Jość niekalki stratehij, jakija dazvalajuć hledaču adčuć asałodu ad hetaj stužki. Piša Andrej Rasinski.
Kidok kobry (G.I. Joe: The Rise of Cobra)
ZŠA, 2009, kalarovy, 107 chv.
Režysior: Styvien Somerz
Roli vykonvajuć: Čeninh Tatum, Sijena Miler, Marłon Ŭejenz, Arnold Vosłu, Krystafer Ekłstan, Džozef Hordan-Levit
Žanr: Fantastyčny bajavik
Adznaka: 4,5 (z 10)
Biespryncypny šatłandski handlar zbrojaj pahražaje čałaviectvu. Ale čałaviectvu pašancavała: na jahonuju abaronu stanovicca sakretny atrad zmaharoŭ…
«Kidok kobry» — vysokabiudžetny treš ad Styviena Somerz. Masa śpiecefiektaŭ, stralanina, intryha, padabranaja na halivudskaj śmietnicy. Firmovy humar, jaki kaliści demanstravaŭ Somerz na «Mumii» zabyty.
«Źmiainaja» stužka miortvaja i sterylnaja, jak płastykavyja žaŭnieryki, rekłamaj jakich i źjaŭlajecca film.
U hetaj ciažkoj situacyi jość niekalki stratehij, jakija dazvalajuć hledaču adčuć asałodu ad samaj pustoj hulni.
Pieršaja stratehija — adhadvać dzie j što panakradziena ź inšych filmaŭ. «Kidok kobry» daje dla hetaj zabaŭki proćmu mahčymaściaŭ. Tut vam i «Zornyja vojny», i Džejms Bond, i kapitan Nema, i «Piaty elemient», i… — karaciej, sami šukajcie.
Druhaja stratehija — dakručvać tupyja patryjatyčnyja frazy da poŭnaha imbiecyłu. Ujavić, što jany vymaŭlajucca nie z honaram, a ź ironijaj. I dadatkovaja asałoda — łavić režysiora na parušeńniach zakonaŭ fiziki (pryjemna adčuvać siabie razumnym-razumnym).
Nastupnuju stratehiju možna paraić usim, chto aśmielicca pahladzieć film na DVD. Možna adklučyć huk — i zaniacca alternatyŭnaj ahučkaj; možna dziela siurrealizmu pakłaści televizar na bok.
Ale samaja ryzykoŭnaja stratehija, za jakuju mohuć i mordu nabić, takaja.
Usie hetyja baranesy ŭ łateksie, płastykavyja piechacincy, handlary ŭ žaleznaj mascy, nindzi i hniusnyja navukoŭcy — nasamreč, viadomyja miedyjnyja piersanažy. Zastałosia tolki na pačatku filmu razdać im imiony. Šuryk, Stasik, Lida, Vova i — strašna padumać — Zianon.
Vybuchovy efiekt — harantujecca.
Ciapier čytajuć
Statkievič ab pratestach va Ukrainie: Kali vy abrali z takoj pieravahaj prezidenta i adnačasova Viarchoŭnaha hałoŭnakamandujučaha, to dajcie jamu kiravać2525
Kamientary