26‑hadovaja ciažarnaja ŭ Dziaržynsku pamierła praź biełaruski antybijotyk, jaki raniej užo zabaraniali — bo ad jaho zahinuła niekalki žančyn
«Naša Niva» daviedałasia niekatoryja detali trahiedyi ŭ radzilni.
Nahadajem, 8 sakavika ŭ Dziaržynskaj CRB pamierła 26‑hadovaja ciažarnaja, jaje dzicia miedyki taksama nie zmahli vyratavać. Pieršapačatkova pra trahiedyju ŭ Threads raspaviała kaleha zahinułaj.
Žančyna paviedamiła, što paradzicha znachodziłasia pryblizna na 34 tydni ciažarnaści, 8 sakavika ŭ jaje adyšli vody. Chutkaja dapamoha adviezła ciažarnuju ŭ radzilniu, ale dapamahčy maładoj žančynie i jaje nienarodžanamu dziciaci miedyki nie zmahli.
Hałoŭnaja doktarka Dziaržynskaj CRB Alena Padalančyk dała ścipły kamientar «Anłajnieru»: «Pakul tolki skažu: miedyki zrabili ŭsio, što zmahli. Heta ja kažu z usioj adkaznaściu: usio, što zmahli».
Dyk što adbyłosia? U tym samym dopisie ŭ Threads kaleha śćviardžała, što pryčynaj śmierci staŭ anafiłaktyčny šok.
Hetuju infarmacyju paćvierdzili i krynicy «Našaj Nivy». Sa słoŭ ludziej, znajomych ź situacyjaj, žančynie ŭviali antybijotyk ceftryaksan.
Mienavita hety antybijotyk raniej traplaŭ u skandał. U studzieni 2017 hoda tolki za adzin tydzień było zafiksavana try vypadki anafiłaktyčnaha šoku ad ceftryaksana: dva školniki trapili ŭ balnicu ŭ ciažkim stanie, adna žančyna pamierła. U hetych vypadkach vykarystoŭvali jak ajčynny preparat, tak i zamiežny.
Paśla śmiarotnaha vypadku ceftryaksan časova zabaranili ŭ Biełarusi. Tady vice-premjer Vasil Žarko zajaviŭ, što ŭ 2016 hodzie ŭ krainie było zafiksavana 25 vypadkaŭ alerhičnaj reakcyi na hety antybijotyk — biełaruskaj, rasijskaj i polskaj vytvorčaści.
Siarod tych 25 vypadkaŭ bolšaść zastałasia nieviadomaj dla hramadstva. Rezanansnaj stała tolki śmierć paradzichi ŭ Maładziečnie. Tady 27‑hadovaja Kaciaryna naradziła zdarovaha syna, ale praź niekatory čas joj stała drenna. Miedyki ŭviali žančynie biełaruski ceftryaksan — i jana zahinuła ad anafiłaktyčnaha šoku.
Za paŭhoda da Kaciaryny ŭ toj ža Maładziečanskaj radzilni zahinuła inšaja žančyna. Pryčynaj taksama staŭ anafiłaktyčny šok paśla ŭviedzienaha antybijotyku.
Ale ž Vasil Žarko sprabavaŭ zaspakoić, što za miažoj alerhičnych reakcyj na ceftryaksan fiksujuć bolš.
Treba adznačyć, što prablemy z ceftryaksanam sapraŭdy ŭźnikali nie tolki ŭ Biełarusi. Naprykład, va Ukrainie zabaraniali hety antybijotyk (ukrainskaj vytvorčaści) u 2019 hodzie — taksama paśla śmiarotnaha vypadku.
U vyniku ceftryaksan usio ž znoŭ dazvolili vykarystoŭvać u Biełarusi — adbyłosia heta ŭ sakaviku 2017 hoda.
Surazmoŭcy «Našaj Nivy» ličać, što ŭ vypadku 26‑hadovaj ciažarnaj u Dziaržynsku daktary sapraŭdy nie vinavatyja, bo ad alerhičnaj reakcyi nichto nie zastrachavany. Ale pry hetym nie razumiejuć, čamu ceftryaksan praciahvajuć vykarystoŭvać u Biełarusi, bo ciažkija reakcyi na jaho nie redkaść.
Kali kazać pra aficyjnuju statystyku, my možam aryjentavacca tolki na aficyjnyja dadzienyja 2016 hoda. Žarko raskazvaŭ, što ŭ toj hod u Biełarusi było zafiksavana 254 alerhičnyja reakcyi, ź ich na ceftryaksan — 25. Atrymlivajecca, kožny dziasiaty pacyjent trapiŭ u śmiarotna niebiaśpiečnuju situacyju mienavita praz hety antybijotyk.
U biełaruskich radzilniach niama preparatu, jaki nieabchodny novanarodžanym
U biełaruskich radzilniach biaruć u zakładniki niemaŭlat, jakich naradzili mihrantki, kab spahnać z baćkoŭ hrošy? Raźbirajemsia
«Małyška paśpieła tolki raspluščyć vočki». U Minsku niemaŭla pamierła ad aśfiksii — miedyki nie stali rabić kiesaravaha
«Na žal, takich žudasnych historyj chapaje». Supracoŭnica radzilni pra vypadak z paradzichaj u Salihorsku
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku16
Kamientary