Što viadoma pra padletka, jakoha adpravili ŭ kałoniju za toje, što źniaŭ na videa rasijskuju techniku?
18-hadovaha Paŭła Piskuna abvinacili ŭ tym, što jon źniaŭ na mabilny telefon rasijskuju vajskovuju techniku i dasłaŭ videa ŭ «ekstremiscki» telehram-kanał. Za heta jamu prysudzili 3 hady pazbaŭleńnia voli. Daviedalisia bolš pra hetaha chłopca.
Pavieł z Mazyra, vučyŭsia ŭ Naraŭlanskim prafiesijnym licei. Jamu zastavałasia litaralna 3—4 miesiacy da vypusku.
Jahonym chobi byŭ sport. Chłopiec ź dziacinstva zajmaŭsia roznymi vidami sportu: volnaj baraćboj, viesłavańniem. Hod advučyŭsia ŭ škole alimpijskaha reziervu. Apošnim časam zachaplaŭsia paŭerlifcinham, žymam štanhi ležačy, i jeździŭ na spabornictvy.
«U jaho byŭ skalijoz, tamu jon dalej nie zdoleŭ zajmacca sportam prafiesijna, choć maryŭ prabicca», — raskazvaje siabra Paŭła.
Siamja samaja zvyčajnaja, dvoje dziaciej — Pavieł i starejšaja siastra, jakaja vučycca ŭ Minsku. Znajomyja pra jaho dobra adhukajucca.
«Raniej nijakich prablemaŭ z zakonam jon nie mieŭ. U škole Paša nie nadta šmat času pryśviačaŭ vučobie, ale ŭžo ŭ licei dobra siabie zarekamiendavaŭ i padniaŭ siaredni bał ledź nie ŭdvaja — jon staŭ vyšejšym za 8 bałaŭ.
Jak jaho znajšli — niezrazumieła. Jon kidaŭ fota ŭ niejki bot», — zhadvaje siabar.
Zatrymali Paŭła 8 sakavika. Jany siamjoj adznačali śviata, Paša ź dziaŭčynaj pajšli hulać. Ale kala pieršaj hadziny dziaŭčyna pačała bić tryvohu — Paša pajšoŭ sustrecca ź siabram i źnik.
«Usie adrazu zrazumieli, niešta nie tak, bo Paša zaŭždy byŭ na suviazi i adkazna da hetaha stavicca. Jaho pačali šukać, abzvońvać usie instancyi. A kala vośmaj svajakam pateliła milicyja i skazała, što jon zatrymany.
Kaniešnie, dla ŭsich heta byŭ šok. Siamji było vielmi ciažka, siastra navat na miesiac zastałasia ŭ Mazyry z baćkami.
Maci kazała, što padčas pieršaha sumiesnaha dopytu ŭ jahonych vačach byŭ bačny strach. Bo jon nie viedaŭ, što ź siamjoj — jon ža nikudy nie ŭłaziŭ raniej, a tut jon u RAUSie pa kryminalnaj spravie», — dzielicca siabra chłopca.
Spačatku siamji skazali, što praź dzień u IČU Paša pajedzie dadomu. Ale jaho nie adpuścili.
Na padletka zaviali kryminalnuju spravu pa č.1 i č.2 artykuła 361-4 KK (sadziejničańnie ekstremisckaj dziejnaści).
Na sudzie, kažuć znajomyja, chłopiec trymaŭsia vietliva i mužna.
«U apošnim słovie Paša napačatku paprasiŭ prabačeńnia ŭ siamji. Skazaŭ, što nie chacieŭ nikomu nanieści škody, a praź jaho im daviałosia šmat adpakutavać. Vybačaŭsia, što jon u kletcy, a nie na trybunie, dzie jaho ŭznaharodžvajuć za spabornictvy. Ahułam jon vielmi pieražyvaje, što padvioŭ siamju.
Dziaŭčyna nie adviarnułasia ad jaho, dapamahała siamji, zaŭždy była ź imi. Kali jon bačyŭ jaje na sudzie, u jaho vočy hareli».
U listach chłopiec piša, što škaduje, što zamała času pravodziŭ ź siamjoj, nie paśpieŭ mnohaje abmierkavać ź imi.
Adras dla listoŭ:
Piskun Pavieł Iharavič, 2004 hoda naradžeńnia. SIZA-3, h. Homiel, vuł. Knižnaja 1A, 246003.
Čytajcie jašče:
U Homieli padletku dali 3 hady kałonii za toje, što źniaŭ na videa pierasoŭvańnie rasijskich zachopnikaŭ
«Palašučka ź nienapisanaj kazki». Raskazvajem pra žančynu, jakoj prysudzili kałoniju za zvarot u Śledčy kamitet
Voś pa čyim danosie zatrymali dyrektarku turystyčnaha ahienctva «Vijapol»
-
Julija Mickievič pra Cichanoŭskaha: Turma nikoha nie robić lepšym, tolki horšym
-
Jaŭhien Afnahiel raskazaŭ, što było paśla suda, dzie skandavali «Vierym, možam, pieramožam!» I nazvaŭ, chto dla jaho sapraŭdny lidar Biełarusi
-
Jaŭhien Afnahiel: Piać hadoŭ turmy taho kaštavali, tamu što ja bačyŭ Biełaruś svabodnaj
Ciapier čytajuć
Jaŭhien Afnahiel raskazaŭ, što było paśla suda, dzie skandavali «Vierym, možam, pieramožam!» I nazvaŭ, chto dla jaho sapraŭdny lidar Biełarusi2
Kamientary
"Hreblaj" niemahčyma zajmacca. Pa joj možna iści, jechać. Jana zaminaje prachodzić vadzie i stvaraje sažałki i h.d.
A sportu takoha niama. Toje, što pakazana na fota z sacsietak - heta trenavańnie vieślaroŭ. Sport, jakim jany zajmajucca, zaviecca "viesłavańnie".