Urał Łatypaŭ zaniaŭsia maskoŭskaj nieruchomaściu

Były kiraŭnik administracyi Łukašenki paśla prykładna hodu pracy ŭ biełaruskaj dačynnaj kampanii «Łukojła» znajšoŭ novuju pracu ŭ rasijskaj stalicy.

Ciapier Urał Łatypaŭ uznačalvaje kampaniju «Diriekt Mieniedžmient»,

što kiruje najbujniejšym u Jeŭropie handlovym kompleksam «Horbuškin dvor» i inšymi bujnymi abjektami nieruchomaści ŭ rasijskaj stalicy.

«Horbuškin dvor», nahadajem, naležyć vychadcu ź Minska Alaksandru Milaŭskamu.

Były ŭłaśnik viadomaha maskoŭskaha telezavoda «Rubin», niekali hałoŭnaha kankurenta «Haryzonta», u 2003 hodzie pradaŭ svoj televizijny biznes karejskaj kampanii «Rolsen» i zaniaŭsia vyklučna deviełapierskimi prajektami. U aktyvie kantralavanaha im praz žonku Žannu Milaŭskuju (sam Milaŭski z 2005 hoda źjaŭlajecca deputatam Maskoŭskaj haradskoj Dumy ad «Adzinaj Rasii», dzie kuryruje, darečy, pytańni horadabudaŭnictva) AAT «MTZ «Rubin» znachodzicca viadomy handlovy kompleks «Horbuškin dvor», ofisnyja centry i niekalki pierśpiektyŭnych placovak pad zabudovu.

U ich liku, naprykład, hatelny kompleks (płošča 137 tys. kv. m.) i handlova‑zabaŭlalny centr «Filion» (62 tys. kv. M.). Źjaŭleńnie 58‑hadovaha Urała Łatypava, jaki doŭhi čas źjaŭlaŭsia klučavoj fihuraj u atačeńni Alaksandra Łukašenki (u 2001‑2004 hadach jon uznačalvaŭ jaho administracyju), na AAT «MTZ «Rubin» zusim nie vypadkovaje. Uładalniki «Rubina» Milaŭskija daŭno robiać staŭku na vysokapastaŭlenyja biełaruskija kadry.

U 1990‑ia hienieralnym dyrektaram zavoda «Rubin» byŭ Anatol Łaškievič, były pieršy sakratar Partyi kamunistaŭ Biełarusi, jaki emihravaŭ ź Biełarusi z‑za palityčnych roznahałośsiaŭ z Łukašenkam.

U pačatku 2000‑ch prytułak na «Rubinie» znajšoŭ były premjer‑ministr Biełarusi Uładzimir Jarmošyn, jaki byŭ vymušany źjechać ź Biełarusi paśla zakryćcia miascovaha pradstaŭnictva STAA «Mabilnyja TeleSistemy».

Za architekturu ŭ ramkach chołdynhu adkazvaŭ były hałoŭny architektar Minska Alaksandr Čadovič.

Narešcie, zaraz členam savieta dyrektaraŭ «Diriekt Mieniendžmienta» i AAT «MTZ «Rubin» źjaŭlajecca Upiendra Machata — hienieralny konsuł Niepała ŭ Biełarusi. Siamja Machata — dastatkova ŭpłyvovyja biznesmeny ŭ Biełarusi: Birendra Machata źjaŭlajecca ŭłaśnikam 60% akcyj i členam savieta dyrektaraŭ AAT «Amkador», Surendry Machata naležyć miedycynski centr «Kravira». Akramia taho, bratam Machata naležaŭ da niadaŭnich časoŭ bujny pakiet ŭ ZAT «Miežtorhbank», vykupleny «Alfa‑bankam».

• 0
• 0
• 0
• 0
• 0
• 0
• 0
• 0