Alaksandru Jarašuku vystavili novaje abvinavačvańnie za «zakliki da sankcyj». Ale ž jon vystupaŭ suprać
Ctaršyni likvidavanaj pa rašeńni Viarchoŭnaha suda Asacyjacyi prafsajuzaŭ «Biełaruski Kanhres demakratyčnych prafsajuzaŭ» vystavili novaje abvinavačvańnie — zakliki da sankcyj. Pa toj častcy, jakuju inkryminujuć Jarašuku, jamu pahražaje ad 4 da 12 hadoŭ pazbaŭleńnia svabody, paviedamlaje «Narodnaja vola».
Cikava, bo Alaksandr Jarašuk — va ŭsialakim vypadku publična — adkryta vystupaŭ suprać uviadzieńnia žorskich sankcyj u dačynieńni da Biełarusi, z-za čaho na jaho z krytykaj navat abrynulisia niekatoryja apazicyjaniery, jakija ciapier žyvuć pa-za miežami krainy. Tym nie mienš mienavita za zakliki da sankcyj ułady chočuć pryciahnuć Jarašuka da adkaznaści: pa infarmacyi našych krynic, niejkuju kramołu, jakaja paciahnuła na ceły novy kryminalny artykuł, znajšli ŭ jaho kampjutary, jaki pravaachoŭniki zabrali padčas vobysku.
Razam ź Jarašukom pa spravie prachodziać jahony namieśnik Siarhiej Antusievič i buchhałtar Iryna But-Husaim.
Raniej im inkryminavali 342 artykuł Kryminalnaha kodeksa — «Arhanizacyja i padrychtoŭka dziejańniaŭ, jakija hruba parušajuć hramadski paradak, abo aktyŭny ŭdzieł u ich». A litaralna miesiac tamu Jarašuku, jak kažuć, dadali ŭ plečy…
Niadaŭna prajšła pahałoska, što spravu Alaksandra Jarašuka byccam by nakiravali ŭ prakuraturu, ale, kali vieryć krynicam, adtul jaje iznoŭ viarnuli ŭ Śledčy kamitet — užo z novym artykułam u dadatku.
16 listapada Alaksandr Jarašuk adznačyŭ za kratami svoj 71-šy hod narodzinaŭ. Za kratami ŭ Jarašuka abvastrylisia niekatoryja chvaroby, adzin čas jon havaryŭ pra nie vielmi kamfortnuju syravatuju kamieru, adnak zbolšaha jon narmalna trymajecca.
Alaksandr Jarašuk vielmi časta piša praniźlivyja i padbadziorlivyja listy svaim synam i žoncy, padrabiazna apisvaje svajo ciapierašniaje žyćcio-byćcio. Ale siamja Jarašuka vybrała pazicyju nie padtrymlivać znosin z žurnalistami i ničoha im nie raspaviadać pra spravu, kab niejkim lišnim słovam nie naškodzić i nie abciažaryć i biez taho niaprostaje stanovišča Alaksandra Iljiča.
Advakaty Jarašuka taksama maŭčać, bo źviazanyja žorstkaj padpiskaj ab nierazhałošvańni, parušyŭšy jakuju, mohuć apynucca biez advakackaj licenzii.
Darečy, pa słovach ludziej, blizkich da siamiej źniavolenych, Jarašuku i inšym fihurantam jaho spravy dazvolili spatkańni sa svajakami.
Siarhiej Antusievič u adnym sa svaich listoŭ na volu napisaŭ: «Trymajciesia, bo vam składaniej, čym nam tut, bieražycie siabie i budźcie zdarovyja!».
Mieru strymańnia Alaksandru Jarašuku i tym, chto prachodzić ź im pa spravie, praciahnuli da 28 listapada.
Miarkujecca, što spravu buduć razhladać u Minskim haradskim sudzie. Ale pra datu suda pakul ničoha nie viadoma.
Čytajcie taksama:
Alaksandr Jarašuk na sustrečy z MVF raskrytykavaŭ sankcyi
Siońnia pačynajecca sudovy praces nad aktyvistami niezaležnych prafsajuzaŭ
Ciapier čytajuć
Poŭny śpis palitviaźniaŭ, vyzvalenych 13 śniežnia7
Kamientary