Kaśmičny karabiel «Aryjon», jaki lacieŭ da Miesiaca, pryvadniŭsia ŭ Cichim akijanie
Kaśmičny karabiel NASA novaha pakaleńnia viarnuŭsia na Ziamlu paśla amal 26-dzionnaha palotu da Miesiaca. Pasadačnaja kapsuła «Aryjon» pryvadniłasia ŭ Cichim akijanie niedaloka ad vostrava Huadałupie.
Pierad uvachodam u ziamnuju atmaśfieru kapsuła adździaliłasia ad słužbovaha modula «Aryjona». U rajonie pasadki jaje čakaŭ desantny karabiel VMS ZŠA «Portłend».
Padčas palotu «Aryjon» dvojčy — 21 listapada i 5 śniežnia — ablacieŭ Miesiac, nabližajučysia da jaho pavierchni na adlehłaść kala 130 km. Akramia taho, jon pravioŭ šeść dzion na dalokaj arbicie vakoł Miesiaca, kali adlehłaść da jaho pavierchni składała kala 85 tysiač kiłamietraŭ.
Znachodžańnie karabla hetaj arbicie dazvoliła acanić mahčymaści aparata i prateściravać jaho sistemy na vialikaj adlehłaści ad Ziamli.
Hety palot «Aryjona» byŭ vyprabavalnym i tamu niepiłatujemym. Paloty «Aryjona» z astranaŭtami na borcie, jak čakajecca, pačnucca ŭ kancy 2024 hoda. U chodzie hetaj prahramy ŭ 2025 ci 2026 hodzie płanujecca znoŭ vysadka na Miesiacy.
U apošni raz čałaviek pabyvaŭ na Miesiacy 50 hadoŭ tamu, heta byŭ ekipaž amierykanskaha «Apałona-17».
Viartańnie kaśmičnych karabloŭ z takich dalokich ekśpiedycyj ujaŭlaje saboj niaprostuju techničnuju zadaču: jany padlatajuć da ziamnoj atmaśfiery na vielmi vysokaj chutkaści — kala 40 000 km/h. Tamu nieabchodny vielmi tryvały ciepłaachoŭny ekran, kab karabiel nie razvaliŭsia ŭ płastach atmaśfiery: tempieratura jaho abšyŭki dasiahaje amal 3000°C.
Achoŭny płast «Aryjona» — heta novaja kanstrukcyja, i NASA pavinna było pierakanacca ŭ jaho efiektyŭnaści, kab nie ryzykavać žyćciami astranaŭtaŭ u budučych misijach.
Ciapier čytajuć
U Francyi ad śpioki zahinuŭ dalnabojščyk z Dokšycaŭ11
Kamientary
Zrešty, usie niuansy vymaŭleńnia nie pieradasi, i ŭ pryncypie hety vostraŭ taksama možna było b Hvadełupaj nazyvać. Ale dla razroźnieńnia chaj budzie tak.