Fiaduta ŭ SIZA KDB napisaŭ kamientary da «Kałasoŭ pad siarpom tvaim». Ciapier čytaje śledčy
Što piša z-za krataŭ viadomy litaraturaznaŭca, palitołah, žurnalist Alaksandr Fiaduta, zatrymany ŭ krasaviku ŭ Maskvie pa «spravie ab dziaržpieravarocie»?
Cytaty pryvodzić «Narodnaja vola».
Miarkujučy pa listach, Alaksandr Iosifavič i za kratami nie spyniaje litaraturna-daśledčaj dziejnaści — piša kamientary da ramana Uładzimira Karatkieviča «Kałasy pad siarpom tvaim»: «Pa-raniejšamu važdajusia sa svaim Karatkievičam. Prykładna 40% namiečanaha hatova… Śledčamu adasłali pieršyja čatyry sšytki z maimi rukapisami. Kali ŭ jaho nie budzie piarečańniaŭ, spadziajusia, jany trapiać u druk…»
Hłyboki znaŭca ruskaj litaratury, Fiaduta z samaironijaj pryznajecca, što ŭ SIZA KDB upieršyniu pračytaŭ raman Marharet Mitčeł «Uniesienyja vietram» i zrabiŭ dla siabie adkryćcio: akazałasia, što raman, jaki jon adnosiŭ da «damskaj litaratury», ujaŭlaje saboj «raskošnuju, vielmi žorstkuju prozu». «Kniha amierykanskaj chatniaj haspadyni (Marharet Mitčeł) napisana nikolki nie horš za knihu ruskaha chatniaha haspadara (Lva Tałstoha)… Z časoŭ Tekiereja ja nie čytaŭ knih, aŭtary jakich adnačasova tak lubili b svaich hierojaŭ i byli b nastolki da ich surovy», — pryznajecca viadomy litaraturaznaŭca.
Nakont bytavych umoŭ Alaksandr Iosifavič paviedamlaje: «Aciapleńnie ŭ nas uklučyli, ale žyviom my ŭ śvitarach i termabialiźnie».
Darečy, u SIZA Fiaduta zrabiŭ pryščepku ad kavidu — rasijski «Sputnik V»: «Abodva ŭkoły ja pieranios praktyčna ničoha nie adčuŭšy. Rekamienduju ŭsim. Ale, zrazumieła, pa žadańni».
Pra rasparadak dnia Alaksandr Iosifavič piša tak: «Viečaram atrymlivaju listy. Na niekatoryja adkazvaju adrazu, asabliva mastackija pakidaju na nastupny dzień, kab pavydaskanalvacca ŭ farmuloŭkach i prademanstravać adrasatu: maŭlaŭ, i my vałodajem mastactvam słova! A viečaram — novaja pošta. Kali štości prynieśli — radujusia, nie — spadziajusia».
Čytajcie taksama:
«Siońnia ŭ dvoryku znajšli buślinaje piaro». Što pišuć našaniŭcy z-za krataŭ
Ciapier čytajuć
Rasijskija prapahandysty vydumali ŭdar drona pa turystyčnym aŭtobusie. Ale ŭ historyi jość zahadkavyja fury3
Kamientary