Vajenkamaty pačali słać pozvy reziervistam: prosiać źjavicca amal na ŭvieś luty. Na sajcie Minabarony pusta
Jak paviedamlajuć «Našaj Nivie» čytačy, vajenkamaty pačali słać pozvy ab jaŭcy aficeram-reziervistam. Patrabujecca źjavicca dla adpraŭki na zbory, daty jakich u mnohim supadajuć z datami rasijskich vučeńniaŭ na terytoryi Biełarusi. Sajt Ministerstva abarony pra vyklik reziervistaŭ ničoha nie paviedamlaje.
Pozvy atrymali aficery roznych vajskovych śpiecyjalnaściaŭ, nam viadoma pra niekalki vypadkaŭ. Pravieści ŭ vojsku ahułam prapanujecca 25 dzion. Zbory buduć i na palihonach, i ŭ Vajennaj akademii.
«Heta moža być źviazana z vučeńniami. Sens u tym, što amal usie vajennyja čaści ŭ Biełarusi ŭ skaročanaj kamplektacyi: 50-70%. Ukamplektavanych na 100% čaściej niama. Adpaviedna, čaści treba daŭkamplektoŭvać za košt reziervistaŭ», — tłumačyć «Našaj Nivie» dziejučy vajenny.
«Kaho mienavita vykličuć na ciapierašnija zbory, nie majučy pierad vačyma papier, skazać ciažka: śpis śpiecyjalnaściaŭ moža być davoli šyroki, — adznačaje naš surazmoŭca. — U hetym, jak praviła, łamajuć hołavy i supracoŭniki vajenkamataŭ, bo heta zaležyć ad mnostva faktaraŭ: zvańniaŭ (šarahoviec, praparščyk, aficer), śpiecyjalnaściaŭ, uzrostu, času ad apošniaha vykliku, hrafiku zboraŭ. Vielmi składana. I ŭ hetych vyklikach moža nie być ničoha ekstraardynarnaha — usio moža iści pa płanie.
Adzinaje, što było b spraviadliva pra takoje infarmavać publična, kab vykliki nie byli dla ludziej niečakanaściu, asabliva na fonie ahresii Rasii suprać Ukrainy i mierkavanaj roli Biełarusi ŭ hetym».
«Što tyčycca Vajennaj akademii, to ŭ lutym tam tradycyjna pačynajecca pierapadrychtoŭka reziervistaŭ. Cikava, što sioleta buduć pierapadrychtoŭvać pa śpiecyjalnaści «vajenny žurnalist», — dadaŭ infarmavany vykładčyk. — Raniej u vojsku byli padraździaleńni kštałtu infarmacyjna-psichałahičnaj baraćby, ukamplektavanyja savieckaj technikaj — typahrafijami, naprykład, ad jakich usie plavalisia. Ciapier łamačča prybrali, pastaŭlajuć novyja ruchomyja centry sa spadarožnikavym internetam. Buduć nabory na pierapadrychtoŭku».
Čytajcie taksama:
Kali Rasija napadzie na Ukrainu ź biełaruskaj terytoryi, ci buduć ukraincy bić pa Biełarusi?
Piotra Rudkoŭski: U Biełarusi armija vialikaja ŭ kolkasnym płanie, ale pry hetym samaja biednaja paśla małdaŭskaj
Pamior paet Uładzimir Karyzna, aŭtar słoŭ da ciapierašniaha dziaržaŭnaha himna Biełarusi8
Pamior paet Uładzimir Karyzna, aŭtar słoŭ da ciapierašniaha dziaržaŭnaha himna Biełarusi
Viadomy partret Kahanca akazaŭsia savieckim fejkam, zatoje znajšłosia adzinaje fota archieołaha Tatura. Razhadanyja fotatajamnicy Biełaruskaha muzieja ŭ Vilni
Kamientary