«Hrodna dla Biełarusi — heta jak Lvoŭ dla Ukrainy». Što z turystami ŭ Hrodnie paśla adkryćcia miežaŭ
Paśla ŭviadzieńnia ŭ listapadzie 2016 hoda biaźvizavaha režymu dla naviedvańnia Hrodna i parku « Aŭhustoŭski kanał» miascovyja ŭłady nieadnarazova hanarylisia tym, što rehijon naviedvaje ŭsio bolš jeŭrapiejcaŭ. Ich kolkaść štohod pavialičvałasia, pakul kavid nie pastaviŭ kryž na turystyčnym biznesie. Ale ci adnaviŭsia patok paśla źniacca kavidnych abmiežavańniaŭ i ŭviadzieńnia tatalnaha biaźvizu dla litoŭcaŭ i łatyšoŭ?
U 2019 hodzie ŭ ramkach biaźvizavaha režymu Hrodna i najbližejšyja rehijony naviedała 136 tysiač turystaŭ, a ekspart turystyčnych pasłuh skłaŭ 5 miljonaŭ dalaraŭ. Płanavałasia, što ŭ 2020 hodzie turystyčny patok pavialičycca da 150 tysiač turystaŭ. Ale praz kavid i zakryćcio miežaŭ płany nie ździejśnilisia.
Kolkaść turystaŭ ź ES, jakija naviedvali Hrodna pa biaźvizie, sapraŭdy štohod pavialičvałasia. Čaściej za ŭsio da nas jeździli z Polščy i Litvy. U pikavyja dni dachodziła da taho, što turystyčnym aŭtobusam u pramym sensie nie chapała miescaŭ na admysłovaj parkoŭcy ŭ centry. Na vulicach časta hučała polskaja i litoŭskaja movy. Turysty pryjazdžali jak arhanizavanymi hrupami, tak i na ŭłasnych aŭto. Zamaŭlali ekskursii, naviedvali kaviarni. Litoŭcy na zvarotnym šlachu niaredka ładzili šop-tury ŭ handlovych centrach horada. Źjaŭleńnie biaźvizavych zon akazałasia takim rašeńniem uładaŭ, jakoje zadavoliła i samu ŭładu, i pradstaŭnikoŭ biznesu.
Zdavałasia, što źniaćcio kavidnych abmiežavańniaŭ i paŭnavartasny biaźviz dla litoŭcaŭ i łatyšoŭ musiŭ spryjać tamu, kab na vulicach horada znoŭ źjaviłasia šmat zamiežnikaŭ ź Jeŭropy, ale, padajecca, hetaha nie adbyłosia.
«U cełym my možam kazać pra toje, što turystyčny patok u Hrodna viarnuŭsia na dakavidny ŭzrovień, ale adbyłosia heta nie praz toje, što da nas znoŭ masava pajechali biaźvizavyja turysty ź ES, a za košt unutranaha turyzmu,
— kaža adzin z ekskursavodaŭ. — Zaraz my nazirajem za tym, jak apošnim časam u biełarusaŭ źjaviŭsia zapyt da ŭsiaho biełaruskaha, da biełaruskaj movy, kultury. Tamu u nas ciapier šmat unutranych turystaŭ. Tym bolš, što kali ty pačynaješ šukać u siecivie infarmacyju, što cikavaha pahladzieć u Biełarusi, ci jaki horad Biełarusi samy pryhožy, to ŭ bolšaści vypadkaŭ na pieršym miescy budzie mienavita Hrodna. Uvohule Hrodna dla Biełarusi — heta jak Lvoŭ dla Ukrainy.
Da nas jedzie šmat moładzi ź Minska, im vielmi padabajecca ŭ Hrodnie, jany nazyvajuć jaho jeŭrapiejskim horadam. Adznačajuć, što jon bolš «žyvy» za stalicu, bo tut šmat kaviarniaŭ, adbyvajucca niejkija imprezy».
Pry hetym surazmoŭca adznačaje, što zamiežnych turystaŭ ź ES u horadzie amal niama.
«Mnie davodziłasia sustrakać tolki niekalkich turystaŭ ź Litvy, palakaŭ u hetym siezonie amal nie bačyŭ.
Vidać, jany aścierahajucca jechać u Biełaruś. A kali ź Litvy da nas i jeduć u turystyčnych metach, to heta čaściej za ŭsio pradstaŭniki sterejšaha pakaleńnia, jakija ŭžo ničoho nie bajacca. Jość turysty z Rasii, ale ŭ asnoŭnym heta tyja, chto adpačyvaje ŭ biełaruskich sanatoryjach».
Pa nazirańniach ekskursavoda, bolšaść turystaŭ z-za ekanamičnych mierkavańniaŭ abirajuć adnadziennyja tury.
«U Hrodnie i vakolicach jość šmat čaho pahladzieć, słavutaściaŭ chopić nie na adzin dzień, ale heta ŭžo bolš nakładna, bo treba niedzie nočyć».
Aproč turaŭ dla pryjezdžych ź inšych haradoŭ Biełarusi i Rasii, u Hrodnie davoli raspaŭsiudžanymi źjaŭlajucca tematyčnyja ekskursija dla miascovych.
«Padčas kavidu ŭ našym horadzie było raspracavana niekalki takich tematyčnych i kaściumiravanych ekskursij. Navat ludzi, jakija naradzilisia i ŭsio žyćcio žyvuć u Hrodnie, ź cikavaściu staviacca da takich inicyjatyŭ. Popyt na padobnyja ekskursii zastaŭsia i paśla pandemii.
Aproč hetaha, u mai tradycyjna šmat turpajezdak arhanizoŭvajecca škołami, a praź niekalki dzion u horadzie adbudziecca čarhovy Fiestyval nacyjanalnych kultur, tamu prynamsi pačatak turystyčnaha siezonu — 2022 u Hrodnie vyhladaje davoli aktyŭnym. Navat z ulikam taho, što praź situacyju, jakaja skłałasia, my amal stracili turystaŭ z krain ES, jaki tysiačami jeździli da nas».
Pra adsutnaść byłoj kolkaści zamiežnikaŭ, kažuć i supracoŭniki kaviarniaŭ, što mieściacca pobač z papularnymi turystyčnymi łakacyjami.
«Nielha kazać, što ŭsio kiepska i turystaŭ niama, ale heta dakładna nie toje, što było dva hady tamu, kali na centralnych vulicach možna było ź lohkaściu pačuć polskuju i litoŭskuju movy.
Raniej da nas jeździła vielmi šmat palakaŭ, nie tolki na aŭtobusach, ale i na ŭłasnych aŭto. Ciapier asnoŭnaja častka turystaŭ — heta biełarusy ź inšych rehijonaŭ ci rasijanie. Asabliva šmat rasijan było u pačatku maja, ich možna było lohka paznać pa hovary i pavodzinach», — adznačaje surazmoŭca.
Čytajcie taksama:
Šop-tury ŭ Biełaruś. Što vyhadna vieźci ad nas u Polšču, Litvu i Łatviju
Ciapier čytajuć
«Adhuknuŭsia na 95% abjaŭ — i ŭsie admovili». Rasijaninu nie chočuć zdavać kvateru ŭ Hrodnie12
Kamientary