Dakazana: aptymisty žyvuć daŭžej. Raskazvajem, jak «prakačać» aptymizm
Dałaj-łama kazaŭ: «Kali vy sustrakajecie ciažkaści z aptymizmam i nadziejaj, vy paźbiahajecie jašče bolšych ciažkaściej». Navukoŭcy dadajuć — takim čynam vy jašče i možacie padoŭžyć ułasnaje žyćcio.
U vydańni Journal of the American Geriatrics Society apublikavali pracu, jakaja pralivaje śviatło na hety miechanizm. U pradstaŭlenym daśledavańni ŭdzielničali kala 160 tysiač žančyn roznych ras i z roznym žyćciovym vopytam, i praca pakazała: vysoki ŭzrovień aptymizmu źviazvajuć z daŭžejšaj praciahłaściu žyćcia i z bolšymi šancami pierasiahnuć ličbu ŭ 90 hadoŭ, piša CNN.
Elemienty zdarovaha ładu žyćcia taksama ŭpłyvajuć na jaho praciahłaść, ale ž nie tak mocna.
Zdarovaje charčavańnie, vysoki ŭzrovień fizičnaj aktyŭnaści, adsutnaść lišniaj vahi i zvyčki palić, umieranaje ŭžyvańnie ałkaholu — usie hetyja rečy taksama padaŭžajuć žyćcio, ale aptymizm robić heta bolš čym u čatyry razy efiektyŭniejšym za ŭsie hetyja zvyčki.
Heta nie pieršy vypadak, kali navuka śviedčyć pra suviaź aptymizmu i doŭhažycharstva. U 2019 hodzie vučonyja vyśvietlili, što ludzi, schilnyja da stanoŭčaha myśleńnia, žyvuć u siarednim na 11-15% daŭžej, čym piesimisty — časam navat da 85 hadoŭ. Raniejšyja pracy pakazali, što aptymisty bolš schilnyja prytrymlivacca zdarovaj dyjety i mieć adekvatny ŭzrovień fizičnaj nahruzki, u ich bolš zdarovyja serca, lohkija i imunnaja sistema.
Aptymizm nie aznačaje, što čałaviek ihnaruje stresavyja situacyi.
Kali zdarajecca niešta drennaje, aptymisty prosta ź mienšaj vierahodnaściu buduć u hetym vinavacić siabie i čaściej buduć usprymać prablemu jak niešta časovaje ci navat stanoŭčaje.
Taksama aptymisty ličać, što jany kantralujuć svoj los i mohuć stvaryć mahčymaści dla taho, kab u budučym ź imi zdaryłasia niešta dobraje.
Vyvučeńnie bliźniat pakazała, što naša zdolnaść da aptymizmu tolki na čverć zaležyć ad hienaŭ. U astatnim toje, jak my reahujem na prablemy, — heta naša zasłuha.
Na ščaście, aptymizmu možna navučycca.
Adzin z varyjantaŭ, jak heta zrabić — ujavić siabie ŭ takoj budučyni, dzie vy dasiahnuli ŭsiaho, čaho žadali, i dzie vyrašanyja ŭsie vašy prablemy.
Prosta zapišycie na praciahu 15 chvilin usie vašy dasiahnieńni ŭ takoj budučyni, nibyta jany ŭžo zdarylisia, i potym na praciahu 5 chvilin ujaŭlajcie, jak heta — žyć u takoj realnaści.
Ekśpierty kažuć, što kali rabić takoje praktykavańnie kožny dzień, jano moža istotna palepšyć vašu zdolnaść myślić stanoŭča.
Inšyja varyjanty — kožny dzień zapisvać usio dobraje, što z vami zdaryłasia, ci tyja rečy, za jakija vy siońnia ŭdziačnyja.
Aptymizm padobny da fitnesu: treba praktykavać jaho rehularna, kab zastavacca ŭ dobraj formie. Bolš doŭhaje i ščaślivaje žyćcio hetaha vartaje.
Kamientary