U Homieli padletku dali 3 hady kałonii za toje, što źniaŭ na videa pierasoŭvańnie rasijskich zachopnikaŭ
18 lipienia Homielski abłasny sud vynies rašeńnie pa spravie Paŭła Piskuna, jakoha abvinavačvajuć u sadziejničańni ekstremisckaj dziejnaści pa č. 1 i č. 2 art. 361-4 KK, piša «Viasna».
Sudovaje pasiadžeńnie ŭznačaliŭ Alaksandr Piskunoŭ, jaki ŭžo nie adnojčy vynosiŭ palityčna matyvavanyja prysudy, u tym liku pa spravach aktyvistaŭ i žurnalistaŭ.
Viadoma, što na momant ździajśnieńnia złačynstva abvinavačany byŭ niepaŭnaletni — chłopiec naradziŭsia ŭ 2004 hodzie.
Paŭła Piskuna abvinavačvajuć u tym, što 27 lutaha hetaha hoda jon źniaŭ na mabilny telefon rasijskuju vajskovuju techniku i dasłaŭ hetaje videa ŭ «ekstremiscki» telehram-kanał razam z supravadžalnym tekstam, u jakim raskazaŭ pra kolkaść techniki, napramak jaje ruchu i admietnyja asablivaści.
Pavodle viersii abvinavačvańnia, hetymi dziejańniami Pavieł Piskun akazaŭ sadziejničańnie ekstremisckaj dziejnaści.
U vinu chłopcu staviać i toje, što praź niekalki dzion, a mienavita 1 i 2 sakavika, jon znoŭ źniaŭ na videa rasijskuju vajskovuju techniku i znoŭ pieradaŭ materyjały «ekstremisckamu» telehram-kanału.
18 lipienia Homielski abłasny sud pryznaŭ Paŭła Piskuna vinavatym va ŭčynieńni złačynstva pavodle č. 1 art. 361-4 KK. U jakaści pakarańnia pa hetym epizodzie jamu pryznačyli pazbaŭleńnie voli terminam na 2 hady. Taksama Paŭła pryznali vinavatym «u inšym sadziejničańni ekstremisckaj dziejnaści, ździejśnienym paŭtorna». Na padstavie č. 2 art. 361-4 KK za heta jamu prysudzili 3 hady pazbaŭleńnia voli.
Zhodna z č. 2 art. 72 KK šlacham pahłynańnia mienš strohaha pakarańnia bolš strohim kančatkova Paŭłu Piskunu prysudzili 3 hady pazbaŭleńnia voli z adbyćciom pakarańnia ŭ papraŭčaj kałonii va ŭmovach ahulnaha režymu.
Prysud nie ŭstupiŭ u zakonnuju siłu i moža być abskardžany i apratestavany va ŭstanoŭlenym zakanadaŭstvam paradku.
Za niekalki dzion da taho, jak padletak źniaŭ techniku, 24 lutaha, Rasija napała na Ukrainu, u tym liku z terytoryi Biełarusi. U vyniku hetaj ahresii zahinuli ŭžo dziasiatki tysiač ludziej, uklučna ź mirnymi žycharami. Mnohija krainy śvietu traktujuć Biełaruś, jakaja dała svaju terytoryju dla napadu, jak suahresara.
Biaspałaŭ kančatkova rassvaryŭsia ź Cichanoŭskim: Dla jaho dobry tolki adzin čałaviek — Prakopjeŭ55
Kamientary