Raście Signal, vyrvaŭsia Discord, a ŭ Biełarusi — TG. Jakija miesiendžary ciapier samyja papularnyja ŭ śviecie
Miesiendžary i chutki dastupny internet raspačali sapraŭdnuju revalucyju ŭ kamunikacyjach pamiž ludźmi i ŭ kamiercyi. Jašče nikoli raniej, jak zaraz, nie było tak prosta kamunikavać z surazmoŭcam u luboj častcy śvietu. Chacia miesiendžary i nivielujuć dziaržaŭnyja miežy, u roznych krainach i rehijonach daminujuć roznyja mabilnyja prahramy. Raźbirajemsia, jakija miesiendžary ŭ pačatku 2022 hoda byli samyja papularnyja ŭ Biełarusi, u susiednich krainach i ŭ śviecie.
Adno z apošnich daśledavańniaŭ papularnaści internet-miesiendžaraŭ praviała analityčnaja kampanija Similarweb. Praanalizavaŭšy dziasiatki krain, śpiecyjalisty pryjšli da vysnovy, što ŭ śviecie daminujuć try miesiendžary: WhatsApp, Facebook Messenger i Telegram.
Absalutnym lidaram u śviecie źjaŭlajecca WhatsApp. Prahrama daminuje ŭ Paŭdniovaj Amierycy, Zachodniaj Jeŭropie, Afrycy, Indyi, Brytanii, Rasii.
Nahadajem, u 2014 hodzie Facebook vykupiŭ WhatsApp za 19 miljardaŭ dalaraŭ. Aŭtaryzacyja ŭ dadatku prachodzić pa numary telefona.
U studzieni 2021 hoda prahrama abnaviła palityku pryvatnaści, i heta vyklikała niezadavolenaść karystalnikaŭ. Uźnikli čutki, što novyja praviły patrabujuć abmienu pryvatnaj infarmacyjaj z profilu ŭ miesiendžary z kampanijaj Facebook.
U adkaz na aściarohi WhatsApp apublikavaŭ na svaim sajcie raździeł z častymi pytańniami, u jakim patłumačyŭ, što abnaŭleńnie nie pahražaje biaśpiecy asabistych danych karystalnikaŭ.
U prahramie jość skraznoje šyfravańnie čataŭ — dostup da ich jość tolki ŭ surazmoŭcaŭ, a na siervierach danyja zachoŭvajucca ŭ zašyfravanym vyhladzie. Prysutničaje mahčymaść vydalać paviedamleńni paśla adpraŭki (surazmoŭca budzie bačyć nadpis ab tym, što paviedamleńnie vydalenaje).
Telegram
Vielmi mocna za 2021 hod vyrasła dola Telegram. Jon vycieśniŭ Facebook Messenger i zaniaŭ druhuju pazicyju ŭ śviecie. Telegram karystaŭsia najbolšaj papularnaściu ŭ Biełarusi, Armienii, Bielhii, Kambodžy, Łatvii, Vieniesuele, Šry-Łancy, Kazachstanie, Kyrhyzstanie i inšych krainach.
Miesiendžar viadomy svaimi prablemami z rasijskimi ŭładami. Fiederalnaja słužba biaśpieki Rasii patrabavała vydać klučy šyfravańnia Telegram, ale stvaralniki miesiendžara Duravy nastojvali na tym, što heta technična niemahčyma: danyja pierapisak zachoŭvajucca na pryładach karystalnikaŭ i nie naležać miesiendžaru.
Sud pastanaviŭ aštrafavać kampaniju, a ŭ krasaviku 2018 hoda vynies pastanovu ab abmiežavańni dostupu da prahramy ŭ Rasii. Adnak Telegram praciahvaŭ pracavać, niachaj i ź pierabojami. U červieni 2020 hoda zabaronu aficyjna źniali.
Vielizarnuju rolu syhraŭ Telegram i ŭ Biełarusi. Mienavita hety miesiendžar staŭ alternatyŭnym sposabam kamunikacyi dla hramadstva padčas pratestaŭ 2020 hoda. Mienavita Telegram dazvoliŭ biełaruskim miedyja źbierahčy svaju aŭdytoryju padčas błakavańnia papularnych sajtaŭ i biesprecedentnych represij suprać žurnalistaŭ.
U Telegram jość skraznoje šyfravańnie, ale tolki tady, kali vy zapuskajecie sakretny čat. Skraznoha šyfravańnia ŭ hrupavych i niesakretnych čatach niama.
Akramia pryvatnych čataŭ, u Telegram jość supolnaść. Karystalniki mohuć stvarać i padpisvacca na kanały, u jakich aŭtary publikujuć paviedamleńni i artykuły. Źjaviłasia mahčymaść kamientavać pasty. Možna raspracoŭvać botaŭ — virtualnych pamočnikaŭ, jakija reahujuć na kamandy. Ich časta vykarystoŭvajuć u biznesie, kab vyzvalić supracoŭnikaŭ ad rucinnych zadač.
Facebook Messenger
Trecim pa papularnaści ličycca Facebook Messenger. Jon papularny ŭ Paŭnočnaj Amierycy, Aŭstralii, Skandynavii i niekatorych inšych jeŭrapiejskich krainach.
Facebook Messenger dastupny tolki karystalnikam fejsbuka — patrebny ŭlikovy zapis u adnajmiennaj sietcy.
