Dva supracoŭniki «Biełtelekama» atrymali pa 11 hadoŭ za źliŭ asabistych źviestak siłavikoŭ
Sud u Minsku prysudziŭ dvuch byłych supracoŭnikaŭ kampanii «Biełtelekam» da 11 hadoŭ kałonii va ŭmovach uzmocnienaha režymu za «źliŭ» u sacsietki asabistych źviestak bolš čym 200 siłavikoŭ, sudździaŭ i žurnalistaŭ, paviedamlaje mediazona.by. Sud nad imi išoŭ z 25 listapada minułaha hoda.
Abvinavačanych sudzili ažno pa vaśmi artykułach Kryminalnaha kodeksa, siarod jakich — dapamoha ŭ raspalvańni sacyjalnaj varožaści (častka 6 artykuła 16 i artykuł 130 KK), pieraškoda pracy žurnalistaŭ (artykuł 198 KK), niepravamiernaje zavałodańnie kampjutarnaj infarmacyjaj (artykuł 352 KK) i dapamoha ŭ hvałcie albo pahrozie hvałtam u dačynieńni da milicyjanta (častka 6 artykuła 16 i artykuł 364 KK).
Pa viersii abvinavačvańnia, eks-supracoŭniki «Biełtelekama» — 24-hadovy śpiecyjalist pa prodažach Arciom Parchamovič i 36-hadovy inžynier elektrasuviazi Alaksiej Byčkoŭski — «źlili» ŭ sacsietki źviestki bolš za 200 pradstaŭnikoŭ pravaachoŭnych orhanaŭ, «jakija potym padvierhlisia bulinhu». Hetym abvinavačanyja «sadziejničali administrataram ekstremisckich telehram-kanałaŭ». Da samich źviestak jany mieli dostup pa pracy.
Pa viersii śledstva, za źliŭ asabistych źviestak siłavikoŭ i dziaržsłužačych adzin z abvinavačanych atrymaŭ kala 300 dalaraŭ ZŠA, ź im raźličylisia kryptavalutaj. Chto mienavita zapłaciŭ za hetyja źviestki — nie ŭdakładniajecca.
Stała viadoma, jak zatrymali byłoha kalinoŭca Maksima Ralko2
Kamientary