Krynicy: Trubu nabližanaha da Łukašenki Vierabja razbambili va Ukrainie. Tam było dyzielu na $10 miljonaŭ
Jak stała viadoma «Našaj Nivie», pry bambiožkach Ukrainy, jašče na samym starcie vajny, paciarpieŭ naftapravod «PrykarpatZachadTrans», jaki Ukraina miełasia adabrać u biełaruskaha multymiljaniera Mikałaja Vierabja zhodna z rašeńniem ukrainskaj Rady nacyjanalnaj biaśpieki.
Naftaprovad mieli pieradać «Ukrtransnafcie» z metaj dalejšaha prodažu ci pieradačy ŭ kiravańnie. Pry hetym karystacca hetaj majomaściu ŭkraincy nie mahli.
«U naftapravodzie zastavaŭsia dyziel, jaki naležaŭ Vierabju, na sumu prykładna $10 miljonaŭ. Jak ličycca, pry paškodžańniach truby paciarpieŭ hety abjom. Zrešty, u tym, što jon i tak zmoh by niešta zabrać, vialikija sumnievy — va Ukrainie aryštavali i nacyjanalizavali hazavozy Vierabja», — paviedamiła «Našaj Nivie» abaznanaja krynica.
Vierabiej pačaŭ kantralavać trubu va Ukrainie paśla ŭhody ŭ 2019-m, kali jaho naftabitumny zavod kupiŭ 51% u statutnym kapitale «PrykarpatZachadTransa».
Vierabiej — uradženiec Ukrainy, vychadziec z kołaŭ, što krucilisia vakoł «Naftana» ŭ 1990-ch.
Niezrazumiełaja pryroda jaho suviaziaŭ va Ukrainie. Časam jamu prypisvajuć ledź nie svajactva z «kumam Pucina» Viktaram Miedviedčukom.
Ličycca, što trubapravod «PrykarpatZachadTrans» Miedviadčuk pradaŭ Vierabju dla advodu vačej.
Asnoŭny biznes Vierabja — aptovy handal rasijskimi naftapraduktami na biełaruskim rynku i ich ekspart za miažu.
Vierabja, jak i Aleksina, źviazvajuć sa skandałam z «prysadkami» i «rastvaralnikami». Hetyja ludzi vielmi blizkija i majuć supolnyja aktyvy. Naprykład, razam vałodajuć tak zvanym «Aršoram» — ilhotnaj ekanamičnaj zonaj pad Oršaj.
Chto maje ŭ Biełarusi prava zajmacca vysokadachodnym naftavym biznesam, vyrašaje asabista Alaksandr Łukašenka. Vierabiej takoje prava atrymaŭ.
Da vajny Ukraina była asnoŭnym rynkam dla biełaruskich naftapraduktaŭ. Paśla pačatku vajennych dziejańniaŭ pastaŭki ich va Ukrainu spynilisia.
Kamientary