Kali ŭ kišečniku chapaje karysnych bakteryj, heta šmat u čym dapamahaje trymać arhanizm zdarovym. Takija bakteryi palapšajuć imunitet, źnižajuć ryzyku sardečnych chvarob, dyjabietu, astmy, depresii, sindromu razdražnionaha kišečnika i niekatorych vidaŭ alerhii. Ale jak možna palepšyć zdaroŭje kišečnika?
U našym arhaniźmie isnujuć tryljony mikraarhanizmaŭ, u tym liku bakteryi, virusy i hrybki, i bolšaja častka ź ich žyvuć u kišečniku. Kišečnyja bakteryi vykonvajuć važnuju pracu — jany dapamahajuć pracesu stravavańnia, to bok spryjajuć rasščapleńniu klatčatki i zasvojvańniu karysnych rečyvaŭ. I heta daloka nie adzinaja ź ich funkcyj, raskazvaje VVS.
Ale kišečnyja bakteryi spryjajuć zdaroŭju tolki tady, kali ich šmat u arhaniźmie čałavieka i kali jany raznastajnyja. Adzin sa sposabaŭ palapšeńnia stanu kišečnaj fłory — adpaviednaja dyjeta, ale navukoŭcy papiaredžvajuć, što, kab adčuć ad jaje efiekt, moža spatrebicca niekalki miesiacaŭ.
Što heta za dyjeta? Pa-pieršaje, treba jeści šmat raznastajnaj raślinnaj ježy. Pryčym heta moža być nie tolki sadavina i harodnina, ale i celnaziernievyja pradukty, babovyja, arechi, nasieńnie, taksama varta dadavać u ježu śpiecyi i travy. Raślinnaja ježa taksama źmiaščaje šmat klatčatki, jakaja duža nieabchodnaja karysnym bakteryjam. Pažadana atrymlivać jak minimum 30 hramaŭ klatčatki na dzień, ale arhanizm padziakuje navat za dadatkovyja štodzionnyja šeść hramaŭ rečyva. Takuju kolkaść klatčatki možna atrymać, naprykład, z dvuch kavałkaŭ celnaziernievaha chleba.
Paźbiahajcie mocna apracavanaj ježy, a taksama nie ŭžyvajcie antybijotyki bieź vialikaj patreby — jany źniščajuć nie tolki «drennyja» bakteryi, ale i karysnyja. Lepiej taksama pierajści na nierafinavany aliŭkavy alej, u składzie jakoha vielmi šmat karysnych dla bakteryj polifienołaŭ. Užyvańnie prabijotykaŭ — naprykład, u składzie naturalnych prabijotykaŭ — taksama spryjaje rostu karysnych bakteryj.
Narešcie, sprava nie tolki ŭ dyjecie, ale i ŭ ładzie žyćcia. Jość danyja, što zdaroŭju kišečnika spryjajuć dobry son, rehularnaja fizičnaja nahruzka i kantrol uzroŭniu stresu.
Kamientary