Jak dziaržaŭnyja ŚMI adreahavali na słovy Pucina, što «niezaležnych Ukrainy i Biełarusi być nie pavinna»

Pra što havorka

21 žniŭnia kancler Hiermanii niečakana dla niamieckaha palityka takoha ranhu vynies na publiku insajd — źmiest hutarki, jakaja išła za zakrytymi dźviaryma. Jon raskazaŭ pra słovy Pucina, jakija byli skazanyja padčas sustrečy, što adbyłasia pierad samaj vajnoj.

Šolc tady namahaŭsia danieści da prezidenta Rasii, što NATA nie vorah Rasii i što Ukraina nie ŭstupić u aljans «u najbližejšyja 30 hadoŭ».

Ale, pavodle Šolca, u Pucina idei byli «całkam absurdnyja», i toj kazaŭ, što niezaležnych Ukrainy i Biełarusi być nie pavinna.

Kancler zajaviŭ, što Pucin byŭ hatovy pravieści markieram pa karcie Jeŭropy, a zatym skazać: «Heta majo, a heta vaša».

Šolc reziumavaŭ, što Pucin pačaŭ vajnu mienavita z namieram zavajavać susiedniuju krainu. «Ja dumaju, što heta było pieršapačatkovaj metaj», — skazaŭ Šolc.

Jak adreahavali dziaržaŭnyja ŚMI

Hetaja navina pra adkrytuju pahrozu niezaležnaści Biełarusi stała adnoj z samych rezanansnych u niedziaržaŭnych ŚMI.

Dziaržaŭnyja ž resursy całkam praihnaravali hetyja skandalnyja słovy.

Dakładniej, jany pracytavali tolki toje, što Ukraina nie pabačyć NATA 30 hadoŭ. A toje, što metaj Pucina byŭ zachop krainy-susiedki i što taki ž los čakaje Biełaruś — prahłynuli.

Pavialičyć

Zatoje dziaržaŭnyja ŚMI raspaviali biełarusam, što rejtynh Šolca padaje, što niemcy niezadavolenyja rostam cen na enierharesursy, što «Šolc zaśmiajaŭsia na prateście suprać biednaści ŭ Bierlinie» i «raspavioŭ hramadzianam FRH, jak časta prymaje duš». Deputat ža Pałaty pradstaŭnikoŭ Nacyjanalnaha schodu Biełarusi Siarhiej Kliševič «patłumačyŭ, čamu ŭ Niamieččynie niama niezaležnaści».

BiełTA ž u padmacavańnie vyhadnaj prapahandzie idealistyčnaj karciny biełaruska-rasijskaha partniorstva apublikavała daśledavańnie psieŭdasacyjałahičnaj kampanii EcooM pra toje, jak biełarusy aceńvajuć miždziaržaŭnyja adnosiny hetych dźviuch krain.

Biełaruś jak suciašalny pryz dla Rasii

Dźmitryj Stracijeŭski, palitołah, dyrektar Bierlinskaha centra vyvučeńnia Uschodniaj Jeŭropy, u intervju Bild skazaŭ, što ŭ słovach Šolca pra Ukrainu i NATA niama ničoha siensacyjnaha. Pytańnie farsiravanaha ŭstupleńnia Ukrainy ŭ NATA nie stajała na paradku dnia, «staraja Jeŭropa» błakavała ŭstupleńnie Ukrainy ŭ błok z 2008 hoda, z samita ŭ Buchareście.

Ale što tyčycca źniešniaha paradku dnia, to raspoviedy Šolca — «heta kančatkovy razryŭ z Pucinym» i «niepryznańnie jaho jak paŭnavartasnaha pieramoŭščyka», jak kažuć u Hiermanii, «na adnym uzroŭni vačej», to-bok raŭnapraŭnaha.

Kali palityk takoha ranhu apubličvaje pryvatnyja hutarki, «to heta značyć, što jon, faktyčna, skidvaje surazmoŭcu z rachunkaŭ», —kaža palitołah.

Na pytańnie žurnalista pra toje, ci varta Biełarusi niečaha bajacca ŭ suviazi sa słovami Pucina, palitołah skazaŭ: «Biełarusi varta bajacca vielmi daŭno. Bo takija razmovy vialisia i raniej, ukidvalisia novyja kancepcyi, novyja schiemy pašyreńnia Sajuznaj dziaržavy, tak zvanaja pahłyblenaja intehracyja, jakaja mocna patychała anieksijaj».

Pavodle jaho, ciapier šmat što zaležyć dla Biełarusi ad ukrainskaha viektara.

«Kali Rasija kančatkova pacierpić va Ukrainie parazu ci nie dabjecca chacia b adnoj z pastaŭlenych metaŭ, to całkam mahčyma, što Biełarusi pryjdziecca niesałodka. Pucinu nieabchodnaja historyja pośpiechu. Heta režym, jaki budujecca na mabilizacyjnaj madeli, nieabchodna ŭvieś čas padkidvać drovy ŭ ahoń, pakazvać nasielnictvu moc lidara i pośpiech. Kali pośpiechu niama, u lidara jość prablemy», — miarkuje dyrektar Bierlinskaha centra vyvučeńnia Uschodniaj Jeŭropy.

• 37
• 0
• 6
• 12
• 4
• 6
• 142
• 0