Łučnica Karyna Kazłoŭskaja syšła sa zbornaj i źjechała ź Biełarusi. Jana padpisantka lista spartsmienaŭ za svabodnyja vybary
Nieadnarazovaja čempijonka krainy pa stralbie z łuka 21-hadovaja Karyna Kazłoŭskaja, jakaja zaniała razam z kamandaj 4-je miesca na Alimpijadzie ŭ Tokia, u svaim Instagram abviaściła ab sychodzie z nacyjanalnaj kamandy Biełarusi, paviedamlaje Tribuna.com.
Spartsmienka napisała:
«Maja spartyŭnaja karjera pačałasia ŭ 2013 hodzie. Ja nie ciešyła siabie ambicyjami, što sport stanie maim žyćciom. Nie dumała, što stanu častkaj nacyjanalnaj zbornaj i što zmahu pajechać na Alimpijskija hulni, vyjhravać miedali na mižnarodnych spabornictvach. Dla mianie tady heta było čymści dalokim, čymści nierealnym.
Spartyŭny vynik raźvivaŭsia pastupova, miesiac za miesiacam, hod za hodam. U 16 ja vykanała majstra sportu i stała razumieć, što stralba z łuka dla mianie niešta bolšaje, čym prosta chobi ci siekcyja. Paśla, u 18 hadoŭ ja stała členam nacyjanalnaj zbornaj. Tady ja zrazumieła, što maja meta — heta sport i ŭsim sercam ja budu imkniecca da svaich lepšych vynikaŭ.
Ja zavajavała mnostva miedaloŭ, była ŭ 30-cy lepšych u suśvietnym rejtynhu, stała rekardsmienkaj krainy bolš za 5 razoŭ, stała finalistkaj na Alimpijskich hulniach u Tokio. Ale dla Biełarusi heta značyć absalutnaje ničoha.
Mnie 21. I na siońniašni dzień biełaruskaja spartyŭnaja karjera dla mianie skončanaja. Pačynajučy z 2020 hoda ja znachodziłasia ŭ pastajannym stresie. Z-za Alimpijskich hulniaŭ, pandemii, vybaraŭ, i paśla palityčnych represij, jakija praciahvajucca ŭ krainie da hetaha času, i vajny va Ukrainie.
Dziela sportu ja maŭčała, ciarpieła prynižeńnie, pahrozy, zapałochvańni. Pazbaŭlałasia ŭsio bolšaj kolkaści pravoŭ, abrastała praviłami i kantrolem, hublajučy ŭvieś davier da navakolnych mianie ludziej, a jany da mianie.
Usio dajšło da kropki nieviartańnia i mnoju było pryniata rašeńnie źjechać z krainy. Tamu pišu pra toje, što siońnia ja aficyjna zvolnienaja z nacyjanalnaj kamandy Biełarusi.
Možna nazvać heta pačatkam novaha etapu ŭ maim spartyŭnym žyćci i dobraj navinoj. Ja volnaja i ŭ biaśpiecy.
Apošnija radki maim siabram ź Biełarusi: prašu prabačeńnia, što nie zmahła z vami raźvitacca naležnym čynam. Spadziajusia, što kali-niebudź zmahu ŭbačycca z kožnym i nie adzin raz. Ja vas vielmi lublu», — napisała Kazłoŭskaja.
Nahadajem, što Kazłoŭskaja źjaŭlajecca padpisantkaj lista spartsmienaŭ za sumlennyja vybary.
Ciapier čytajuć
«Patraciła 300 rubloŭ — a jašče tolki siaredzina červienia!» Biełarusy abmiarkoŭvajuć vydatki na pakos travy i dzielacca łajfchakami3
Kamientary