Sudziać minčanku, jakaja paprasiła źjechać z arendnaj kvatery prakurorku Kaśjančyk
U sudzie Zavodskaha rajona Minska pačaŭsia sud nad Volhaj Sinialovaj, jakaja zdavała kvateru maładoj prakurorcy Alinie Kaśjančyk.
Kaśjančyk adznačyłasia ŭ hučnych palityčnych pracesach — naprykład, jana pradstaŭlała abvinavačvańnie na spravie žurnalistak «Biełsata» Andrejevaj i Čulcovaj, jakich adpravili na 2 hady ŭ kałoniju.
Volha Sinialova paprasiła prakurorku źjechać z kvatery — taja źjechała. Ale Sinialovu za heta ciapier sudziać.
Haspadyniu kvatery vinavaciać pa artykule 190 KK za «Parušeńnie raŭnapraŭja hramadzian». Joj pahražaje pakarańnie ad štrafu da kałonii na 2 hady.
Raniej Tut.by pisaŭ, što kanfliktu pamiž haspadyniaj i najmalnicaj nie było. Kaśjančyk było prapanavana źjechać, jana pahadziłasia. I kali znajšła novaje žyllo, damovu skasavali pa zhodzie bakoŭ.
Hienprakuratura, u svaju čarhu, adznačała, što najmalnica žylla svoječasova vykonvała ŭsie abaviazacielstvy pa damovie, a arendadaŭca «paddałasia infarmacyjnamu ŭździejańniu telehram-kanałaŭ i inšych internet-resursaŭ» — i zapatrabavała vyzvalić zdymnaje žyllo.
18 červienia spravu pačała razhladać sudździa Anžeła Kaściukievič.
Sinialova zamužam, maje dvaich niepaŭnahadovych dziaciej. Na hety momant u dekrecie, da taho pracavała prahramistam.
Pryjšła na praces i paciarpiełaja prakurorka Kaśjančyk. Cikava, što pryjšła jana razam ź inšaj maładoj prakurorkaj Valeryjaj Taratynka, jakaja taksama viadomaja pa palityčnych pracesach.
Na pačatku pasiadžeńnia dziaržabvinavaŭca Kuncevič paprasiła sudździu zakryć praces — «kab zabiaśpiečyć biaśpieku paciarpiełaj i nie ahałošvać detali jaje pryvatnaha žyćcia».
Advakat Mačałaŭ vykazaŭsia kateharyčna suprać hetaha chadajnictva. Jon padkreśliŭ — u materyjałach spravy «roŭna nul pryvatnych źviestak Aliny Kaśjančyk», niama nie toje što adrasu — navat numara jaje telefona.
Abvinavačanaja padtrymała pazicyju advakata, paciarpiełaja prakurorka — pazicyju svajoj kalehi-abvinavaŭcy.
U vyniku sudździa Anžeła Kaściukievič abviaściła praces zakrytym. Hramadzian i presu puściać tolki na ahałošvańnie prysudu.
Ale paźniej stała viadoma, što sud uvohule nie adbyŭsia. Sudździa abvieściła, što advakat Mačałaŭ byŭ pazbaŭleny licenzii jašče 31 maja. U vyniku pasiadžeńnie pačniecca znoŭ, ale tolki 25 červienia.
Kamientary