U 2020 hodzie vyjšła abnaŭleńnie, jakoje abjadnała asabistyja paviedamleńni ŭ fejsbuku z paviedamleńniami instahrama: pry vybary karystalnikam adpaviednaj opcyi paviedamleńni Instagram Direct i Facebook Messenger buduć intehravanyja pamiž saboj.
Viber
Hałoŭnaj aporaj Viber źjaŭlajecca Ukraina, Hrecyja i Bałharyja — u hetych krainach prahrama samaja papularnaja.
Asablivaściami Viber źjaŭlajucca ŭbudavany pierakładčyk paviedamleńniaŭ, supolnaści ź nieabmiežavanaj kolkaściu karystalnikaŭ, skraznoje šyfravańnie čataŭ, a taksama Viber Out — mahčymaść telefanavać na mižnarodnyja telefonnyja numary.
Praź izalavanaść kitajskaha internetu ad źniešniaha śvietu, u Kitai samym papularnym miesiendžaram źjaŭlajecca miascovy WeChat.
Jość i jašče niekalki krain, dzie daminujuć nie hłabalnyja hulcy, a miascovyja: Color Message (Słavienija), KakaoTalk (Kareja), Zalo (Vjetnam), Plus Messenger (Uźbiekistan).
Biełarusy i rasijanie čaściej karystajucca Telegram, a ŭkraincy — Viber
Kali havaryć pra WhatsApp, to samyja mocnyja pazicyi hetaha miesiendžara ŭ Izraili, Brytanii i Niamieččynie.
U Telegram samy vialiki achop u Rasii (chacia ŭ hetaj krainie miesiendžar i prajhraje WhatsApp) — 36%.
A voś hałoŭnym apłotam Viber zastajecca Ukraina — 79% majuć jaho na svaim smartfonie. Dalej idzie Hrecyja — 77%. Chacia ŭ Rasii Viber jość tolki ŭ 43% abanientaŭ, jahonaja dola ŭ hetaj krainie istotna vyrasła za apošni hod — bolš za 26 miljonaŭ novyk zapampovak.
U mnohich azijackich krainach źjaŭlajecca papularnaj prahrama Line (Japonija, Tajłand i Tajvań). U hetych krainach miesiendžar ustanoŭleny ŭ absalutnaj bolšaści karystalnikaŭ.
Pavodle daśledavańnia Similarweb, u Biełarusi samym papularnym miesiendžaram źjaŭlajecca Telegram. Što tyčycca susiedziaŭ, to inšaj krainaj z samaj vysokaj dolaj Telegram źjaŭlajecca Łatvija. Litva i Polšča bolš siadziać na Facebook Messenger, a Rasija na WhatsApp.
Cikava, što ŭ Rasii, pavodle sacyjałahičnaha apytańnia, WhatsApp samy papularny ŭ ludziej ad 25 hadoŭ, a voś moładź da 25 hadoŭ siadzić pieravažna na Telegram.
Ci jość navički na rynku miesiendžaraŭ?
Varta takim navičkom nazvać Discord. Hety miesiendžar, chutčej za ŭsio, budzie aktyŭna raści ŭ 2022 hodzie. Pieršapačatkova jon stvaraŭsia pad hiejmieraŭ i dla anłajn-zaniatkaŭ, ale apošnija miesiacy papularnaść miesiendžara imkliva raście i siarod inšych hrup.
Miesiendžar maje efiektyŭnyja instrumienty dla kamunikacyi vialikich hrup ludziej. Karystalniki mohuć mieć znosiny jak u asabistych paviedamleńniach, tak i na stvoranych siervierach — ahulnych hrupach.
Časta sierviery vyhladajuć jak šmatuzroŭnievyja kanstrukcyi: funkcyjanał dazvalaje stvaryć hałasavyja i tekstavyja kanały — ahulnyja, pryvatnyja abo tyja, što dastupnyja tolki dla čytańnia.
Taksama istotna pavialičyłasia papularnaść Signal. Miesiendžar papularny siarod žurnalistaŭ, pravaabaroncaŭ i palityčnych aktyvistaŭ, ale nie siarod zvyčajnych ludziej.
Hety miesiendžar imkniecca zabiaśpiečyć maksimalnuju pryvatnaść surazmoŭcaŭ i pry hetym zastajecca biaspłatnym. Chacia dyzajn miesiendžara i nabor funkcyj źjaŭlajucca vielmi abmiežavanymi.
Asablivaść Signal — šyfravanyja paviedamleńni ad pryłady da pryłady (E2EE). Heta značyć, što dostupu da infarmacyi niama ni ŭ kaho, akramia ŭdzielnikaŭ hutarki. Navat raspracoŭniki nie mohuć pračytać pierapisku. Miesiendžar nie źbiraje danych pra karystalnikaŭ i nie pakazvaje rekłamu.
Čytajcie jašče:
SK kupiŭ prahramu dla ŭzłomu parolaŭ i vykački infarmacyi z Telegram. Ekśpiert tłumačyć, nakolki heta realna
-
Novaja tkanina moža sama nahravacca bolš čym na 30 hradusaŭ, kab ratavać u ekstremalna chałodnaje nadvorje
-
ChatGPT adkryŭ funkcyju Deep Research dla karystalnikaŭ z samaj tannaj padpiskaj. Voś jak jana pracuje i što moža
-
Stvaryć ułasny sajt dla biznesu abo błohu našmat praściej i tańniej, čym vy dumajecie
Kamientary