianie heta vielmi dziŭna. Tym bolš, što Dźmitryjeŭ prajšoŭ praceduru abrańnia. Kali my za demakratyju, to pavinny pačynać ź siabie. Heta nie dastojna dla lidara arhanizacyi — bajacca vybaraŭ va ŭłasnaj arhanizacyi.
Možna kolki zaŭhodna hnabić Stalina, ale farmalna praceduru abrańnia na źjezdach KPSS jon prachodziŭ. Chacia jon tyran, i ja da jaho ŭ cełym niehatyŭna staŭlusia. Ale farmalnaja pracedura była! Navat u Łukašenki takaja pracedura jość raz na piać hadoŭ. A tut uziali — i admianili! Ludzi na źjeździe prosta stamilisia i prahałasavali tak, kab chutčej razyścisia.
Lidaram treba nie ličycca, a im być, paćviardžać heta pastajanna, a nie čas ad času. Karatkievič farmalna była kiraŭnikom inicyjatyŭnaj hrupy Dźmitryjeva na vybarach 2020 hoda, ale ŭ realnaści pracu viali inšyja ludzi, u tym liku i ja. Ja naŭprost kazaŭ, što mianie nie zadavalniaje, jak Taćciana vykonvaje svaje abaviazki sustaršyni. A to ŭ nas adzin robić usio [Dźmitryjeŭ], a inšaja — niešta čas ad času. Heta nie ideałahičny kanflikt, my adnolkava ŭsio aceńvajem, prosta rabočy momant.
Moj vychad z «Havary praŭdu» z hetym naŭprost nie źviazany. Ja ŭžo kazaŭ Andreju Dźmitryjevu pierad vybarami prezidenta, što heta ŭžo maja apošniaja kampanija, i ja budu sychodzić z kiraŭničych pasadaŭ. Treba rychtavacca da palityčnaj piensii, ja ŭžo amal 30 hadoŭ baraćbie addaŭ. Ja praciahvaju dapamahać Andreju Dźmitryjevu, ale ŭ jakaści vałanciora».
Inšy sustaršynia «Havary praŭdu» Andrej Dźmitryjeŭ tak acaniŭ kanflikt: «Škada, što Siarhiej pryniaŭ takoje rašeńnie. Ja liču, što heta emacyjny i pamyłkovy ŭčynak. My ŭsie ciapier na niervach — heta žyćcio. Dla mianie kamanda — heta miesca, dzie jość roznyja mierkavańni, ale my vysłuchoŭvajem adno adnaho i šukajem parazumieńnia».
Siarhiej Vaźniak zastajecca ŭ partyi «Spraviadlivy śviet».
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam2929
Kamientary